އެސްޓީއޯއިން 2022 ވަނަ އަހަރުގެ ކަލަންޑަރު އިފްތިތާހުކޮށްފި، ޚާއްސަކޮށްފައިވަނީ ބަހާއި އަދަބަށް
ކޮންމެ މަހަކުވެސް ސޯޝަލް މީޑިޔާ މެދުވެރިކޮށް އަދަބީ ބަސް ހެދުމަށް ހުޅުވާލާނެ
އެސްޓީއޯގެ ކަލަންޑަރު އިފްތިތާހުކުރުމަށް ބޭއްވި ހަފްލާގެ ތެރެއިން
ސްޓޭޓް ޓްރޭޑިންގ އޯގަނައިޒޭޝަން (އެސްޓީއޯ) އިން އަންނަ އަހަރަށް އުފައްދާފައިވާ ކަލަންޑަރު އިފްތިތާހުކޮށްފިއެވެ.
ކަލަންޑަރު އިފްތިތާހުކޮށްފައިވަނީ އެކަމަށްޓަކައި ބޭއްވި ކުޑަކުދިންގެ ހަވީރުގެ ތެރެއިންނެވެ. 2022 ވަނަ އަހަރުގެ ކަލަންޑަރު އެސްޓީއޯއިން ޚާއްސަކޮށްފައިވަނީ ދިވެހި ބަހަށެވެ. ކަލަންޑަރު އިފްތިތާހު ކޮށްދެއްވީ ދިވެހި ބަހުގެ އެކެޑަމީގެ ރައީސް ޑރ. އަޝްރަފް އަބްދުއްރަހީމެވެ. އެސްޓީއޯ އިން ދިވެހި ބަސް ދިރުވައި އާލާކުރުމުގެ ތަސައްވުރާއެކު ވަނީ ކުޑަކުދިންނަށް ޚާއްސަ އަދަބީ ބަސް އެކުލެވޭ ފޮތެއްވެސް ތައާރަފުކޮށްފައެވެ. މިފޮތް ނެެރެދެއްވީ ދިވެހި ބަހުގެ އެކެޑަމީގެ ރައީސް ޑރ. އަޝްރަފް އަބްދުއްރަހީމެވެ.
އެސްޓީއޯއިން ބުނީ އަންނަ އަހަރުގެ ކަލަންޑަރާއެކުވެސް އާންމުންނަށް ކަންތައްތަކެއް ހުޅުވާލާފައިވާކަމަށެވެ. އެގޮތުން ކޮންމެ މަހަކުވެސް ސޯޝަލް މީޑިޔާ މެދުވެރިކޮށް އަދަބީ ބަސް ހެދުމަށް ހުޅުވާލާނެކަމަށް އެސްޓީއޯއިން ބުނެއެވެ. އަދަބީ ބަސް ހެދުމަށްފަހު ފޮނުވާ ފަރާތްތަކުގެ މެދުގައި އިނާމު ލިބޭ މީހުން ކަނޑައަޅާއިރު ވަނަ ވަނައަށް އަންނަ މީހުންނަށް ވަރަށް ޚާއްސަ އިނާމުތަކެއް ދޭނެކަމަށް އެސްޓީއޯއިން ބުނެއެވެ.
އެސްޓީއޯއިން ކޮންމެ އަހަރެއްގެވެސް ކަލަންޑަރު ޚާއްސަކުރަނީ ވަކި ތީމަކަށެވެ. އެގޮތުން ހިނގަމުންދާ އަހަރުގެ ކަލަންޑަރު ޚާއްސަކޮށްފައިވަނީ ދިވެހި ދިރުމާއި އެސްޓީއޯއަށެވެ. މިތީމުގެ ދަށުން ރާއްޖޭގައި އުޅޭ ޖަނަވާރުތަކާއި މަސްމަހާމެއްސަށް ވަނީ ކަލަންޑަރު ޚާއްސަކޮށްފައެވެ. މިއަހަރުގެ ތީމާ ގުޅިގެންވެސް އާންމުންނަށް އެކި ހުށަހެޅުންތައް ހުށަހެޅުމުގެ ފުރުސަތު ހުޅުވާލިއެވެ. އެކަމަށް ގިނަ ބަޔެއްގެ ސަޕޯޓް ލިބުނުކަމަށް އެސްޓީއޯއިން ބުނެއެވެ.
