ސަޅިބައިސާކެނޑި ދަނޑު، މެމްބަރު ތޯރިގަކަށް ނޭޅުނު!
2020 ވަނަ އަހަރު ދަނޑު ނޭޅިއްޖެނަމަ ތޯރިގުގެ އަމިއްލަ ޚަރަދުގައި އަޅައިދޭނެކަމަށް ވިދާޅުވި
ކުނބުރުދޫގައި އަޅައިދިނުމަށް ވައުދުވީ ފުޓްބޯޅަ ދަނޑު މެމްބަރު ތޯރިގަށް އަޅައިނުދެވުނު
އދ. ކުނބުރުދޫގައި ފުޓްބޯޅަ ދަނޑެއް އަޅައިދޭނެކަމަށް ވައުދުވެ ސަޅިބާސާކެނޑި ނަމަވެސް މަހިބަދޫ ދާއިރާގެ މަޖިލިސް މެމްބަރު އަހުމަދު ތޯރިގަކަށް އެކަމެއް ނުކޮށްދެވުނެވެ.
ކުރީގެ ރައީސް ޔާމީނުގެ އަރިހުގައި 2019 ވަނަ އަހަރު ކުނބުރުދޫއަށް ކުރެއްވި ދަތުރެއްގައި އެ ދާއިރާގެ މަޖިލިސް މެމްބަރު ތޯރިގު ވަނީ 2020 ވަނަ އަހަރުގެ ބަޖެޓުގައި އެ މަސައްކަތް ހިމަނައިގެން ކޮށްދޭނެކަމަށް ވިދާޅުވެފައެވެ. އަދި 2020 ވަނަ އަހަރުގެ ބަޖެޓުގައި ހިމަނައިގެން އެ މަސައްކަތް ނުކުރެވިއްޖެ ނަމަ 2020 ވަނަ އަހަރު ތޯރިގުގެ އަމިއްލަ ބަޖެޓުން ކުނބުރުދޫގައި ފުޓްބޯޅަ ދަނޑެއް އަޅައިދޭނެކަމަށް ވައުދުވެވަޑައިގަތެވެ.
2020 ވަނަ އަހަރުގެ ބަޖެޓުގައި ކުނބުރުދޫގެ ދަނޑު ހެދުމަށް ބަޖެޓް ކުރެވުނު ނަމަވެސް ކޮވިޑްގެ ސަބަބުން މި ސަރުކާރަށް އެކަން ކޮށްދެވޭގޮތެއް ނުވިއެވެ. ހަމަ އެފަދައިން މެމްބަރު ތޯރިގަށް ވެސް އެކަންތައް ނިންމައި ނުދެވުނީ ކޮވިޑުގެ ސަބަބުންނެވެ. ކުނބުރުދޫ ދަނޑުގެ މަސައްކަތް 2020 ވަނަ އަހަރު ނުނިމުމުން މި އަހަރުގެ ބަޖެޓުގައި ވެސް އެ މަސައްކަތް ހިމަނާފައިވެއެވެ.
މި އަހަރު ނިމުމަކާ ގާތްވިއިރުު ވެސް އެދަނޑު ހެދިފައި ނުވާތީ ކުނބުރުދޫގެ ޒުވާނުން އަންނަނީ އެކަމާ ކަނބޮޑުވުން ފާޅުކޮށް ޝަކުވާ ކުރަމުންނެވެ. އަދި މެމްބަރު ތޯރިގު ހަދައިދޭން ބުނި ދަނޑު ހަދައިދިނުމަށް އެރަށު ރައްޔިތުން އެތައް ފަހަރެއްގެ މަތިން ތޯރިގާ މަޝްވަރާކުރިއެވެ.
އެންމެ ފަހުން މެމްބަރު ތޯރިގު އަޅައިދޭނެކަމަށް ވިދާޅުވި ދަނޑު ސަޅިބައިސާއަށް ވެފައިވަނިކޮށް މި ސަރުކާރުން މިހާރު ވަނީ ކުނބުރުދޫގެ ދަނޑު ހެދުމަށް ކުންފުންޏަކާ ހަވާލުކޮށްފައެވެ. އަދި މި މަސައްކަތުގެ އެއްބަސްވުމުގައި މި އަހަރުގެ އޮކްޓޫބަރު މަހުގެ 11 ވަނަ ދުވަހު ވަނީ ސޮއިކޮށްފައެވެ.
މިކަމާ ގުޅިގެން ރާއްޖެޓީވީއަށް މައުލޫމާތު ދެއްވަމުން މެމްބަރު ތޯރިގު ވިދާޅުވީ އަދިވެސް ސަރުކާރުން މި ދަނޑު ނުނިންމައިފި ނަމަ ތޯރިގުގެ މަސައްކަތުން އެ ދަނޑު ހަދައިދޭނެ ކަމަށެވެ.
ކުނބުރުދޫގެ ފުޓްބޯޅަ ދަނޑު ނުހެދި، ދާއިރާގެ މެމްބަރުގެ އަމިއްލަ ޖީބުން ޚަރަދުކޮށްގެން ދަނޑު ހަދައިދިިނުމަށްވީ ވައުދު ނުފުއްދުމުން އެރަށު ރައްޔިތުން އަންނަނީ ނުރުހުން ފާޅު ކުރަމުންނެވެ. އަދި ތޯރިގަކީ އާންމުކޮށް މަޖިލީހަށް ހާޒިރުވާ މެމްބަރެއް ނޫންކަން ފާހަގަކޮށް، އެ ރަށުގެ ޒުވާނުން ބުނީ ދަނޑުގެ އަޕްޑޭޓް ހޯދުމަށް ގުޅުމުން ވެސް ތޯރިގު ފޯނު ނުނަގާކަމަށެވެ.
