ފިއުލް ސަޕްލައި މޯލްޑިވްސް (އެފްއެސްއެމް) ބަލިކޮށް ކުލަބު މޯލްޑިވްސް ކަޕުގެ ޗެމްޕިއަންކަން ރޯޑް ރެކްރިއޭޝަން ކުލަބު (އާރްއާރްސީ) އިން ހޯދައިފިއެވެ.

ހުޅުމާލޭ ރެހެންދި ފުޓްސަލް ދަނޑުގައި އާދީއްތަ ދުވަހުގެރޭ ކުޅުނު ފައިނަލް މެޗު އާރްއާރްސީން ކާމިޔާބުކުރީ ފަސޭހަކަމާއެކު 4-0 ގެ ނަތީޖާއަކުންނެވެ. މި ފަހަރުގެ މުބާރާތުގެ ފައިނަލުގައި މުޅިން އަލަށް އެފްއެސްއެމް ވާދަކުރިއިރު، މީގެ ކުރިން 2017 ވަނަ އަހަރު އާރްއާރްސީން ވަނީ ރޯޑް ޑިވެލޮޕްމަންޓް ކޯޕަރޭޝަން (އެމްއާރްޑީސީ) ގެ ނަމުގައި މި މުބާރާތް ކާމިޔާބުކޮށްފައެވެ.

އާދީއްތަ ދުވަހުގެރޭ ކުޅުނު މެޗު ފަށައިގެން އާރްއާރްސީން ކުރިއަށްޖެހި އެފްއެސްއެމްގެ ގޯލަށް ނުރައްކާކޮށް ގިނަ ހަމަލާތަކެއް އުފެއްދިއިރު، އެފްއެސްއެމުން ފުރަތަމަ ހާފުގައި ވަނީ ރަނގަޅަށް ޑިފެންސްކޮށް ކައުންޓަ އެޓޭކުގައި އާރްއާރްސީގެ ގޯލަށް ނުރައްކާކޮށްފައެވެ. އެހެންނަމަވެސް ފުރަތަމަ ހާފު ނިމުމުގެ ކުރިން އާރްއާރްސީގެ އިތުބާރު ކުޅުންތެރިޔާ އިބްރާހީމް އަސްވާދު (ގަބޭ) ވަނީ ލަނޑު ޖަހައި އެ ޓީމަށް ލީޑު ނަގައިދީފައެވެ.

ދެވަނަ ހާފު ފަށައިގެން އެފްއެސްއެމްއިން ކުރިއަށްޖެހި އާރްއާރްސީގެ ގޯލަށް ނުރައްކާކުރިއިރު، އެ ޓީމުގެ އަޙުމަދު ވިޖުދާން (ވިޖުއްކޮ) ފޮނުވާލި ދެ ހަމަލާއެއް ދިޔައީ ގޯލުގެ އަރިމަތީ ދަނޑި ކައިރިން ބޭރަށެވެ. އަދި އެ ޓީމުގެ މުޙައްމަދު ތޯހިރު ފޮނުވާލި ހަމަލާގެ ހުރަހަކަށްވީ އާރްއާރްސީގެ ގޯލްކީޕަރު މުޙައްމަދު ޒުހަލްއެވެ.

އެފްއެސްއެމުން ކުރިއަށްޖެހި ކުޅުމުގެ ފައިދާ ނަގައި މެޗުގެ 31 ވަނަ މިނެޓުގައި އާރްއާރްސީން ވަނީ އިތުރު ލަނޑެއް ޖަހައި ލީޑު ފުޅާކޮށްފައެވެ. މި ލަނޑު އެޓީމަށް ކާމިޔާބުކޮށްދިނީ އާދަމް ނާސިހް (އާދަންނާ) އެވެ. އަދި އޭގެ ދެ މިނެޓު ފަހުން އާދަންނާ ވަނީ އިތުރު ލަނޑެއް ޖަހާފައެވެ. އަދި މެޗު ނިމެން ތިން މިނެޓަށް ވެފައިވަނިކޮށް އާދަންނާ ވަނީ އާރްއާރްސީގެ ހަތަރުވަނަ ލަނޑު ޖަހައި، މެޗުގައި ހެކްރިޓް ހަދާފައެވެ.

މި ފަހަރުގެ ކުލަބު މޯލްޑިވްސް ކަޕް އާރްއާރްސީން ކާމިޔާބުކުރިއިރު، ކުލަބު މޯލްޑިވްސްއިން ހޮވާ "ކިންގް އޮފް ފުޓްސަލް" އަކީ އާރްއާރްސީގެ ކެޕްޓަން އިބްރާހިމް މައިޝާން (މައި) އެވެ.

މީގެ އިތުރުން ހޮނިހިރު ދުވަހުގެރޭ ކުޅުނު ކުލަބު މޯލްޑިވްސްގެ އަންހެން ޑިވިޝަން ކަމަށްވާ 18/30 ފުޓްސަލް ފިއެސްޓާގެ ފައިނަލް މެޗު ކާމިޔާބުކުރީ މޯލްޑިވްސް ޕޯސްޓް ލިމިޓެޑް (އެމްޕީއެލް) އިންނެވެ. އެ ޓީމުން ވަނީ ފައިނަލުގައި ކުލަބު ވެމްކޯ އަތުން 7-4 ގެ ނަތީޖާއަކުން މޮޅުވެފައެވެ.

ހޮނިހިރު ދުވަހުގެރޭ ކުޅުނު ފައިނަލް މެޗުގައި އެމްޕީއެލްގެ ފާތިމަތު ޖޫޒާން ޒަރީރް ވަނީ ފަސް ލަނޑު ޖަހާފައެވެ. އަދި ވެމްކޯގެ ބިދޭސީ ކުޅުންތެރިޔާ ޑަރިކާ ވަނީ ތިން ލަނޑު ޖަހައި ހެޓްރިކް ހަދާފައެވެ. ދެން މި މެޗުގައި އެމްޕީއެލްއިން ޖެހި އަނެއް ދެ ލަނޑު ކާމިޔާބުކޮށްދިނީ ފާތިމަތު ޝާލިޔާއެވެ. އަދި ވެމްކޯއިން ޖެހި ފަހު ލަނޑު އެ ޓީމަށް ކާމިޔާބުކޮށްދިނީ މަރިޔަމް ނޫރާއެވެ.

މި ފަހަރުގެ އަންހެން ޑޮވިޝަނުގެ ޗެމްޕިއަންކަން އެމްޕީއެލްއިން ހޯދިއިރު، އެ ޓީމަކީ ކުލަބު މޯލްޑިވްސްގެ އަންހެން އަދި ފިރިހެން ޑިވިޝަނުގައިވެސް ޖެހިޖެހިގެން ތިން މުބާރާތް ކާމިޔާބުކުރި ފުރަތަަމަ ޓީމެވެ.