ކުނބުރުދޫގައި ދަނޑުވެރިކަމާ ބެހޭ ތަމްރީން ޕްރޮގްރާމެއް ކުރިއަށް ގެންދަނީ
މި ތަމްރީނު ޕްރޮގްރާމްގެ މުއްދަތަކީ 10 ދުވަސްކަމަށާއި ފުރުޞަތު ދެވޭނީ ފުރަތަމަ ނަންނޯޓް ކުރާ 40 ފަރާތައްކަމަށް ކައުންސިލުން ބުނޭ
އދ.ކުނބުރުދޫ
އދ. ކުނބުރުދޫގައި ދަނޑުވެރިކަމާ ގުޅޭ ތަމްރީނު ޕްރޮގްރާމެއް ކުރިއަށް ގެންދަން ނިންމައި އެޕްރޮގްރާމްގައި ބައިވެރިވުމަށް ފުރުޞަތު ހުޅުވާލައިފިއެވެ.
ކުނބުރުދޫ ކައުންސިލުން ބުނި ގޮތުގައި މި ޕްރޮގްރާމް ކުރިއަށް ގެންދިޔުމަށް ހަމަޖެހިފައިވަނީ އެކައުންސިލާއި މިނިސްޓްރީ އޮފް ފިޝަރީޒް، މެރިން ރިސޯސަސް އެންޑް އެގްރިކަލްޗަރ ގުޅިގެން އަންނަ ފެބްރުއަރީ މަހުގެ ކުރީކޮޅުއެވެ.
އެކައުންސިލުން އިތުރަށް ބުނީ މި ތަމްރީނު ޕްރޮގްރާމްގެ މުއްދަތަކީ 10 ދުވަސްކަމަށާއި، ތަމްރީނު ޕްރޮގްރާމްގެ ޖާގައަކީ ގިނަ ވެގެން 40 ބައިވެރިންކަމަށްވާތީ، ފުރުސަތު ދޭނީ ނަން ނޯޓު ކުރާ ތަރުތީބުންކަމަށެވެ.
ދަނޑުވެރިކަމާބެހޭ މި ތަމްރީނު ޕްރޮގްރާމްގައި ބައިވެރިވާން ބޭނުންވާ ފަރާތްތަކުން، ރަސްމީ ގަޑީގައި ކުނބުރުދޫ ކައުންސިލުގައި ނަން ނޯޓު ކުރުމަށް އެކައުންސިލުން ވަނީ އެދިފައެވެ. އަދި ނަންނޯޓް ކުރުމުގެ ފުރުޞަތު ހުޅުވާލެވިފައިވަނީ 20 ޖަނަވަރީ 2022 ވާ ބުރާސްފަތި ދުވަހުގެ 11:00 ގެ ނިޔަލަށް ކަމަށްވެސް ކުނބުރުދޫ ކައުންސިލުން ބުނެއެވެ.
