ޕޯޓް ސޭފްޓީ ވީކް 2021 ގެ ފުރަތަމަ ވޯރކްޝޮޕް ފަށައިފި
މި ވޯރކްޝޮޕް 2 ދުވަހަށް ކުރިއަށްދާނެ
ޕޯޓް ސޭފްޓީވީކް 2021 ފެށުން
މޯލްޑިވްސް ޕޯޓްސް ލިމިޓެޑުން ޑިސެމްބަރު މަހުގެ 26 ވަނަ ދުވަހުން ފެށިގެން 31 ވަނަ ދުވަހުގެ ނިޔަލަށް ކުރިޔަށް ގެންދާ ޕޯޓް ސޭފްޓީ ވީކްގެ ފުރަތަމަ ވޯރކްޝޮޕް ފަށައިފިއެވެ.
ޕޯޓު ސޭފްޓީ ވީކްގެ ތެރެއިން ފުރަތަމަ ކުރިއަށް ގެންދާ "ސޭފްޓީ ކަލްޗަރ އަވެއަރނެސް ވޯރކްޝޮޕް" އާދިއްތަ ދުވަހުގެ ހެނދުނު 10:00ގައި ފައްޓަވައިދެއްވީ، އެ ކުންފުނީގެ ސީއީއޯ ޝާހިދު އަލީއެވެ. ޖުމްލަ 43 ބައިވެރިންނާ އެކު ކުރިއަށް ގެންދާ މި ވޯރކްޝޮޕް ކުރިއަށް ގެންދިއުމަށް ހަމަޖެހިފައިވަނީ 2 ދުވަހުގެ މުއްދަތަކަށެވެ.
މި ވޯރކްޝޮޕްގައި ފުރަތަމަ މައުލޫމާތު ދިނުމަށް ހަމަޖެހިފައިވަނީ، ސޭފްޓީ ކަލްޗަރއާ ބެހޭގޮތުންނެވެ. އެއަށްފަހު ދިވެހި ފުލުހުންގެ ޚިދުމަތުގެ ފަރާތުން ކްރައިމް ޕްރިވެންޝަނާގުޅޭ މައުލޫމާތު ދިނުމަށް ވަނީ ހަމަޖެހިފައެވެ. މީގެއިތުރުން، މޯލްޑިވްސް ނޭޝަނަލް ޑިފެންސް ފޯސް (އެމްއެންޑީއެފް)ގެ ކެމިކަލް އަދި އައިއެމްޑީޖީއާ ބެހޭ ގޮތުން ވެސް މައުލޫމާތު ދިނުމަށް ވަނީ ހަމަޖެހިފައެވެ. އެއަށްފަހު، މޫސުމާ ބެހޭ ގައުމީ އިދާރާގެ ފަރާތުން، މޫސުމާ ގުޅިގެން ދިމާވާ ކާރިސާތަކާ ބެހޭ މައުލޫމާތު ދިނުމަށް ވަނީ ހަމަޖެހިފައެވެ.
މީގެއިތުރުން، ސައިބަރ ސެކިއުރިޓީއާ ގުޅިގެން މައުލޫމާތު ދިނުމާއި، ޓީމް ބިލްޑިންގ އެކްޓިވިޓީގެ އިތުރުން އެންސިސްގެ ފީލްޑް ޓްރިޕެއް ވޯކްޝޮޕްގެ ތެރެއިން ކުރިޔަށް ގެންދިއުމަށް ވަނީ ހަމަޖެހިފައެވެ. އަދި ވޯކްޝޮޕް ނިމުމުން ހުރިހާ ބައިވެރިންނަށް ސެޓްފިކެޓް ދޭނެ ކަމަށް އެމްޕީއެލްއިން ބުނެފައިވެއެވެ.
2019 ވަނަ އަހަރުން ފެށިގެން އެމްޕީއެލްއިން ސޭފްޓީ ވީކް ފާހަގަކުރުމުގެ ބޭނުމަކީ މަސައްކަތުގެ މާހައުލުގައި އުޅޭ އިރު ސަލާމަތާއި ރައްކާތެރިކަމަށް ހުރިހާ އެންމެން ވެސް ހޭލުންތެރިކޮށް، އެކަމަށް އިސްކަންދޭ ސަގާފަތެއް އާލާކުރުން ކަމަށް އެމްޕީއެލްއިން ބުނެއެވެ.
