ބާސެލޯނާއަށް ބަދަލުވާން މެންޗެސްޓާ ސިޓީއަށް ކުޅެމުން އަންނަ ސްޕެއިނުގެ ޒުވާން ފޯވާޑް ފެރާން ޓޮރޭސް އެއްބަސްވެފައިވާ ކަމަށް ރިޕޯޓުތައް ބުނެފިއެވެ.
މީގެ ކުރިން ވެލެންސިއާއަށްވެސް ކުޅުނު އުމުރުން 21 އަހަރުގެ ޓޮރޭސް ސިޓީއަށް ބަދަލުވީ މިދިޔަ އަހަރުގެ އޯގަސްޓް މަހު 23 މިލިޔަން ޔޫރޯގެ ފީއަކަށެވެ. އެ ފަހަރު އޭނާ ވަނީ ސިޓީއާއެކު ފަސް އަހަރުގެ އެއްބަސްވުމެއް ހަދާފައެވެ. އެހެންކަމުން އެ އެއްބަސްވުމުގެ މުއްދަތު ހަމަވާނީ 2025 ވަނަ އަހަރުގެ ހޫނު މޫސުމުގައެވެ.
ރިޕޯޓުތައް ބުނާ ގޮތުން ޓޮރޭސް ބާސާގެ އައު ކޯޗު ޒަވީ ހެނާންޑޭޒް ފާރަލަމުން އަންނަ ކުޅުންތެރިއެކެވެ. އެއާއެކު ޓޮރޭސްގެ ޓްރާންސްފާއާ ގުޅޭ ގޮތުން މި މަހުގެ ކުރީކޮޅު ސިޓީ އާއި ބާސާއިން މަޝްވަރާކޮށްފައިވާއިރު، ބާސާއަށް ބަދަލުވާން ޓޮރޭސް ،މިހާރު އެއްބަސްވެފައިވާ ކަމަށް ރިޕޯޓުތައް ބުނެފިއެވެ. އަދި ސިޓީން ޓޮރޭސް ވިއްކާނީ 40 މިލިޔަން ޔޫރޯގެ ފީއަކަށް ކަމަށްވެސް ވަނީ ރިޕޯޓުކޮށްފައެވެ. ސްޕެއިނުގެ މީޑިއާ ރިޕޯޓުތައް ބުނާ ގޮތުން ކުރިއަށް އޮތް ޖެނުއަރީ މަހުގެ ޓްރާންސްފާ ބާޒާރުގައި ޓޮރޭސް ގަތުމަށް ބާސާއިން ބިޑުކުރާނެއެވެ.
ބާސާއިން ފޯވާޑެއް ހޯދުމަށް މަސައްކަތްކުރަމުން އަންނައިރު، މިދިޔަ ހޫނު މޫސުމުގެ ޓްރާންސްފާގައި އެ ޓީމުން ވަނީ މީގެ ކުރިން ސިޓީއަށް ކުޅުނު އާޖެންޓީނާގެ ތަޖުރިބާކާރު ފޯވާޑް ސާޖިއޯ އަގުއޭރޯ ގެނެސްފައެވެ. އެކަމަކު ދާދި ފަހުން ހިތުގެ މައްސަލަތަކެއް ފާހަގަވެގެން އަގުއޭރޯ ވަނީ ފުޓްބޯޅަ ކުޅުން ހުއްޓާލާފައެވެ.
ބާސާއިން ޓޮރޭސް ހޯދުމަށް މަސައްކަތްކުރަމުން އަންނައިރު، ސްޕެއިންގެ ގައުމީ ޓީމާއެކު މި އަހަރުގެ ޔޫރޯ ފުޓްބޯޅަ މުބާރާތުގައިވެސް ކުޅެފައިވާ ޓޮރޭސްއަކީ ވެލެންސިއާގެ ޔޫތު އެކަޑަމީގެ އުފެއްދުމެކެވެ. އަދި އޭނާ ވަނީ ވެލެންސިއާއާއެކު ސްޕެނިޝް ކަޕް ކާމިޔާބުކޮށްފައެވެ. އޭގެ ފަހުން ސިޓީއަށް ބަދަލުވެ އެ ޓީމަށް ކުޅެދިން 43 މެޗުގައި 16 ލަނޑު ޓޮރޭސް ކާމިޔާބުކޮށްފައިވާއިރު، އޭނާ ވަނީ ސިޓީއާއެކު މިދިޔަ ސީޒަނުގެ އިނގިރޭސި ޕްރިމިއާ ލީގު އަދި އިނގިރޭސި ލީގު ކަޕް ކާމިޔާބުކޮށްފައެވެ.
