ސިއްޙީ ނިޒާމު ފުޅާކޮށް ބަލިތައް ދެނެގަތުމަށް ދުނިޔޭގެ ކުރިއަރާފައިވާގައުމުތަކާ ފައި ހަމަ ކުރުމަށް ރާއްޖެއިންވެސް އަންނަނީ މަސައްކަތްތަކެއް ކުރަމުންނެވެ. އެގޮތުން ދުނިޔޭގެ ކުރިއަރާފައިވާ ގައުމު ތަކުގައި ދެމުން އަންނަ ފަރުވާތަކާއި، އެ ފަރުވާ ދިނުމުގެ ކުރިން ބަލި ދެނެގަތުމަށްޓަކައި ހަދަން ޖެހޭ ޓެސްޓްތައް ރާއްޖެއިން ހެދޭނެ އިންތިޒާމްތައް ހަމަޖެއްސުމަކީ ސަރުކާރާއި، ސިއްޙީ ޚިދުމަތްދޭ އެހެން ފަރާތްތަކުންވެސް ކުރަމުން އަންނަ މަސައްކަތެވެ.
ކޮވިޑް-19ގެ ބަލިމަޑުކަމާއެކު ކުރިން ރާއްޖެއިން ލިބެން ނެތް ޚިދުމަތްތައް ތައާރަފް ކުރެވި، އެ ޚިދުމަތައް ތައާރަފްކުރުމަށް މުޅި ސިއްޙީ ދާއިރާ އަތުކުރި އޮޅާލިއެވެ. އެ ބަލި ދެނެގަނެ އެއަށް ފަރުވާ ކުރުމަށް ބޭނުންވާ ވަސީލަތްތައް ކުރިން އެއްވެސް ވަރަކަށް ރާއްޖޭގައި ނެތް އިރު އެ ހުރިހާ ވަސީލަތްތަކެއް ސަރުކާރާއި އަމިއްލަ ފަރާތްތަކުން ގާއިމް ކުރީ މަދު ދުވަސްކޮޅެއްގެ ތެރޭގައެވެ. އެންމެ އާދައިގެ ޕީސީއާރް ޓެސްޓުވެސް ފުރަތަމަ ހަދަން ފެށީ ރާއްޖެއިން ބޭރަށް ސާމްޕަލްތައް ފޮނުވައިގެންނެވެ. އެހެން ނަަވެސް މިހާރު ރާއްޖޭގެ އެކި ސަރަހައްދުތަކުން މި ޓެސްޓްވެސް ހެދެއެވެ.
މި ބަލީގެ ވޭރިއަންޓްތައް ފެތުރެން ފެށުމާއެކު އެ ވޭރިއަންޓްތައް ރާއްޖޭގައި އުޅޭ މިންވަރު ދެނެގަތުމަށްޓަކައި ހަދާ ޖީނޯމިން ސީކުއެންސިން ހަދަމުން މިހާރުވެސް އަންނަނީ އިންޑިއާއަށް ސާމްޕަލްތައް ފޮނުވައިގެންނެވެ. މިކަމަށް ގިނަ ވަގުތުތަކަކާއި، ޚަރަދުތަކެއްވެސް ހިނގައެވެ. އެހެންނަަމަވެސް މިދިޔަ ހަފްތާގައި އިވިގެން ދިޔައީ، ރާއްޖެއިން މިހާރު މި ޓެސްޓް ހެދުމަށްވެސް ތައްޔާރުވި ވާހަކައެވެ. އަމިއްލަ ލެބޯޓްރީއެއް ކަމަށްވާ މެޑިފްލެކްސްއިން މިކަމަށްޓަކައި މިހާރުވަނީ ފުރިހަމައަށް ތައްޔާރުވެފައެވެ.
ޖީނޯމިކް ސީކުއެންސިންގ ހެދުމަށްޓަކައި އެކަމަށް ޚާއްސަ ލެބޯޓްރީއެއް ގާއިމްކޮށް އެތަނަށް ބޭނުންވާ މެޝިންތައް ގެނެސް މިހާރުވަނީ ފުރިހަމައަށް ތައްޔާރުވެފައެވެ. ޖީނޯމިކް ސީކުއެންސިންއަށް ދުނިޔޭގައި އެއްވަނަ ބްރޭންޑް އިލުމިނާސްގެ މެޝިންތައް ގެނެސް އެ ކުންފުނީގެ ޓީމަކުން މިހާރުވަނީ މެޑިފްލެކްސްގެ ލެބޯޓްރީ ހުރީ އެކަމަށް ތައްޔާރަށް ކަމަށް ބުނެފައެވެ. މިހާރު ދެން އޮތީ ބޭނުންވާ ރަސްމީ ހުއްދަ ހެލްތް މިނިސްޓްރީން ލިބުމެވެ. އެ ހުއްދައަށް މެޑިފްލެކްސްއިންވަނީ ޑިސެމްބަރު މަހުގެ 4ވަނަ ދުވަހު އެދިފައެވެ.
މެޑިފްލެކްސް ލެބޯޓްރީގެ ސީނިއަރ ކޮންސަލްޓެންޓް އަދިލެބް ޑިރެކްޓަރ ޝަހީދު މުހައްމަދު ރާއްޖެއެމްވިއަށް ވިދާޅުވީ، އަލަށް ރާއްޖޭގައި މިކަން ފަށާއިރު، އޮގަސްޓް މަހުން ފެށިގެން މިކަމަށް ތައްޔާރުވަމުން އައި ކަމަށެވެ. މިދިޔަހަފްތާގައި މިކަަމަށް ބޭނުންވާ މުވައްޒަފުންވެސް ތަމްރީންކޮށް ނިމިފައިވާ ކަމަށެވެ. އެގޮތުން އެންމެ ފުރަތަމަ ބެޗްގައި 6 ލެބް ޓެކްނީޝަނުން މިކަމަށް ޚާއްސަކޮށް މިހާރު ތަމްރީނު ދީފައިވާ ކަމަށެވެ.
މެޑިފްލެސްއިން މި ޚިދުމަތް ދިނުމަށް ތައްޔާރުވާން ފެށީ، މިއީ ރާއްޖެއަށް މުހިއްމު ޚިދުމަތެއް ކަމަށް ފެންނާތި ކަމަށް ޝަހީދު ވިދާޅުވިއެވެ. ޖީން ސީކުއެންސިންގެ ނަތީޖާ 48 ގަޑިއިރުތެރޭގައި ރާއްޖެއިން ލިބެންހުރުމަކީ މިކަމަށް މިހާރު ހޭދަކުރަންޖެހޭ ވަގުތު މަދުވެ، ކުރަންޖެހޭ ޚަރަދުވެސް ކުޑަވެގެންދާނެ ކަމެއް ކަމަށް ޝަހީދު ވިދާޅުވިއެވެ. ރާއްޖޭގެ ސިއްޙީ ދާއިރާގައި މުޅިން އައު ހަރުފަތަކަށް އަރާއިރު، މެޑިފްލެކްސްއިން މިކަން ތައާރަފް ކުރެވުމަކީ އެކަމަށްޓައި އެ ޓީމުން ފަޚުރުވެރިވާ ކަަމެއް ކަމުގައި ޝަހީދު ފާހަގަކުރެއްވިއެވެ.
ޖީން ސީކުއެންސްއިން އެ މީހެއްގެ ގައިގައި ހުރި މުޅިން އައު ކަންކަން ފެނިގެންދާއިރު، މިއީ ކޮވިޑް ނޫން ބަލިތަކަށްވެސް މުހިއްމު ޓެސްޓެކެވެ. ބަލީގެ އަލާމާތްތައް ބޭރު ފުށުން ފެނުމުގެ ކުރިން ބަލި ދެނެގަނެ އެއަށް ފަރުވާ ދިނުމަށް ފެށިގެންދާނެއެވެ. އަދި ކުއްޖާ އުފަން ވުމުގެ ކުރިންވެސް ކުއްޖާގެ ހުރި ބަލިތައް ދެނެގަނެވޭނެއެެވެ.
