އޮމިކްރޯން ވޭރިއަންޓާ ގުޅިގެން ދެކުނު އެފްރިކާއަށް ކުރިމަތިވި ކޮވިޑް-19ގެ ހަތަރު ވަނަ ރާޅުގެ ޕީކު ދުވަސްތައް ގޮސްފައިވުމާއެކު ވައިރަސް ފެތުރުން ކޮންޓްރޯލްކުރުމަށް އަޅާފައިވާ ފިޔަވަޅުތަކަށް ލުއި ދީފިއެވެ.

އެގޮތުން ދަންވަރުން ފެށިގެން ފަތިހު 4 ޖެހުމާ ހަމައަށް އެގައުމުގައި ކުރިޔަށްގެންދިޔަ ކާފިއު މިހާރު ވަނީ އުވާލާފައެވެ. ފިޔަވަޅުތަކަށް ލުއި ދީފައިމިވަނީ ބަލި ފެތުރޭ މިންވަރާއި ވެކްސިން ޖަހާފައިވާ މިންވަރާއި އެގައުމުގެ ހެލްތު ސެކްޓަރ ގައި ކެޕޭސިޓީ ހުރި މިންވަރުގެ މައްޗަށް ބަލާފައިކަމަށް އެގައުމުގެ ރައީސް އޮފީހުގެ މިނިސްޓަރ މޮންޑްލީ ގުންގުބެލޭ ނެރުއްވި ބަޔާނުގައިވެއެވެ.

ދެކުނު އެފްރިކާ މިވަގުތު އޮތީ ކޮވިޑް-19ގެ އެލަރޓް ލެވެލްތަކުގެ ތެރެއިން އެންމެ ދަށު ލެވެލްގައެވެ. ބުރާސްފަތި ދުވަހު ބޭއްވި ކެބިނެޓް ބައްދަލުވުމަށްފަހު ނެރުނު ބަޔާނުގައި ބުނެފައިވަނީ ހުރިހާ އިންޑިކޭޓަރ ތައް ދައްކާގޮތުން ހަތަރު ވަނަ ރާޅުގެ ޕީކުގެ ދުވަސްވަރު މިހާރު ފަހަނައަޅާ ގޮސްފައިވާކަމަށެވެ.

އެގައުމުގެ ޑިޕާޓްމެންޓް އޮފް ހެލްތުގެ ޑޭޓާ ދައްކާގޮތުން ދުވާލެއްގެ މައްޗަށް ފެންނަ އައު ކޭސްތަކުގެ އަދަދު ވަނީ 29.7 އިންސައްތަ ދަށްވެފައެވެ.

ދެކުނު އެފްރިކާގެ 3.5 މިލިއަން މީހުންނަށް ކޮވިޑް ޖެހިފައިވާއިރު 91،000 މީހުން ވަނީ މިބަލީގައި މަރުވެފައެވެ.

ކާފިއު އުވާލުމުގެ އިތުރުން އެތެރޭގައި ބާއްވާ ހަރަކާތްތަކުގައި ގިނަވަގެން 1000 މީހުންނަށް ބައިވެރިވެވޭނެކަމަށާއި ބޭރުގައި ބާއްވާ އިވެންޓްތަކުގައި 2000 މީހުންނަށް ބައިިވެރިވެވޭގޮތަށް ވަނީ ބަދަލުކޮށްފައެވެ.