އައްޑޫ އިކޯ ޓުއަރިޒަމް ޕްރޮޖެކްޓަށް އިންޑިއާއިންދޭ އެހީގެ 3 ވަނަ އިންސްޓޯލްމަންޓް ހަވާލުކޮށްފި

އިންޑިއާގެ ހިލޭ އެހީގެ ދަށުން އައްޑޫގައި ހިންގާ އީކޯ ޓުއަރިޒަމް ޕްރޮޖެކްޓަށް އެ ގައުމުން ދޭ ފައިސާގެ އެހީގެ 3 ވަނަ އިންސްޓޯލްމަންޓް ދިވެހި ސަރުކާރާ ހަވާލުކޮށްފި އެވެ.

ހޯމަ ދުވަހު ހަވާލު ކުރި ފައިސާގެ ޖުމްލަ އަދަދަކީ 11.4 މިލިއަން ދިވެހި ރުފިޔާއެވެ. މިފައިސާއަކީ އިކޯ ޓުއަރިޒަމްގެ 5 މަޝްރޫއެއް ހިންގަން އިންޑިއާއާއެކު, 2020 ފެބްރުއަރީ 2 ވަނަ ދުވަހު ވެވުނު އެއްބަސްވުމުގެ ދަށުން ފޯރުކޮށްދެވޭ އެހީއެކެވެ. މިމަޝްރޫއުގެ ދަށުން އިތުރު 2 އިންސްޓޯލްމެންޓެއްގެ ފައިސާ މީގެ ކުރިން އިންޑިއާއިންވަނީ ރާއްޖޭގެ ސަރުކާރާ ހަވާލުކޮށްފައެވެ. އެގޮތުން ޖުލައި 2020 އަދި މާރޗް 2021ގައި 11,496,095.75 ދިވެހި ރުފިޔާ ވަނީ ސަރުކާރާ ހަވާލުކުރެވިފައެވެ. މި މަޝްރޫއަށް މުޅިއެކު 49.2 މިލިއަން އެމެރިކާ ޑޮލަރު، އިންޑިއާގެ އެހީގެ ގޮތުގައި ހަމަޖައްސާފައިވެއެވެ.

Advertisement

އިކޯ ޓޫރިޒަމް މަޝްރޫއުތައް ހިންގަނީ އައްޑޫގެ ފޭދު، މަރަދޫ، ހިތަދޫ އަދި ހުޅުދޫގައެވެ.

މި ޕްރޮޖެކްޓުގެ ދަށުން އައްޑޫގެ 5 ސަރަހައްދެއްގެ މަގުތަކާއި ބީޗު ރީތިކުރުމުގެ މަސައްކަތް ކުރުމުގެ އިތުރުން، އެސަރަހައްދުތަކުން ދޫކޮށްފައިވާ 63 ބިމުގައި އަޅާ ސިޓީ ހޮޓަލާއި ގެސްޓްހައުސްގެ މަސައްކަތް ފަށަންވާއިރަށް އެ ސަރަހައްދުތަކުގެ މަގުތަކާއި ބީޗުތައް ހަދާނެކަމަށް އައްޑޫސިޓީ ކައުންސިލުން ވިދާޅުވެއެވެ. ސިޓީ ހޮޓާ އެޅުމަށް ބިން ހަވާލުކޮށް، އަދި އެސަރަހައްދުގެ މަގުހެދުމުގެ މަސައްކަތް، ނިމިގެންދިޔަ ކައުންސިލް ދައުރުގައިވަނީ ބަޔަކާ ހަވާލުކޮށްގެން ފަށާފައެވެ.  

އިންޑިއާގެ ހިލޭ އެހީގެ ދަށުން ހިންގާ އިކޯޓޫރިޒަމް ޕްރޮޖެކްޓުގެ އިތުރުން އައްޑޫގައި ދަނީ އިންޑިއާގެ އެހީގައި ގޭދޮށު މަސްޕްލާންޓްވެސް ގާއިމް ކުރަމުންނެވެ. އިންޑިއާ ސަރުކާރުގެ ހައި އިމްޕެކްޓް ކޮމިއުނިޓީ ޑިވެލޮޕްމަންޓް ޕްރޮޖްކްސް (އެޗްއައިސީޑީޕީ)އިން ހިންގާ މި މަޝްރޫއުގެ ދަށުން، އައްޑޫގައި ގޭދޮށު މަސްޕްލާންޓްތައް ގާއިމުކުރަން ހަމަޖެހިފައިވަނީ ހިތަދޫއާއި ހުޅުމީދޫއާއި މަރަދޫގައެވެ. ގޭދޮށު މަސްޕްލާންޓްތަކުގެ މަސައްކަތްވަނީ ކޮންޓްރެކްޓް އުސޫލުން ކުންފުނިތަކާ ހަވާލުވެސްކޮށްފައެވެ. އައްޑޫ ހުޅުމީދޫގައި ގާއިމްކުރާ ގޭދޮށު މަސް ޕްލާންޓުގެ މަސައްކަތް ހަވާލުކޮށްފައިވަނީ "މެކޯ ޕްރައިވެޓް ލިމިޓެޑާ"އެވެ. މަރަދޫ ޕްލާންޓުގެ މަސައްކަތް ހަވާލުކޮށްފައިވަނީ "ޓްރައިންޑް ޕްރައިވެޓް ލިމިޓެޑާ"އެވެ. އަދި ހިތަދޫގައި މަސް ޕްލާންޓް ހެދުމަށް ހަވާލުވެފައިވަނީ "އެލްނާތު މޯލްޑިވްސް"އާއެވެ.

ހައި އިމްޕެކްޓް މަޝްރޫތައް ހިންގުމަށް އިންޑިއާގެ ސަރުކާރުން 2019ގައި ވަނީ ރާއްޖެއަށް 85 މިލިއަން ރުފިޔާގެ އެހީ ދީފައެވެ. އޭގެ ފަހުން އެ އަދަދުވަނީ 155 މިލިއަން ރުފިޔާއަށް އިތުރުކޮށްފައެވެ.

ހައި އިމްޕެކްޓް ކޮމިއުނިޓީ ޑިވެލޮޕްމަންޓް ޕްރޮޖެކްޓްގެ އެމްއޯޔޫގެ ދަށުން މިހާރު ވެސް 12 މަޝްރޫއެއް ރާއްޖޭގައި ކުރިއަށް ގެންދެއެވެ. އެއީ އައްޑޫ ސިޓީގެ ހިތަދޫ، މަރަދޫ އަދި ހުޅުދޫއާއި، ނ. ކެނދިކުޅުދޫގައި ގޭދޮށު މަސް ޕްލާންޓް ގާއިމުކުރުމަށް ހިންގާ މަޝްރޫއުތަކާއި، އައްޑޫ ސިޓީގެ ހިތަދޫ، ފޭދޫ، މަރަދޫ، މީދޫ އަދި ހުޅުދޫގައި ޓޫރިޒަމްގެ ޒޯނުތައް ތަރައްގީ ކުރުމަށް ހިންގާ މަޝްރޫއުތަކާއި، ހަނިމާދޫގައި ހިންގާ ދަނޑުވެރިކަމުގެ މަޝްރޫއާއި ހަނިމާދޫގައި ގާއިމްކުރެވިފައިވާ އެގްރިކަލްޗަރަލް ރިސާޗް ސެންޓަރގައި ސޮއިލް ޓެސްޓިންގ ލެބްއެއް ގާއިމްކުރުމާއި، އައްޑޫ ހުޅުދޫގައި ޑްރަގް ޑީޓޮކްސިފިކޭޝަން ސެންޓަރެއް ގާއިމުކުރުމަށް ހިންގާ މަޝްރޫއުގެ އިތުރުން، ހއ. ހޯރަފުށީގައި ހަދާ، ބިއްލޫރި ފުޅީގައި ފެން ބަންދުކުރާ ޕްލާންޓްގެ މަސައްކަތެވެ.

"ހައި އިމްޕެކްޓް ކޮމިއުނިޓީ ޑިވެލޮޕްމެންޓް" މަޝްރޫއުތަކަކީ އަވަށްޓެރި ގައުމުތަކާއި އިންޑިއާއާ ދެމެދުގައިވާ ގުޅުން ބަދަހިކޮށް، އިންޑިއާގެ ތަޖުރިބާ ހިއްސާކުރުމުގެ މަގްސަދުގައި ހިންގޭ މަޝްރޫއުތަކެކެވެ. މިގޮތުން، ނެއިބަރހުޑް ޕޮލިސީގެ ދަށުން މިފަދަ ކަންކަމުގައި ރާއްޖެއަށް އެހީ ފޯރުކޮށްދީ ތަޖުރިބާ ހިއްސާ ކުރުމަކީ އިންޑިއާއަށް ލިބިގެންދާ އުފަލެއްކަމަށް އެގައުމުން ދެކެއެވެ.