މޫލާފައިވާ ވަކިތަކުން ފުޓްބޯޅަ ސަލާމަތް ކުރަން ކުރަންހުރި މަސައްކަތް އަދިވެސް މަދު ނޫންކަމަށް އެއިދާރާގެ ރައީސް ކަމަށް ދެފަހަރަށް ހުޅުވާލުމުންވެސް ކުރިމަތިލެއްވި ކުރީގެ އެއްވަނަ ފޯވާޑް އަހުމަދު ތާރިގު (ޓޮމް) ވިދާޅުވެއްޖެ އެވެ.
އެފްއޭއެމްގެ ހިންގުން ނޯމަލައިޒް ކޮމިޓީއަކާ ހަވާލުކުރަން އިއްޔެ ފީފާއިން ނިންމުމުން ރައްޔިތުންގެ މަޖިލިހުގެ މަހިބަދޫ ދާއިރާގެ މެމްބަރުކަން ވެސް ކުރައްވާ ތާރިގު ވިދާޅުވީ ނިމުނީ ދިވެހި ފުޓްބޯޅައަށް ދިމާވެފައިވާ ގިލަންވެރިކަމުން ސަލާމަތްކުރަން ފެށި މަސައްކަތުގެ އެއް މަރުހަލާ ކަމަށެވެ. އެކަމަކު މޫލާފައިވާ ވަކިތަކުން ފުޓްބޯޅަ ސަލާމަތް ކުރުމަށް ކުރަންހުރި މަސައްކަތް އަދިވެސް މަދު ނޫން ކަމަށް ވިދާޅުވިއެވެ.
ފީފާއާ ހަމައަށް އެފްއޭއެމްގެ މައްސަލަތައް ގެންދިޔަ އެއް ފަރާތަކީ ވެސް ގައުމީ ޓީމުގެ ކުރީގެ ފޯވާޑް ތާރިގު އެވެ. ދެ ފަހަރެއްގެ މަތީން އެފްއޭއެމްގެ އިންތިޚާބު ބާއްވަން ކުރި މަސައްކަތުގެ ތެރެއިން އޭރު އޮތް ބައްސާމް އަދީލް ޖަލީލްގެ މެނޭޖްމަންޓުން ތާރިގަށް އުނދަގޫތައްވެސް ކުރިމަތި ކުރިވިއެވެ. އޭނާގެ ކެންޑިޑެސީ ބަލައި ނުގަނެ ހުއްޖަތް ދެއްކިއެވެ. ނަމަވެސް ދެފަހަރު ވެސް ފީފާއިން އިންތިޚާބުގެ ކަންކަން ހުއްޓުވީއެވެ.
އެފްއޭއެމް އޮތީ ހިންގުމުގެ މައްސަލަތަކާއި ފައިސާގެ މައްސަލަތަކުގައި ތާށިވެފައެވެ. ފީފާއިން އެއިދާރާގެ ހިންގުން ނޯމަލައިޒް ކޮމިޓީއަކާ ހަވާލުކުރަނީ އަންނަ އަހަރުގެ ޖުލައި މަހުގެ ނިޔަލަށް ކަންކަން ހަމަ މަގަށް އެޅުވުމަށެވެ. ދަރަނިތައް ދެއްކޭނެ ޕްލޭނެއް ހެދުމާއެކު، އިންތިޚާބަކާ ހަމައަށްވެސް ދިއުމަށެވެ.
