މޫސުމަށް އަންނަ ބަދަލުތަކަށް ޙައްލު ގެނައުމަށް ތަރައްޤީވެފައިވާ ޤައުމުތަކުގެ އެހީ ބޭނުންވާ ކަމަށް މިނިސްޓަރ އޮފް ޓޫރިޒަމް ޑރ. ޢަބްދުﷲ މައުސޫމް ވިދާޅުވެއްޖެއެވެ.

ޔޫއޭއީގެ ރަސް އަލް-ޚައިމާގައި ކުރިއަށްގެންދިޔަ ގްލޯބަލް ސިޓިޒަން ފޯރަމްގައި ވާހަކަފުޅުދައްކަވަމުން މިނިސްޓަރ މައުސޫމް ވިދާޅުވީ ރާއްޖޭގެ ފަތުރުވެރި ކަމަށް ދިމާވެފައިވާ އެންމެ ބޮޑު އެއް ގޮންޖެހުމަކީ މޫސުމީ ބަދަލުތަކުގެ ސަބަބުން ލިބެމުންދާ ގެއްލުންތަކެވެ. މުޅި ދުނިޔެއަށްވެސް ކުރިމަތިވެފައިވާ އެންމެ ބޮޑު މައްސަލައަކީ ދުނިޔެ ހޫނުވުމުގެ މައްސަލަ ކަމަށާއި މޫސުމީ ބަދަލުތަކާ ދެކޮޅަށް މަސައްކަތް ކުރުމަށް ކުދި ޖަޒީރާ ޤައުމުތަކަށް ބޮޑެތި ޤައުމުތަކުގެ ފަންނީ އެހީ ބޭނުންވާ ކަމަށް ވެސް ވިދާޅުވިއެވެ.

މިފޯރަމްގައި މަޝްވަރާކުރެވުނު އިތުރު ދާއިރާތަކުގެ ތެރޭގައި ރިއަލް އެސްޓޭޓް ޓޫރިޒަމާއި ދަތުރު ފަތުރުކުރުމުގައި "ގްލޯބަލް ސިޓިޒަން" އަކަށްވުމުގެ ފަސޭހަތައް ހިމެނެއެވެ.

މި ސަރުކާރުން މޫސުމަށް އަންނަ ބަދަލުތަކުގެ މައްޗަށް ވަރަށް ގިނައިން އެކި ޕްލެޓްފޯމު ތަކުގައި ވާހަކަ ދައްކަމުންދެއެވެ. އެގޮތުން ކޮޕް26ގެ ހަވާސާގައި ޖަޒީރާ ރަށްރަށުގެ މޫސުން ދެނެގަތުމާ ގުޅޭގޮތުން މަޝްވަރާ ކުރުމަށް ބޭއްވި ވަށްމޭޒު ބައްދަލުވުމުގައި ދިވެހި ސަރުކާރުން ރައީސުލްޖުމްހޫރިއްޔާ އިބްރާހީމް މުޙައްމަދު ޞާލިޙު ވެސް ވަނީ ބައިވެރިވެވަޑައި ގެންފައެވެ.

މި ވަށްމޭޒު ބައްދަލުވުމުގެ ބައިވެރިން ވަނީ 1.5 ޑިގްރީ ސެލްސިއަސްއަށް ވާސިލުވުމަށް ކަނޑައަޅާފައިވާ ނިންމުމާ ގުޅޭގޮތުން މަޝްވަރާ ކުރައްވާފައެވެ. އެގޮތުން އެބޭފުޅުން ވަނީ އެ ލަނޑުދަނޑި ހާސިލުކުރުމަށް ބޭނުންވާ 'ކްލައިމެޓް ފައިނޭންސިންގ'އަށާއި، އެކަމަށް އަހައްމިއްޔަތުކަން ނުދެވިއްޖެނަމަ ކުރިމަތިވާނެ ގެއްލުންތަކަށާއި، އަދި އެކަމަށް އަހުލުވެރިވުމަށް ބޭނުންވާ އެހީތެރިކަމުގެ މައްޗަށް އަލިއަޅުއްވާ ލައްވާފައެވެ.

އަދި މި ބައްދަލުވުމުގެ ބައިވެރިން ވަނީ, ކުދި ޖަޒީރާ ރަށްތަކުން އެއްބައިވެ ހުށަހަޅަމުންދާ މައްސަލައަކީ މިހާރު އެއް މައްސަލައެއް ގޮތަށް ފާހަގަކުރައްވައި, އެކަން ހައްލުކުރުމަށް އުންމީދު އާކުރައްވައި ވާހަކަފުޅު ދައްކަވާފައެވެ. މީގެ އިތުރުން އެބޭފުޅުން ވަނީ ކޮޕް26ގެ ބައްދަލުވުމުގެ ތެރެއިން ހަމަޖެހިގެންދާނެ ކަމަށް ބެލެވޭ ކަންކަމާމެދުވެސް މަޝްވަރާ ކުރައްވާފައެވެ.