ރާއްޖޭގައި މި ވަގުތު ތިބި އެންމެ ފާހަގަކޮށްލެވޭ އެތުލީޓުންނަށް ދައުވަތުދީގެން އެތުލެޓިކްސް އެސޯސިއޭޝަން އޮފް މޯލްޑިވްސްއިން ކުރިއަށްގެންދިޔަ "ތިންވަނަ މައިލޯ ގައުމީ ގްރޯން ޕްރީ" އެތުލެޓިކްސް މުބާރާތުގެ އެންމެ މޮޅު އެތުލީޓުންގެ މަގާމު ރާއްޖޭގެ އެންމެ ބާރު ދުވުންތެރިޔާ ހަސަން ސާއިދާއި އާމިނަތު ޖާއިޝާ ޖުނީޒް ހޯދައިފިއެވެ.

މި މުބާރާތުގައި ކުރިއަށްގެންދިޔައީ ދުވުމުގެ 100 މީޓަރު، 200 މީޓަރު، 400 މީޓަރު، 800 މީޓަރު، 1500 މީޓަރު އަދި 3000 މީޓަރު ރޭހާއި ލޯންގް ޖަމްޕެވެ. ކޮންމެ އިވެންޓެއްގައި ދެ ޖިންސުން ވަކިވަކިން ރޭސްތައް ވަނީ ކުރިއަށް ގެންގޮސްފައެވެ. ހުކުރު ދުވަހާއި ހޮނިހިރު ދުވަހު ހުޅުމާލޭ ސިންތެޓިކް ޓްރެކުގައި ކުރިއަށްދިޔަ މި މުބާރާތުގެ އެންމެ މޮޅު އެތުލީޓުންގެ މަގާމު ސާއިދާއި ޖާއިޝާ ހޯދިއިރު، މިއީ މި ދެ އެތުލީޓިން ގްރޯން ޕްރީގެ އެއްވަނަ މަގާމު ހޯދި ފުރަތަމަ ފަހަރެވެ.

ގްރޯން ޕްރީގެ ފުރަތަމަ ދެ އަހަރު އެންމެ މޮޅު ފިރިހެން އެތުލީޓުގެ މަގާމު ހޯދި ހުސެއިން ފަޒީލް ހާރޫން މި ފަހަރު މި މުބާރާތުގައި ވާދައެއް ނުކުރެއެވެ. އެއާއެކު ސާއިދު ފުރަތަމަ ފަހަރަށް ގްރޯން ޕްރީގެ އެއްވަނަ އެތުލީޓުގެ މަގާމު ހޯދީ ތިން އިވެންޓުން ރަން މެޑަލް ހޯދައިގެންނެވެ. އެގޮތުން އޭނާ ވަނީ ހުކުރު ދުވަހު ކުރިއަށްދިޔަ ފިރިހެނުންގެ 100 މިޓަރު ދުވުން 10.76 ސިކުންތުން ނިންމައި ރަން މެޑަލް ހޯދާފައެވެ.

އަދި ހަމަ އެ ދުވަހު ކުރިއަށްދިޔަ ފިރިހެނުންގެ 400 މީޓަރުގެ ރޭސް ސާއިދު ކާމިޔާބުކުރީ 49.39 ސިކުންތުންނެވެ. އަދި ހޮނިހިރު ދުވަހު ސާއިދު ވަނީ 21.95 ސިކުންތުން ރޭސް ނިންމައިގެ 200 މީޓަރު ދުވުމުން ރަން މެޑަލް ހޯދާފައެވެ.

ދެން މި މުބާރާތުގެ އެންމެ މޮޅު އަންހެން އެތުލީޓުގެ މަގާމަށް ހޮވުނު ޖާއިޝާ ވަނީ މި މުބާރާތުގައި ގައުމީ ދެ ރިކޯޑެއް މުގުރާލާފައެވެ. އެގޮތުން ޖާއިޝާ ވަނީ މި މުބާރާތުގައި 5 މިނެޓު 05.63 ސިކުތުން ރޭސް ނިންމައިގެން 1500 މީޓަރު ދުވުމުގެ ރިކޯޑު އާކޮށްފައެވެ. އަދި ހޮނިހިރު ދުވަހު ޖާއިޝާ ވަނީ 3000 މީޓަރުގެ 16 އަހަރުވީ ރިކޯޑު 11 މިނެތު 15.18 ސިކުންތުން ރޭސް ނިންމައިގެން މުގުރާލާފައެވެ.

މި ފަހަރުގެ މުބާރާތުގައި ޖާއިޝާ ތިން ރަން މެޑަލް ހާސިލުކުރިއިރު، އޭނާ ވަނީ ހޮނިހިރު ދުވަހު ބޭއްވި 800 މީޓަރުގެ ދުވުމުންވެސް އެއްވަނަ ހޯދާފައެވެ. އެ ރޭސް ޖާއިޝާ ނިންމީ 30.30 ސިކުންތުންނެވެ.

މީގެ އިތުރުން ދެން މި މުބާރާތުގައި ކުރިއަށްދިޔަ ފިރިހެނުންގެ 800 މީޓަރުގެ ދުވުން ކާމިޔާބުކުރީ ސާއިދު ސްޕޯޓްސްގެ އަޙްމަދު ވިސާމެވެ. އޭނާ ރޭސް ނިންމީ 2 މިނެޓު 00.89 ސިކުންތުންނެވެ. އަދި 1،500 މީޓަރު ދުވުމުގެ އެއްވަނަ ދިވެހި ސިފައިންގެ ކުލަބުގެ ހުސެއިން ރިޒާ (ކުޑަ ރިޒާ) ހޯދީ 21.88 ސިކުންތުން ރޭސް ނިންމައިގެންނެވެ.