އދ. ކުނބުރުދޫގައި ބޭރަށްހިނގުމާއި ހުމުގެ ރޯގާ އިތުރުވެ، ހެލްތު ސެންްޓަރު ފުރުމުގެ ސަބަބުން ޚިދުމަތްތައް ދިނުމުގައި ދަތިތަކެއް ކުރިމަތިވެއްޖެއެވެ.

މިކަމާއި ގުޅިގެން ރާއްޖެއެމްވީއަށް މައުލޫމާތު ދެއްވަމުން ކުނބުރުދޫ ހެލްތު ސެންޓަރުގެ ޒިންމާދާރު ވެރިޔާ މަރިޔަމް ވަރުދާ ވިދާޅުވީ އެރަށުގައި ބޭރަށްހިނގުމާއި ހުމުގެ ރޯގާ އިތުރުވެ ގިނަ ބަޔަކު ފަރުވާ ހޯދުމަށް ހެލްތު ސެންޓަރަށް އަންނަމުންދާތީ ސެންޓަރު ފުރިފައިވާ ކަމަށެވެ. އެގޮތުން ސެންޓަރު ފުރުމުގެ ސަބަބުން ބައެއް މީހުން ކޮރިޑޯގައި އެޑްމިޓްކޮށްފައިވާ ކަމަށްވެސް ވަރުދާ ވިދާޅުވިއެވެ. މީގެ އިތުރުން ސެންޓަރުގައި ހުރީ އެންމެ ޑޮކްޓަރަކާއި ދެ ނަރުހުންކަން ފާހަގަކޮށް ވަރުދާ ވިދާޅުވީ އެއް ނަރުހަކުވެސް މި ބަލީގައި އެޑްމިޓްކޮށްފައިވާ ކަމަށެވެ.

ކުނބުރުދޫ ހެލްތު ސެންޓަރުގައި މީހުން އެޑްމިޓް ކުރެވޭނެ މިހާރު ހުރީ އެންމެ ތިން އެނދެވެ. ގިނަ ބަޔަކު ބަލިވެގެން ފަރުވާ ހޯދުމަށް ސެންޓަރަށް ދާންފަށާފައިވަނީ ބުރާސްފަތި ދުވަހުގެ ހެނދުނުން ފެށިގެންނެވެ. ފަރުވާ ހޯދަންދާ މީހުން ގިނަވެ، އެޑްމިޓުކުރާނެ ޖާގަ ނެތިގެން ބައެއް މީހުންނަށް ބޭސް ދީފައި އަންނަނީ ގެއަށް ފޮނުވަމުންނެވެ. އަދި ޖާގައިގެ ބޭނުން އެންމެ ރަނގަޅު ގޮތުގައި ހިފުމަށްޓަކައި ބެލެނިވެރިންގެ ހުއްދައާއެކު އެއް ގެއެއްގައި ދިރިއުޅޭ ދެކުދިން އެއް އެނދެއްގައި އެޑްމިޓްކުރިކަމަށްވެސް ވަރުދާ ވިދާޅުވިއެވެ.

މީގެ ކުރިން 2020 ވަނަ އަހަރުގައިވެސް އެރަށުގައި ބޭރަށް ހިނގުން ގިނަވެ ގިނަ ބަޔަކު ވަނީ ހެލްތު ސެންޓަރުގައި އެޑްމިޓްކޮށްފައެވެ. އަދި ސެންޓަރުގައި މީހުން އެޑްމިޓްކުރާނެ ޖާގަނެތުމުގެ މައްސަލަ އެފަހަރުވެސް ކުރިމަތިވިއެވެ. އެފަހަރުގެ ބަލިމަޑުކަމުގައި އެއަތޮޅުގެ ހޮސްޕިޓަލުން ވަނީ އިތުރު ވަސީލަތްތައް އެރަށަށް ފޯރުކޮށްދީފައެވެ.

ރަށުގައި ހަލުވިކަމާއެކު ބޭރަށް ހިނގުމާއި ހުމުގެ ރޯގާ އިތުރުވަމުން އަންނައިރު، މި ބަލިމަޑުކަން ފެތުރެން ފެށިފަހުން އެރަށުގައި ކޮވިޑުގެ ކޭހެއް ފެނިފައެއް ނުވެއެވެ.