ފަހު ވަގުތު ވައިނަލްޑަމް ޕީއެސްޖީ ސަލާމަތްކޮށްދީފި

ފްރެންޗް ލީގުގައި ހޮނިހިރު ދުވަހުގެރޭ ކުޅުނު މެޗުން ލެންސް އަތުން ފަހު ވަގުތު ޕީއެސްޖީ ބަލިނުވެ ސަލާމަތްވެއްޖެއެވެ.

ލެންސްގެ ދަނޑުގައި ކުޅުނު މެޗު އެއްވަރުވީ 1-1 ގެ ނަތީޖާއަކުންނެވެ.

މި މެޗުގެ ފުރަތަމަ ހާފުގައި ލަނޑެއް ނުފެނުނު ނަމަވެސް، މި ހާފުގައި ލީޑު ނަގަން ޕީއެސްޖީއަށް ވަނީ ރަނގަޅު ފުރުސަތުތަކެއް ލިބި ބޭކާރުވެފައެވެ. އެގޮތުން ފުރަތަމަ ހާފުގައި ޕީއެސްޖީއަށް ކުޅެމުން އަންނަ އާޖެންޓީނާގެ ތަރި ލިއޮނެލް މެސީ ފޮނުވާލި ހަމަލާއެއް ގޯލުގެ އަރިމަތީ ދަނޑިއަށް އަމާޒުވިއިރު، އެ ޓީމުގެ އެންހެލް ޑި މާރިއާ ފޮނުވާލި ބޯޅައެއް ލެންސް ގޯލްކީޕަރު ޖީން-ލުއިސް ލެކާ ވަނީ މަތަކޮށްފައެވެ.

މި މެޗުގެ ދެވަނަ ހާފުގައި އެންމެ ފުރަތަމަ ލަނޑު ޖަހައި ލީޑު ނަގާފައިވަނީ ލެންސްއިންނެވެ. މެޗުގެ 62 ވަނަ މިނެޓުގައި އޭރިއާ ބޭރުން ފޮނުވާލި ބާރު ހަމަލާއަކުން މި ލަނޑު ލެންސްއަށް ކާމިޔާބުކޮށްދިނީ އެ ޓީމުގެ ކެޕްޓަން ސެކޯ ފޮފާނާއެވެ. މި މެޗުން ޕީއެސްޖީ ބަލިނުވެ ސަލާމަތްވީ މެޗުގެ އިތުރު ވަގުތުގައި ބަދަލު ކުޅުންތެރިއެއްގެ ގޮތުގައި ކުޅެން އެރި ޖިއޮޖީނިއޯ ވައިނަލްޑަމް ކާމިޔާބުކޮށްދިން ލަނޑުންނެވެ. އޭނާ މި ލަނޑު ކާމިޔާބުކޮށްފައިވަނީ ކީލިއަން އެމްބާޕޭ ނަގައިދިން ހުރަހަކުންނެވެ.

މި މެޗު އެއްވަރުވި ނަމަވެސް، ތާވަލުގެ އެއްވަނައިގައި ޕީއެސްޖީ މި ވަގުތު އޮތީ 13 ޕޮއިންޓުގެ ލީޑަކާއެކުއެވެ. އެގޮތުން ކުޅުނު 17 މެޗުން ޕީއެސްޖީއަށް 42 ޕޮއިންޓް ލިބިފައިވާއިރު، ދެވަނައިގައި އޮތް މާސޭއަށް 16 މެޗުން ލިބިފައިވަނީ 29 ޕޮއިންޓެވެ. އަދި ޕީއެސްޖީއާ އެއްވަރުކުރި ލެންސް އޮތީ ތާވަލުގެ ފަސްވަނައިގައި 17 މެޗުން 27 ޕޮއިންޓާއެކުއެވެ.