އެއްބައިވަންތަކަމުގެ ދުވަހާ ގުޅިގެން ހޯމް މިނިސްޓްރީން ދުވުމެއް ބާއްވައިފި

ދިވެހިންގެ އެއްބައިވަންތަކުގެ ދުވަސް ފާހަގަ ކުރުމުގެ ގޮތުން މިނިސްޓްރީ އޮފް ހޯމް އެފެއާޒުން އިންތިޒާމް ކޮށްގެން ކުރިއަށް ގެންދިޔަ ވަރޗުއަލް ރަން 2021، މިނިސްޓަރ އޮފް ހޯމް އެފެއާޒް އިމްރާން އަބްދުﷲ ފައްޓަވައި ދެއްވައިފިއެވެ.

މިނިސްޓްރީ އޮފް ހޯމް އެފެއާޒާއި ޔުނިކްސް ސްޕޯޓްސް ގުޅިގެން ކުރިއަށް ގެންދިޔަ މި ދުވުން ފަށާފައިވަނީ ބުރާސްފަތި ދުވަހުގެ ހަވީރު މާލޭ ދުވާ ޓްރެކުންނެވެ. ވަރޗުއަލްކޮށްވެސް ގިނަ ބަޔަކު ވަނީ މި ދުވުމުގައި ބައިވެރިވެފައެވެ.

މި ދުވުން ފައްޓަވައި ދެއްވައި މިނިސްޓަރ އޮފް ހޯމް އެފެއާޒް އިމްރާން އަބްދުﷲ ދެއްކެވި ވާހަކަފުޅުގައި ދިވެހިންގެ އެއްބައިވަންތަކުގެ މައްޗަށް ވަނީ އަލިއަޅުއްވާލައްވާފައެވެ. މިނިސްޓަރ ވިދާޅުވީ ދިވެހީންގެ އެއްބައިވަންތަކަން ވަރަށް ގިނަ ކަންކަމާ ގުޅިފައިވާ ކަމަށެވެ. 

މިނިސްޓަރ ވިދާޅުވީ އެއްބައިވަންތަކަން ރަމްޒު ކޮށްދިނުމުގެ ގޮތުން މި ދުވުމުގައި 500 ފަރާތަކުން ބައިވެރިވެފައިވާ ކަމަށާއި، މިފަދަ ކަންކަމަކީ ދިވެހިންގެ އެއްބައިވަންތަކަމަށް މުހިންމު ކަމެއް ކަމަށެވެ. މިނިސްޓަރ ވިދާޅުވީ ފުރިހަމަ ސިއްހަތާއި ދުޅަހެޔޮކަމުގައި ތިބެ އެއްބައިވަންތަކަން ދެމެހެއްޓުމަކީ ކުރިމަގަށްޓަކައި މުހިންމު ކަމެއް ކަމަށެވެ.

މި ދުވުމުގައި މިނިސްޓަރ އިމްރާން އަބްދުﷲގެ އިތުރުން ހޯމް މިނިސްޓްރީގެ ސްޓޭޓް މިނިސްޓަރ އަލީ ނަޒީރާއި މުހައްމަދު މާހިރު އީސާގެ އިތުރުން ހޯމް މިނިސްޓްރީގެ އިސްވެރިން ވަނީ އަމަލީ ގޮތުން ބައިވެރިވެވަޑައިގަންނަވާފައެވެ. މީގެ އިތުރުން އާންމުންގެ ގިނަ އަދަދެއްގެ ބަޔަކުވެސް މި ދުވުމުގައި ވަނީ ބައިވެރިވެފައެވެ.

5 ކިލޯ މީޓަރަށް ދުވުމަށް ހަމަޖެހިފައިވާ މި ދުވުމުގައި، މާލޭގެ އިތުރުން ރާއްޖޭގެ އެކި ކަންކޮޅުތަކުން ވަނީ ބައިވެރިވެފައެވެ.