ފުޓްބޯލް އެސޯސިއޭޝަން އޮފް މޯލްޑިވްސް (އެފްއޭއެމް) އިން އިންތިޒާމުކޮށްގެން ކުރިއަށް ގެންދާ ފުރަތަމަ ވިމެންސް ފުޓްސަލް މުބާރާތް ފަށައިފިއެވެ.

މި މަހުގެ ނުވަ އިން 20 އަށް، ޖުމްލަ ނުވަ ޓީމާ އެކު ފަށާފައިވާ މި މުބާރާތަކީ، އަންހެން ބޭކަނބަލުންނަށް  އަމާޒުކޮށްގެން އެފްއޭއެމްއިން ބާއްވާ ފުރަތަމަ ފުޓްސަލް މުބާރާތެވެ. އާދީއްތަ ދުވަހުގެ ރޭ އެފްއޭއެމްގެ 1 ނަމްބަރު ޓާފް ދަނޑުގައި ފެށި މި މުބާރާތުގައި މިހާތަނަށް ދެ މެޗު ކުޅެފައި ވާއިރު، ފުރަތަމަ މެޗުގައި އެމްއެންޔޫގެ މައްޗަށް ދިވެހި ސިފައިންގެ ކްލަބުން ވަނީ ތަފާތު ބޮޑު ނަތީޖާއަކުން ކުރިހޯދާފައެވެ.

ސިފައިންގެ ކްލަބުން އެމްއެންޔޫގެ މައްޗަށް ކުރިހޯދީ 25-0 އިންނެވެ. މެޗުގެ މޮޅު ކުޅުންތެރިއަކަށް ހޮވުނީ ސިފައިންގެ ކުލަބުގެ ޖާސީ ނަމްބަރު 8 މަރިޔަމް ރިފާއެވެ.

ދެވަނަ މެޗުގައި އެމްޕީއެލްއިން ޕޮލިސް ކުލަބުގެ މައްޗަށް ކުރިހޯދީ 7-2 ގެ ނަތީޖާއަކުންނެވެ. އެ މެޗުގެ މޮޅު ކުޅުންތެރިއަކަށް ހޮވުނީ އެމްޕީއެލްގެ ޖާސީ ނަމްބަރު 10 އައިމިނަތު ޝާމިލާ އެވެ.

ދެ ގުރޫޕަކަށް ބަހާލައިގެން ކުރިއަށް ގެންދާ މި މުބާރާތުގެ ގުރޫޕު 1 ގައި ފަސް ޓީމު ވާދަކުރާއިރު ގުރޫޕް 2 ގައި ހަތަރު ޓީމު ވާދަކުރެއެވެ. ގުރޫޕް 1 ގައި ހިމެނެނީ ދިވެހި ސިފައިންގެ ކްލަބާއި، އެމްޕީއެލް އާއި، ޕޮލިސް ކްލަބުގެ އިތުރުން، ސްޓެލްކޯ ރެކްރިއޭޝަން ކްލަބް އަދި އެމްއެންޔޫ އެސްސީ އެވެ. ގުރޫޕް 2 ގައި ހިމެނެނީ ޒެނިތު ސްޕޯޓްސް ކުލަބާއި، އިކުއަޓޯރިއަލް އާއި، ޓީރެކްސް ސްޕޯޓްސް އެކަޑަމީ އަދި އަވާ އެފްޓީއެވެ.

ވިމެންސް ފުޓްސަލް ކުރިއެރުވުމަށް ހާއްސަ އިސްކަމެއް ދީގެން އެފްއޭއެމުން ކުރިއަށްގެންދާ މި މުބާރާތުގައި، ގައުމީ އަންހެން ފުޓުބޯޅަ ޓީމަށް ނިސްބަތްވާ އެއްވެސް ކުޅުންތެރިއަކަށް ނުކުޅެވޭނެއެވެ. މީގެ އިތުރުން ބިދޭސީ އެއްވެސް ކުޅުންތެރިއަކަށްވެސް މި މުބާރާތުގައި ނުކުޅެވޭނެއެވެ.