ކުނބުރުދޫގައި ރައީސް ހުޅުވައި ދެއްވި ފުޓުބޯޅަ ދަނޑަކީ ކުރީ ސަރުކާރުގެ މަޝްރޫއެއް

އދ.ކުނބުރުދޫގައި ރައީސް ޑޮކްޓަރު މުޙައްމަދު މުޢިއްޒު ހުޅުވައި ދެއްވި ބޮޑު ފުޓުބޯޅަ ދަނޑަކީ ކުރީ ސަރުކާރުގެ މަޝްރޫއެއް ކަމަށް ހާމަވެއްޖެ އެވެ.

އދ.އަތޮޅުގެ ރަށްތަކަށް ރައީސް މުޢިއްޒު ކުރެއްވި ދަތުރުފުޅުގައި ބުދަ ދުވަހު ވަނީ ކުނބުރުދޫ އަށް ވަޑައިގެން އެ ރަށުގެ ބޮޑު ފުޓުބޯޅަ ދަނޑު ރަސްމީކޮށް ހުޅުވައި ދެއްވައިފަ އެވެ. މި މަޝްރޫއަކީ ކުރީގެ ރައީސް އިބްރާހީމް މުޙައްމަދު ޞާލިޙުގެ ސަރުކާރުން ފަށާފައިވާ މަޝްރޫއެކެވެ.

ކުނބުރުދޫގެ ބޮޑު ފުޓުބޯޅަ ދަނޑު ޤާއިމު ކުރުމުގެ މަސައްކަތް ކުރީ ސަރުކާރުން ހަވާލު ކޮށްފައި ވަނީ ނެގާއި އިންވެސްޓްމަންޓާ އެވެ. އޭރުގެ ކުޅިވަރު ވުޒާރާ އާއި އެ ކުންފުންޏާ ދެމެދު އެއްބަސްވުމުގައި ސޮއި ކޮށްފައި ވަނީ 2021 ވަނަ އަހަރުގެ އޮކްޓޫބަރު މަހުގެ 11 ވަނަ ދުވަހު އެވެ.

އެއީ ކުރީގެ ރައީސް އިބޫގެ ސަރުކާރުން ރާއްޖޭގެ އެކި ކަންކޮޅު ތަކުގައި ބޮޑު ފުޓުބޯޅަ ދަނޑުތައް ޤާއިމު ކުރުމުގެ މަޝްރޫއު ކުރިއަށް ގެންދިޔައިރު، އެ މަޝްރޫއުގެ ދަށުން ކުރިއަށް ގެންދިޔަ މަސައްކަތެކެވެ. ނަމަވެސް މި ސަރުކާރުން ވަނީ ފަހުން އެ މަޝްރޫއު ރޯޑް ޑިވެލޮޕްމެންޓް ކޯޕަރޭޝަން ލިމިޓެޑް (އާރްޑީސީ)އާ ހަވާލު ކޮށްފަ އެވެ.

ކުޅިވަރާއި ހަށިހެޔޮކަމާ ބެހޭ ވުޒާރާ އިން އެ މަޝްރޫއު އާރުޑީސީއާ ހަވާލު ކޮށްފައި ވަނީ ނުނިމި ހުރި ކުޅިވަރު މަޝްރޫއުތައް ނިންމުމުގެ ދަށުން ކަމަށް ބުނެ އެވެ. އެގޮތުން ކުނބުރުދޫ ފުޓުބޯޅަ ދަނޑުގެ ނުނިމި ހުރި މަސައްކަތް ކުރުމަށް އާރުޑީސީއާ ހަވާލު ކޮށްފައި ވަނީ 4،900،741.92 (ހަތަރު މިލިއަން ނުވަ ލައްކަ، ހަތް ސަތޭކަ ސާޅީސް އެއް ރުފިޔާ ނުވަދިހަ ލާރި) އަށެވެ.

ކުރީގެ ރައީސް އިބޫގެ ސަރުކާރު ނިމުނުއިރު ވެސް ކުނބުރުދޫ ފުޓުބޯޅަ ދަނޑުގެ މަސައްކަތް ދިޔައީ ކުރިއަށެވެ. އަދި އެ ދަނޑުގެ މަސައްކަތުގެ ބޮޑު އިންސައްތައެއް އޮތީ ނިންމައިފަ އެވެ. މި ސަރުކާރުން އާރުޑީސީއާ ހަވާލުކުރީ ދަނޑުގެ ސަބް ބޭސް ތައްޔާރުކޮށް، ޓާފު އެޅުމާއި، ދަނޑުގެ ލައިޓިންގެ މަސައްކަތް ކުރުމުގެ އިތުރުން، ފަހުން ދަނޑަށް އިތުރު ކުރި ބައިގެ ވަށާފާރު މަރާމާތު ކުރުމުގެ މަސައްކަތެވެ.

ރައީސް މުޢިއްޒުގެ ސަރުކާރުން އަންނަނީ ކުރިން ފަށާފައިވާ ކުޅިވަރު މަޝްރޫއު ތަކާއި، ނިންމާފައިވާ މަޝްރޫއުތައް އިފުތިތާހު ކުރަމުންނެވެ. އެގޮތުން ބޮޑު ފުޓުބޯޅަ ދަނޑުތައް ޤާއިމު ކުރުމާއި، އައުޓްޑޯ ވޮލީ ކޯޓުތައް ޤާއިމު ކުރުމާއި، ކުޑަ ކުދިންގެ ޕާކު އަދި އައުޓްޑޯ ޖިމް ޤާއިމު ކުރުމުގެ މަޝްރޫއުތައް ހިމެނެ އެވެ.

ކުޑަ ކުދިންގެ ޕާކާއި، އައުޓްޑޯ ޖިިމް އަކީ ވެސް ކުރީ ސަރުކާރުން އިންޑިއާ ސަރުކާރުގެ އެހީތެރިކަމާ އެކު ކުރިއަށް ގެންދިޔަ މަޝްރޫއެކެވެ. އެ މަޝްރޫއުގެ ދަށުން، އެތައް ރަށަކަށް އޭރު ވަނީ ޕާކު އަދި ޖިމް ސާމާނު ވެސް ފޮނުވައިފަ އެވެ.

ކުރީގެ ސަރުކާރުން ކޮށްފައިވާ މިފަދަ މަސައްކަތްތައް ރައީސް މުޢިއްޒު ހުޅުވަމުން ގެންދަވާއިރު، އޭރު ވަޒީރަކަށް ހުންނެވި އަޙުމަދު މަޚްލޫފް ގެންދެވީ އެކަންކަމުގެ ތަފްސީލް ސޯޝަލް މީޑިއާގައި ހިއްސާ ކުރަމުންނެވެ.

ނަމަވެސް، އެމްޑީޕީ އިން ވަކިވުމަށް ފަހު، މަޚްލޫފް ވަނީ އެފަދަ ޕޯސްޓުތައް ކުުރުން ހުއްޓާލައިފަ އެވެ.