އިންޓައިން ލީޑު ދެމެހެއްޓިއިރު، މިލާން ދެވަނައަށް

އިޓާލިއަން ލީގުގައި ބުދަ ދުވަހުގެރޭ ކުޅުނު މެޗުން ތާވަލުގެ އެއްވަނައިގައި އޮތް އެންމެ ފަހުގެ ޗެމްޕިއަން އިންޓަ މިލާން މޮޅުވިއިރު، އެމްޕޯލީ ބަލިކޮށް ތާވަލުގެ ދެވަނައަށް އޭސީ މިލާން ޖެހިލައިފިއެވެ.

އަމިއްލަ ދަނޑުގައި ކުޅުނު މެޗުން އިންޓަ މޮޅުވީ ޓޮރީނޯ އަތުން 1-0 ގެ ނަތީޖާއަކުންނެވެ.

މި މެޗުގައި ދެ ޓީމަށްވެސް ރަނގަޅު ފުރުސަތުތަކެއް ލިބިގެންދިޔައިރު، ފުރަތަމަ ހާފުގައި ޓޮރީނޯގެ މާކޯ ޖަޓްސާ ފޮނުވާލި ނުރައްކާޔެރި ހަމަލާއެއް ދިޔައީ ގޯލުގެ އަރިމަތީ ދަނޑި ކައިރިން ބޭރަށެވެ. އަދި އޭގެ ފަހުން އިންޓަގެ އަލެސަންދްރޯ ބަސްޓޯނީއަށް ހުސް ފުރުސަތެއް ލިބުނު ނަމަވެސް، އޭނާ ފޮނުވާލި ހަމަލާވެސް ދިޔައީ ގޯލާ އަމާޒުނުވެއެވެ.

މި މެޗުގައި އިންޓައިން ކާމިޔާބުކުރި ހަމައެކަނި ލަނޑު އެ ޓީމުން ޖަހާފައިވަނީ މެޗުގެ 30 ވަނަ މިނެޓުގައެވެ. އެޑިން ޒެކޯގެ އެހީތެރިކަމާއެކު އޭރިއާ ތެރެއިން ފޮނުވާލި ހަމަލާއަކުން މި ލަނޑު އެ ޓީމަށް ކާމިޔާބުކޮށްދިނީ ޑެންޒެލް ޑަމްފްރީސްއެވެ. އަދި އޭގެ ފަހުން ލީޑު ފުޅާކުރަން އިންޓަގެ ލަޓާރޯ މާޓިނޭޒަށް ހުސް ފުރުސައް ލިބުނު ނަމަވެސް، އޭނާ ފޮނުވާލި ބޯޅަވެސް ދިޔައީ ގޯލުގެ އަރިމަތީ ދަނޑި ކައިރިން ބޭރަށެވެ.

މި މޮޅާއެކު ތާވަލުގެ އެއްވަނައިގައި އިންޓަ އޮތީ ހަތަރު ޕޮއިންޓުގެ ލީޑަކާއެކުއެވެ. އެގޮތުން އެ ޓީމަށް ވަނީ ކުޅުނު 19 މެޗުން 46 ޕޮއިންޓް ލިބިފައެވެ.

މީގެ އިތުރުން ތާވަލުގެ ދެވަނައަށް ޖެހިލި މިލާނުން ވަނީ ލީގުގައި ބުދަ ދުވަހުގެރޭ ކުޅުނު މެޗުން އެމްޕޯލީ އަތުން 4-2 ގެ ނަތީޖާއަކުން މޮޅުވެފައެވެ.

އެމްޕޯލީގެ ދަނޑުގައި ކުޅުނު މެޗު ފަށައިގެން 12 ވަނަ މިނެޓުގައި ފްރޭންކް ކެސިއޭ ވަނީ މިލާނަށް ލީޑު ނަގައިދީފައެވެ. އެކަމަކު އޭގެ ހަ މިނެޓު ފަހުން އެމްޕޯލީން ނަތީޖާ އެއްވަރުކުރިއިރު، އޭރިއާ ތެރެއިން ފޮނުވާލި ބާރު ހަމަލާއަކުން މި ލަނޑު އެ ޓީމަށް ކާމިޔާބުކޮށްދިނީ ނެޑިމް ބައިރާމީއެވެ. ނަމަވެސް ފުރަތަމަ ހާފު ނިމުމުގެ ކުރިން ކެސިއޭ ވަނީ އިތުރު ލަނޑެއް ޖަހައި، މިލާނަށް އަލުން ލީޑު ނަގައިދީފައެވެ.

މި މެޗުގެ ދެވަނަ ހާފުގައި ގާތް ގާތުގައި ޖެހި ދެ ލަނޑާއެކު މިލާނުން ވަނީ ލީޑު ފުޅާކޮށްފައެވެ. މި ލަނޑުތައް އެ ޓީމަށް ކާމިޔާބުކޮށްދިނީ އަލެސަންދްރޯ ފްލޮރެންޒީ އާއި ތެއޯ ހެނާންޑޭޒެވެ. ދެން މި މެޗުގައި އެމްޕޯލީން ކާމިޔާބުކުރި ދެވަނަ ލަނޑު މެޗު ނިމެން ހަ މިނެޓަށް ވެފައި ވަނިކޮށް ލިބުނު ޕެނަލްޓީއަކުން ކާމިޔާބުކޮށްދިނީ އަންދްރެއާ ޕިނަމޮންޓީއެވެ.

މި މޮޅާއެކު ތާވަލުގެ ދެވަނައަށް މިލާން ޖެހިލީ 19 މެޗުން 42 ޕޮއިންޓާއެކުއެވެ. މީގެ ކުރިން ދެވަނައިގައި އޮތް ނާޕޮލީ ވަނީ ބުދަ ދުވަހުގެރޭ ކުޅުނު މެޗުން ސްޕެޒިއާ އަތުން 1-0 ގެ ނަތީޖާއަކުން ބަލިވެފައެވެ. އެއާއެކު އެ ޓީމު އޮތީ ތާވަލުގެ ތިންވަނައިގައި 19 މެޗުން 39 ޕޮއިންޓާއެކުއެވެ.