އިސްރާއީލްގެ ބޮޑުވަޒީރު ޔޫއޭއީގެ ވަލީއަހުދާ ބައްދަލުކުރައްވައިފި
14 ޑިސެމްބަރު 2021 | އަންގާރަ 14:34މިއީ ޔޫއޭއީގެ އެންމެ އިސްވެރިއަކާ އިސްރާއީލްގެ ލީޑަރަކު އާންމުތަނެއްގައި ބައްދަލުކުރެއްވި ފުރަތަމަ ފަހަރު
ޔޫއޭއީގެ ވަލީއަހުދާއި އިސްރާއީލްގެ ބޮޑުވަޒީރު ބައްދަލުކުރެއްވުން
އިސްރާއީލްގެ ބޮޑުވަޒީރު ނަފްތާލީ ބެނެޓް މިހާރު ޔުނައިޓެޑް އަރަބް އެމިރޭޓްސް (ޔޫއޭއީ)އަށް ކުރައްވަމުން ގެންދަވާ ދަތުރުފުޅުގައި ޔޫއޭއީގެ ވަލީއަހުދު ޝައިޚް މުހައްމަދު ބިން ޒައިދް އަލް ނަހްޔާންއާ ބައްދަލުކުރައްވައިފިއެވެ.
މިއީ ތާރީޚުގައިވެސް، ޔޫއޭއީގެ އެންމެ އިސްވެރިއަކާ އިސްރާއީލްގެ ލީޑަރަކު އާންމުތަނެއްގައި ބައްދަލުކުރެއްވި ފުރަތަމަ ފަހަރެވެ. ބެނެޓް އަބޫދާބީގެ ވަލީއަހުދާ ބައްދަލުކުރައްވާފައިވަނީ ވަލީއަހުދުގެ އަމިއްލަ ޕެލަސްގައެވެ. ބެނެޓް ޔޫއޭއީއަށް ވަޑައިގެންނެވީ އާދިއްތަ ދުވަހުއެވެ.
ބެނެޓް ގަލްފު ގައުމުތަކަށް ކުރައްވާ މިދަތުރުފުޅު ފައްޓަވާފައި މިވަނީ, އިރާނުގެ ނިޔުކުލިއަރ ޕްރޮގްރާމާ ގުޅިގެން އީރާނާއި ޔޫރަޕްގެ ބޮޑު 3 ބާރުގެ މެދުގައި ވިއެނާގައި ވާހަކަތައް ކުރިޔަށްދަނިކޮށެވެ. ބެނެޓްގެ އޮފީހުން ބުނެފައިވަނީ، ބެނެޓާއީ ވަލީ އަހުދުގެ މި ބައްދަލުކުރެއްވުން ހަތަރު ގަޑިއިރަށް ދިގުދެމިގެން ދިޔަކަމަށެވެ.
ބައްދަލުކުރެއްވުމަށްފަހު ދެގައުމުން ނެރުނު ބަޔާނެއްގައި ބުނެފައިވަނީ މިއީ ދެގައުމުގެ ގުޅުން ބަދަހިކުރުމަށް އެޅުނު މުހިންމު ފިޔަވަޅެއްކަމަށެވެ. އަދި ގިނަ ދާއިރާތަކެއްގެ މައްޗަށް ދެގައުމުން މަޝްވަރާކޮށްފައިވާކަމަށް ބަޔާނުގައި ބުނެފައިވެއެވެ. އެގޮތުން މަޝްވަރާކުރި ދާއިރާތަކުގެ ތެރޭގައި ޓެކްނޮލޮޖީ، ތިމާވެށި، ފަތުރުވެރިކަން، އަދި ދެގައުމު ގުޅިގެން ރިސަރޗް އަދި ޑިވެލޮޕްމަންޓް ފަންޑެއް ހުޅުވުމާ ގުޅޭގޮތުން މަޝްވަރާކުރިކަމަށް ބަޔާނުގައި ބުނެފައިވެއެވެ. ދެގައުމުން މިހާރުވެސް ވަނީ ވިޔަފާރީގެ ދާއިރާއިން ގުޅުން ގާއިމުކޮށްފައެވެ.
ނަމަވެސް ބަޔާނުގައި އެންމެ ހައްސާސް ދެ މައްސަލައާ ގުޅޭގޮތުން އެއްވެސް ވާހަކައެއް ހިމަނާފައެއްނުވެއެވެ. އެގޮތުން އިސްރާއީލާއި ފަލަސްތީނުގެ ގުޅުމާއި، އިރާނުގެ ނިޔުކުލިއަރ ޕްރޮގްރާމާ ގުޅޭގޮތުން އެއްވެސް ވާހަކައެއް ބަޔާނުގައި ބުނެފައެއްނުވެއެވެ.
ޔޫއޭއީން ފުރާވަޑައިގަތުމުގެ ކުރިން ބެނެޓް ދެއްވި ވީޑިއޯ މެސެޖެއްގައި ވިދާޅުވީ، ސަރަހައްދީ އެކި ކަންކަމާ ގުޅޭގޮތުން ދެގައުމުގެ މެދުގައި ވަރަށް ފުޅާ ދާއިރާއެއްގައި ސީދާގޮތެއްގައި ވާހަކަތަކެއް ދެކެވިފައިވާކަމަށެވެ. އަދި އިސްރާއީލަށް އެނބުރި ވަޑައިގަންނަވަނީ މެދުއިރު މައްޗަށް ސުލްހަ ގެނައުމުގައި އިސްރާއީލާއި ޔޫއޭއީ ގުޅިގެން ކަންތައްތަކެއް ކުރެވޭނެކަމުގެ ވަރަށް ބޮޑު އުންމީދެއް އެބައޮތްކަމަށް ބެނެޓް ވިދާޅުވިއެވެ.
މީގެއިތުރުން ބެނެޓް ވަނީ، އިސްރާއީލަށް ވަޑައިގަތުމަށް ވަލީއަހުދަށް ދައުވަތު ދެއްވާފައެވެ. ވަލީއަހުދު ވަނީ މިދައުވަތު ގަބޫލުކުރައްވާފައެވެ. ނަމަވެސް ވަޑައިގަންނަވާނެ ތާރީޚެއް އަދި ހާމައެއް ނުކުރައްވައެވެ.
ބެނެޓްގެ މިދަތުރުފުޅަކީ އިސްރާއީލާއި ޔޫއޭއީގެ ގުޅުން ގާއިމުކުރިތާ އެއް އަހަރުފަހުން ކުރެއްވި ދަތުރުފުޅެކެވެ.
