އިންޓަރނެޓްގެ ޒަރީއާއިން ރާއްޖޭގައި އެހެން ދީންތައް ފެތުރުމަށް ގެންގުޅޭ އެކި މީޑިއަމްތައް ބްލޮކް ކުރުމުގެ މަސައްކަތް އަދިވެސް ނުފެށޭކަމަށް ފުލުހުން ބުނެފިއެވެ.
އިންޓަރނެޓްގެ ޒަރީއާއިން ރާއްޖޭގައި އެހެން ދީންތައް ފެތުރުމަށް ގެންގުޅޭ އެކި މީޑިއަމްތައް ބްލޮކް ކުރުމަށް، މިދިޔަ ނޮވެމްބަރު މަހުގެ ފަހުކޮޅު ކްރިމިނަލް ކޯޓުން ވަނީ އަމުރެއް ނެރެފައެވެ. މި އަމުުރު ނެރުނުތާ ގިނަ ދުވަސްތަކެއް ވެފައިވާއިރު، އަދިވެސް މިފަދަ މީޑިއަމްތައް ބްލޮކް ކުރުމުގެ މަސައްކަތް ފަށާފައެއް ނުވެއެވެ.
މިކަމާ ގުޅިގެން ރާއްޖެ އެމްވީއަށް މައުލޫމާތުދެމުން ފުލުހުން ބުނީ، މިފަދަ މީޑިއަމްތައް ބްލޮކް ކުރުމުގެ މަސައްކަތް ނުފެށި ވަނީ، މިކަމާ ގުޅިގެން ކުރަންޖެހޭ ޓެކްނިކަލް މަސައްކަތްތަކެއް ކުރިއަށްދާތީ ކަމަށެވެ. މި މަސައްކަތްތައް ރާއްޖޭގައި މުވާސަލާތީ ޚިދުމަތް ފޯރުކޮށްދޭ ފަރާތްތަކާއި މިނިސްޓްރީގެ އިތުރުން، އައިސީޓީ ދާއިރާގެ މިނޫންވެސް ގިނަ ފަރާތްތަކަކާ ގުޅިގެން ކުރިއަށްދާކަމަށް ފުލުހުން ބުނެފައިވެއެވެ. އަދި މި އަމުރު ތަންފީޒުކުރުމަސް މުވާސަލާތީ ޚިދުމަތް ފޯރުކޮށްދޭ ފަރާތްތަކަށް ސިޓީއަކުން އަންގާފައިވާނެ ކަމަށްވެސް ފުލުހުން ބުނެފައިވެއެވެ.
މިކަމާ ގުޅުންހުރި ޓެކްނިކަލް މަސައްކަތްތަކެއް ކުރިއަށްދާތީ މި މަސައްކަތުގައި ލަސްތަކެއް ހުރިނަމަވެސް، މިކަން ތަންފީޒުކުރަން ފެށޭނީ ކިހާ ދުވަހަކުން ކަމެއް ބުނަން ދަތިކަމަށް ފުލުހުން ބުނެފައިވެއެވެ.
އިންޓަރނެޓްގެ ޒަރީއާއިން ރާއްޖޭގައި އެހެން ދީންތައް ފެތުރުމަށް ގެންގުޅޭ އެކި މީޑިއަމްތައް ބްލޮކް ކުރުމުގެ އަމުރެއް ކްރިމިނަލް ކޯޓުން ނެރެފައިވަނީ، މި މީޑިއަމްތައް ބޭނުންކޮށްގެން އިސްލާމް ދީން ފިޔަވައި އެހެން ދީންތައް ފެތުރުމުގެ މަސައްކަތް ކުރަމުންދާ ދަނޑިވަޅެއްގައެވެ. ފުލުހުން ވަނީ މިފަދަ ޕޭޖްތަކާއި، އެޕްލިކޭޝަންތައް އަދި ސޯޝަލް މީޑިއާ ޕްލެޓްފޯމްތައް މެދުވެރިކޮށްގެން ހިންގާ މިފަދަ އަމަލުތައް ތަހުގީގުކޮށްފައެވެ. އަދި އެ ކަން ކްރިމިނަލް ކޯޓަށް ހުށަހެޅުމުން އެ ކޯޓުން ވަނީ މިފަދަ އެކި މީޑިއަމްތައް ބްލޮކް ކުރުމުގެ އަމުރެއް ނެރެފައެވެ.
