130 ކިލޯގެ ޑްރަގް މައްސަލަ: ދެން އޮތީ އިސްކޮށް އުޅުނު ކަމުގެ ތުހުމަތުވާ ދެމީހުން ދިފާއީ ހެކި ހުށައެޅުން
މައްސަލައިގެ ބަންދު މުރާޖައާ ފޯމު ލިބިފައިނުވާކަމަށް ދިފާއީ ވަކީލުން ވިދާޅުވި
ކަނޑުމަގުން ރާއްޖެއަށް އެތެރެކުރި 130 ކިލޯގެ މަސްތުވާތަކެތީގެ މައްސަލާގައި އިސްކޮށް އުޅުނު ކަމުގެ ތުހުމަތުވާ 2 މީހުން
ދިވެހިންގެ ބަޔަކު ބޭރު ބަޔަކާ ގުޅިގެން ރާއްޖެއަށް އެތެެރެކުރި ކަމަށް ތުހުމަތު ކުރެވޭ 130 ކިލޯގެ މަސްތުވާތަކެތީގެ މައްސަލަައިގައި ދައުލަތުން ދައުވާކޮށްފައިވާ މީހުންގެ ތެރެއިން މި މައްސަލައިގައި އިސްކޮށް އުޅުނު ކަމުގެ ތުހުމަތުވާ 2 މީހުން ދިފާއީ ހެކި ހާމަ ކުރުން އަންނަ ޖެނުއަރީ މަހަށް ތާވަލު ކޮށްފިއެވެ.
ފުލުހުން ބުނެފައިވާ ގޮތުގައި، މިތަކެތި ރާއްޖެއަށް އެތެރެކުރުމުގައި އިސްކޮށް ތިބީ ގއ. ވިލިނގިލި، ލައިޓްހައުސް، ޝަހީބް އިބްރާހިމް (42އ) އާއި ހއ. ހޯރަފުށި، ވައިލެޓްވިލާ، އަހްމަދު މޫސާ (48އ) އެވެ.
އެދެމީހުންގެ މައްޗަށް އުުފުލާފައިވާ ދައުވާތަކާ ގުޅޭ އަޑުއެހުމެއް އާދިއްތަ ދުވަހު ކްރިމިނަލް ކޯޓުގައި ކުރިއަށް ގެންގޮސްފައިވާއިރު، ދައުލަތުން ވަނީ އެމީހުންގެ މައްޗަށް ކުށް ސާބިތު ކުރުމަށް ހެކި ހުށައަޅާފައެވެ. އަދި ދިފާއީ ހެކި ހާމަ ކުރުމަށް އަންނަ ޖެނުއަރީ މަހުގެ 9 ވަނަ ދުވަހު އަޑުއެހުމެއް ބާއްވަވާނެ ކަމަށް މައްސަލަ ބައްލަވާ ގާޒީ އަހުމަދު ޝަކީލް ވިދާޅުވިއެވެ.
މި މައްސަލައިގެ ބަންދު މުރާޖައާ ބައިވެސް ކުރިއަށް ގެންގޮސްފައިވާއިރު، ދައުލަތުން ވަނީ ދައުވާލިބޭ މީހުން ޝަރީއަތް ނިމެންދެން ބަންދު ކުރުމަށް ނިންމާފައިވާ ސަބަބަށް ބަދަލެއް އައިސްފައި ނުވާތީ، ބަންދުން ދޫކޮށްލަންޖެހޭ ސަބަބެއް ނެތްކަމަށް ވިދާޅުވެފައެވެ. ނަމަވެސް މި މައްސަލައިގައި ދައުވާލިބޭ ބައެއް މީހުން ވަނީ އަސާސީ ހައްގުތައް ކަށަވަރު ނުވާ ކަމަށާއި، އެކަށީގެންވާ ބޭސްފަރުވާ ނުލިބޭކަމުގެ ކަންބޮޑުވުން ފާޅުކޮށްފައެވެ. ގަވާއިދުން މި މައްސަލަ ނުހިނގާ ލަސްވަމުންދާތީ، ދައުވާލިބޭ ފަރާތްތަކަށް ހައްގުތައް ލިއްބައިދޭން ޖެހޭކަން ވަކީލުން މީގެ ކުރީގެ އަޑުއެހުންތަކުގައިވެސް ފާހަގަ ކުރެއްވިއެވެ.
އޭގެ އިތުރުން، މި މައްސަލަ އަވަސް ކޮށްދެއްވުމަށް ވަކީލުން ވަނީ އެދިވަޑައިގެންފައެވެ. އަދި މި މައްސަލައިގެ ބަންދު މުރާޖައާ ފޯމު ލިބިފައިނުވާކަމަށް ޝަހީބުގެ ދިފާއީ ވަކީލުން ވިދާޅުވުމާއި ގުޅިގެން މައްސަލަ ބައްލަވާ ގާޒީ އަހުމަދު ޝަކީލް ވަނީ ބަންދު މުރާޖައާގެ ބައި އެހެން ދުވަހަކު ކުރިއަށް ގެންދިއުމަށް ނިންމަވާފައެވެ.
ޝަހީބް އިބްރާހީމާއި އަހްމަދު މޫސާގެ އިތުރުން 130 ކިލޯގެ މަސްތުވާތަކެތީގެ މައްސަލައިގައި ކްރިމިނަލް ކޯޓުގައި ދައުވާކޮށްފައިވަނީ، ގއ. ވިލިނގިލި، ދުންފިނިގެ، އަސީލް މާހިރާއި ޅ. ހިންނަވަރު، ސެލް، އަނަސް ހުސައިންގެ އިތުރުން، ބަންގްލަދޭޝް ދެ މީހެއް ކަމަށްވާ މުހައްމަދު ރިޔާޒާއި އިގްބާލްގެ މައްޗަށެވެ.
އެ ހަ މީހުންގެ މައްޗަށް ޕްރޮސެކިއުޓާ ޖެނެރަލް (ޕީޖީ) އޮފީހުން ތިން ދައުވާއެއް އުފުލާފައިވެއެވެ. އެއީ މަސްތުވާތަކެތީގެ ގާނޫނުގެ ޖަދުވަލު 1 ގައިވާ މަސްތުވާއެއްޗެއް ރާއްޖެ އެތެެރެކުރުމުގެ ކުށުގެ ދައުވާއަކާއި ޖަދުވަލް 1 ގައިވާ މަސްތުވާއެއްޗެއް ޓްރެފިކް ކުރުމުގެ ކުށުގެ ދައުވާއަކާއި އަދި ޑައިމޯފިން ޓްރެފިކްކުރުމުގެ ކުށުގެ ދައުވާއއެވެ. މި 3 ދައުވާ ސާބިތުވެއްޖެނަމަ އެމީހުންގެ މައްޗަށް 75 އަހަރުގެ ހުކުމެއް އައުމަކީ އެކަށީގެންވާ ކަމެކެވެ.
