\'\'ހުއްދަ އަށް އެދުނީ އުއްމީދު ކަނޑާލުމުން، ހުއްދަ ދިނީ ނިޔާވި ފަހުން\'\'

އައްޑޫ ސިޓީ ހިތަދޫގައި, މަރުބަލީ ގައި އޮތް މަންމައެއް ގާތަށް ޒިޔާރަތް ކުރަން ހެލްތް ޕްރޮޓެކްޝަން އެޖެންސީ (އެޗްޕީއޭ) ގެ ހުއްދަ އެދުމުން ހުއްދަ ދިނުން ލަސްވި މައްސަލައެއް ރައްޔިތުންގެ މަޖިލީހުގެ ސަމާލުކަމަށް ގެނައުމަށް ނިންމައިފި އެވެ.

އައްޑޫ ސިޓީ ހުޅުދޫ އަށް ނިސްބަތްވާ މުހައްމަދު ރާމިޒްގެ މަންމަ އަކީ މީގެ ކުރިން ސްޓްރޯކެއް ޖެހިގެން ފަރުވާ ހޯދަމުން ދިޔަ މީހެކެވެ. އުމުރުން 88 އަހަރުގެ ރާމިޒްގެ މަންމަގެ ހާލު، ނިމިގެންދިޔަ ރޯދަ މަހުގެ ފަހު ދިހައިގެ ތެރޭގައި ގޯސްވެގެން ހިތަދޫ ރީޖަނަލް ހޮސްޕިޓަލުގައި ވެންޓިލޭޓަރުގެ އެހީގައި ފަރުވާ ދިނެވެ. ވެންޓިލޭޓަރުން ނެގުމަށް ފަހު ވޯޑުގައި ފަރުވާދެމުން ދަނިކޮށް އަނެއްކާވެސް އޭނާގެ މަންމަގެ ހާލު ކުއްލި އަކަށް ގޯސްވެ ޑޮކްޓަރުން އުއްމީދު ކަނޑާލި އެވެ.

މާލޭގައި ދިރިއުޅެމުންދާ ރާމިޒް އޭނާގެ ކޮއްކޮ އާއި އެކު، މަންމަ ގާތަށް ޒިޔާރަތް ކުރަން އެދި ޖޫން މަހުގެ ތިން ވަނަ ދުވަހު އެޗްޕީއޭ އަށް މެއިލް އެއް ފޮނުވި އެވެ. ރާމިޒްގެ އުދާސްތައް ޓްވިޓަރ އަށް ބަންޑުންކޮށްލީ އެޗްޕީއޭއިން އިން އެ މެއިލް އަށް ދިން ޖަވާބާއި އެކު އެވެ.

ހަމަ އެ ދުވަހުގެ ހަވީރު އެޗްްޕީއޭގެ ލީގަލް ޓީމުން ފޮނުވާފައިވާ މެއިލް ގައި ބުނެފައިވަނީ މާލެއިން ކޮމިއުނިޓީ ސްޕްރެޑެއް ފެނި ކޮވިޑް-19 އިތުރަށް ފެތުރެމުންދާތީވެ އެއް ރަށުން އަނެއް ރަށަށް ދަތުރުކުރުން މަނާކޮށްފައިވާ މި ދަނޑިވަޅުގައި ދަތުރުކުރުމުގެ ހުއްދަ ދެވެން ނެތް ކަމަށެވެ.

އެޗްޕީއޭއިން ދިން ޖަވާބުގައި އެންމެ ތަފްސީލުކޮށް މައުލޫމާތު ހިމަނާފައި ނުވާތީވެ ރާމިޒް ވަނީ ޑިރެކްޓަރ ޖެނެރަލް އޮފް ޕަބްލިކް ހެލްތް މައިމޫނާ އަބޫބަކުރަށް އެޑްރެސްކޮށް އިތުރު ސިޓީއެއް ފޮނުވާފަ އެވެ.

ސިޓީގެ ޖަވާބުގެ ބަދަލުގައި ރާމިޒް ބުނި ގޮތުގައި ގުޅުއްވީ އެޗްޕީއޭގެ ބޭފުޅެކެވެ. ލިޔުމަކުން ސަބަބު ބަޔާންކޮށްދިނުމަށް އެދުމުން އެ ބޭފުޅާ އެކަމަށް އުޒުރުވެރިވި ކަމަށް ރާއްޖެއެމްވީއާ ވާހަކަ ދައްކަމުން ރާމިޒް ބުންޏެވެ.

މަަރުބަލީގައި އޮތް މަންމަ ދެކިލަން ނުދެވި ހުއްޓާ ބުރާސްފަތި ދުވަހުގެރޭގެ ވަގުތެއްގައި އޭނާގެ މަންމަ ވަނީ ނިޔާވެފަ އެވެ. ހުއްދަ ދެވުން ލަސްވި ކަމަށްޓަކައި މާފަށް އެދެމުން މަންމަގެ މޫނު ބަލަން އައްޑޫ އަށް ދިޔުމުގެ ހުއްދަ އެޗްޕީއޭއިން ވަނީ މެއިލަކުން ދީފަ އެވެ.

ރާމިޒް ސިފަކުރާ ގޮތުން އެޗްޕީއޭއިން އަމަލުކޮށްފައިވަނީ ވަރަށް ރަހުމްކުޑަ ގޮތަކަށެވެ. އޭނާ ބުނީ، މަންމައާ އެކު އެއް ވޯޑެއްގައި އޮތް އެހެން މީހަކަށް ދިޔުމުގެ ފުރުސަތު ލިބުނުއިރުވެސް މާލޭގައި ތިބި ރާމިޒްގެ އާއިލާގެ މީހުންނަށް އެ ހުއްދަ އެއް ނުދިނެވެ.

މި މައްސަލައާ ގުޅިގެން ރާއްޖެއެމްވީން ގުޅާލުމުން ޑިރެކްޓަރ ޖެނެރަލް އޮފް ޕަބްލިކް ހެލްތް ވިދާޅުވީ، އެކަން ހިނގައި ދިޔަގޮތް ބެލުމަށް ފަހު ޖަވާބެއް ދެއްވާނެ ކަމަށެވެ. ރާމިޒްގެ އާއިލާ އަށް ހުއްދަ ލިބުން ލަސްވި ސަބަބު ހޯދަން، ރައްޔިތުންގެ މަޖިލީހުގެ ރައީސް އަށް ހޮނިހިރު ދުވަހު ހުށައަޅާނެ ކަމަށް އެ އާއިލާއިން ވަނީ ބުނެފަ އެވެ.