ބީއެސްއޭ ވޭވް އެލްމިނިއަމް ފުޓްސަލް ޗެލެންޖުގެ ޗެމްޕިއަންކަން އޭސީއެންއަށް

ބީއެސްއޭ ވޭވް އެލްމިނިއަމް ފުޓްސަލް ޗެލެންޖުގެ 2021 ޗެންޕިއަންކަން އޭސީއެންއިން ހޯދައިފިއެވެ.

މި މުބާރާތުގެ ޗެންޕިއަންކަން އޭސީއެންއިން ހޯދީ ބުރާސްފަތި ދުވަހުގެރޭ ކުޅުނު ފައިނަލް މެޗުގައި ޒިގްޒެގްއާއި ވާދަކޮށް ޕެނަލްޓީގައި 4-3 ގެ ނަތީޖާއަކުން މޮޅުވެގެންނެވެ. ފައިނަލް މެޗުގެ ފުރިހަމަ ވަގުތު ހަމަވިއިރު ދެ ޓީމުން ކުރެ އެއްވެސް ޓީމަކަށް ލަނޑެއް ނުޖެހެއެވެ. އެހެންކަމުން ނަތީޖާ ނެރުމަށް ޕެނަލްޓީ ޖެހިއިރު، ޕެނަލްޓީގައި އޭސީއެން ވަނީ ކުރިހޯދާފައެވެ.

ފައިނަލު މެޗުގެ އެންމެ މޮޅު ކުޅުންތެރިޔަކަށް ހޮވުނީ އޭސީއެންގެ ގޯލްކީޕަރު މާހީ އަބްދުﷲ އެވެ. އަދޮ އޭސީއެންގެ ތިން ކުޅުންތެރިއަކު ވަނީ އެންމެ މޮޅު ފަސް ކުޅުންތެރިންގެ ތެރޭގައި ހިމެނިފައެވެ. އަދި މި މުބާރާތުގެ ފުޓްސަލް ކިންގަކަށް ހޮވިފައިވަނީ އޭސީއެންގެ އަޙަމަދު ދާއޫދެވެ.

މުބާރާތުގެ ޗެމްޕިއަން ޓީމަށް 10،000 ރުފިޔާގެ އިނާމުގެ އިތުރުން މިލްކުވާ ތައްޓާއި ރަން މެޑަލް ދީފައިވާއިރު، ރަނަރަޕް ޓީމަށް ރިހި މެޑަލުގެ އިތުރުން 3،000 ރުފިޔާ ދީފައިވެއެވެ. ނިމުނު ނޮވެމްބަރު މަހުގެ 28 ވަނަ ދުވަހު ފެށި މި މުބާރާތުގައި 16 ޓީމެއް ވަނީ ވާދަކޮށްފައެވެ.