އިނގިރޭސިވިލާތުގައި އޮމިކްރޯން ވޭރިއަންޓް ޖެހިގެން އެކަކު މަރުވެފައިވާކަމަށް އެގައުމުގެ އޮފިޝަލުން ބުނެފިއެވެ.
ކޮވިޑް-19ގެ އައު ވޭރިއަންޓް ޖެހިގެން މީހަކު މަރުވެފައިވާކަން އެގައުމުން ހާމަކޮށްފައިވާއިރު ބޫސްޓަރ ޑޯޒް ޖެހުމަށް އިނގިރޭސި ސަރުކާރުން ގެންދަނީ ބާރު އަޅަމުންނެވެ. އެއާއެކު ގިނަ ބަޔަކު ވަނީ ވެކްސިން ސެންޓަރުތައް ކައިރީގައި ކިޔުތައް ހަދާފައެވެ.
ހޯމަ ދުވަހު ނޫސްވެރިންނާ ބައްދަލުކުރައްވާ ވާހަކަދައްކަވަމުން އިނގިރޭސި ބޮޑުވަޒީރު ބޮރިސް ޖޯންސަން ވަނީ އޮމިކްރޯން ވޭރިއަންޓް ޖެހިގެން އެކަކު މަރުވެފައިވާކަން ޔަގީންކޮށްދެއްވާފައެވެ. އެކަން އިއުލާންކުރައްވާ ވާހަކަދައްކަވަމުން ޖޯންސަން ވިދާޅުވީ މިވޭރިއަންޓް ޖެހިގެން ބޮޑުވަރުވާކަމަށް އަދި ނުފެންނަކަމަށެވެ.
އިނގިރޭސިވިލާތުން އެންމެ ފުރަތަމަ އޮމިކްރޯން ވޭރިއަންޓް ފެނިފައިވަނީ ނޮވެމްބަރ މަހުގެ 27 ވަނަ ދުވަހުއެވެ. އޭގެފަހުން ޖޯންސަން ވަނީ ވައިރަސް ފެތުރުން ކޮންޓްރޯލްކުރުމަށް ފިޔަވަޅުތައް ވަރުގަދަކުރައްވާފައެވެ. އަދި ކޮވިޑްގެ އިތުރު ރާޅެއް އަރާފާނެކަމަށް ބަލާ ވީހާވެސް ގިނަ ބަޔަކު ވެކްސިންގެ ތިން ވަނަ ޑޯޒެއް ޖެހުމަށް ވަނީ އެދިވަޑައިގަންނަވާފައެވެ.
އިނގިރޭސިވިލާތުގައި މިހާރު ކޮވިޑް ޖެހެމުންދާ ރޭޓަށް ބަލާއިރު ކޮންމެ ތިން ދުވަހަކުން ކޭސްތައް ފެންނަ މިންވަރު ދެގުނަ ވަމުން އަންނަ ކަމަށް އެގައުމުގެ ސިއްހީ އޮފިޝަލުން ބުނެއެވެ.
ކޮވިޑް-19 ޖެހިގެން މިހާތަނަށް އިނގިރޭސިވިލާތުގެ 146،000 މީހުން ވަނީ މަރުވެފައެވެ.
