ބޫސްޓަރ ޑޯޒް ޖެހި މީހުންގެ އަދަދު 15000ށް
ވެކްސިންގެ ދެވަނަ ޑޯޒް ޖެހި މީހުންގެ އަދަދު ވަނީ 364،520ށް އަރާފައި
ވެކްސިން ޖެހުމުގެ ގައުމީ ކެމްޕޭންގެ ތެރެއިން ޓްރީ ޓޮޕް ހޮސްޕިޓަލުގައި ވެކްސިން ދިނުމުގެ މަސައްކަތް ކުރިއަށް ދަނީ
ކޮވިޑް-19ން ދިފާއުވުމަށް ބޫސްޓަރ ޑޯޒް ޖެހި މީހުންގެ އަދަދު 15،416ށް އަރައިފިއެވެ.
ހެލްތް ޕްރޮޓެކްޝަން އެޖެންސީ (އެޗްޕީއޭ) އިން އާންމުކޮށްފައިވާ މައުލޫމާތައް ދައްކާގޮތުން، ހޮނިހިރު ދުވަހު އިތުރު 1443 މީހަކު ވަނީ ބޫސްޓަރ ޑޯޒް ޖަހާފައެވެ. އެއީ މާލެ ސަރަހައްދުން ވެކްސިން ޖެހި 165 މީހުންނާއި، އަތޮޅު ތެރެއިން ވެކްސިން ޖެހި 1278 މީހުންނެވެ. މިއާއެކު ބޫސްޓަރ ޑޯޒް ޖެހި މީހުންގެ އަދަދު ވަނީ 15،416ށް އަރާފައެވެ.
މީގެ އިތުރުން ހޮނިހިރު ދުވަހު 118 މީހުން ވަނީ ވެކްސިންގެ ދެވަނަ ޑޯޒް ޖަހާފައެވެ. އެއީ މާލެ ސަރަހައްދުން ވެކްސިންގެ ދެވަނަ ޑޯޒް ޖެހި 46 މީހުންނާއި، ރަށްރަށުން ވެކްސިން ޖެހި 72 މީހުންނެވެ. މިއާއެކު ވެކްސިންގެ ދެވަނަ ޑޯޒް ޖެހި މީހުންގެ އަދަދު ވަނީ 364،520ށް އަރާފައެވެ.
މީގެ އިތުރުން ވެކްސިން އަލަށް 28 މީހަކު ވަނީ ޖަހާފައެވެ. އެއީ މާލެ ސަރަހައްދުން ވެކްސިން ޖެހި 15 މީހުންނާއި އަތޮޅު ތެރެއިން ވެކްސިން ޖެހި 13 މީހުންނެވެ. މިހާތަނަށް ރާއްޖެއިން ވެކްސިންގެ ފުރަތަމަ ޑޯޒް ޖެހި މީހުންގެ އަދަދު ވަނީ 395،907ށް އަރާފައެވެ.
ރާއްޖޭގައި ބޫސްޓަރ ޑޯޒް 50 އަހަރުން މަތީގެ މީހުންނަށް ޖަހަން ފަށާފައިވާއިރު، ބޮޑެތި ބަލިތައް ތަހައްމަލުކުރަމުން އަންނަ ފަރާތްތަކާއި ދާއިމީ ބަލިތަކަށް ފަރުވާ ހޯދަމުން އަންނަ ފަރާތްތަކަށް އަންނަނީ ވެކްސިންގެ ބޫސްޓަރ ޑޯޒް ޖަހަމުންނެވެ.
