ކުރީގެ ރައީސް އަބްދުﷲ ޔާމީން މިނިވަންވުމަށް ފަހު ފުރަތަމަ ފަހަރަށް ގިނަ އަދަދެއްގެ ސަޕޯޓަރުންނާ ބައްދަލުކުރައްވާ ދެއްކެވި ގަޑިއިރަކަށްވުރެ ގިނައިރުވީ ވާހަކަފުޅުގައި 2018 ވަނަ އަހަރުގެ އިންތިޚާބުގައި އެމަނިކުފާނާ ދެކޮޅަށް ނިކުންނެވި މިހާރުގެ ސަރުކާރުގެ ކޯލިޝަންގައި ހިމެނިވަޑައިގަންނަވާ ހުރިހާ ލީޑަރުންނަށް ފާޑުވިދާޅުވެ ވާހަކަދައްކަވައިފިއެވެ.
ރައީސް ޔާމީންގެ ވާހަކަފުޅުގައި ވަނީ ވަކިވަކިން ސަރުކާރު ކޯލިޝަންގައި ހިމެނޭ މައި ހަތަރު ޕާޓީގެ ލީޑަރުންގެ އިތުރުން ނާއިބު ރައީސަށްވެސް ފާޑުވިދާޅުވެ ވާހަކަދައްކަވާފައެވެ. މައިގަނޑު ގޮތެއްގައި މިސަރުކާރުގެ ސިޔާސަތުތަކަށް ފާޑުވިދާޅުވެ ޔާމީންގެ ފަސް އަހަރުގެ ވެރިކަމުގައި ކުރެއްވުނު ކަންކަން ދިފާއުކުރައްވާ ވާހަކަދައްކަވާފައިވާއިރު ޖުޑީޝަރީ އަށް ވަކިން ޚާއްސަކޮށް ފަނޑިޔާރުންނަށްވެސް ވަނީ ފާޑުވިދާޅުވެފައެވެ.
އަދާލަތު ޕާޓީގެ ރައީސް އަދި މިސަރުކާރުގެ ހޯމް މިނިސްޓަރަށް އަމާޒުކުރައްވާ ވާހަކަދައްކަވަމުން ޔާމީން ވިދާޅުވީ ޖަލުގައި ޔާމީން ހުންނެވިއިރު މިނިސްޓަރ އިމްރާން ޖަލަށް ވަޑައިގެން ވިދާޅުވަނީ ރައީސް ޔާމީން ހުންނެވީ ރަނގަޅަށް ކައިގެންކަމަށެވެ. ޖަލު ބަންދުގައި ހުންނަ މީހާއަށްވެސް ހައްގުތަކެއް ކަށަވަރުވާން ޖެހޭކަމަށާއި އެމަނިކުފާނަށް އިމްތިޔާޒުތަކެއް ލިބިވަޑައިގަންނަވަންޖެހޭކަމަށް ޔާމީން ވިދާޅުވިއެވެ. ޖަލު ބަންދުގައި ތިބޭ މީހުން އެންމެ ބޭނުންވާ އެއްޗަކީ ކުކުޅު ބިރިޔާނީތޯ ސުވާލުކުރެއްވިއެވެ.
އަޅުގަނޑުމެންނަށް ލިބެންޖެހޭ އިމްތިޔާޒު ތަކެއް އެބަހުރޭ. ޖަލު ބަންދުގައި ހުންނައިރު އިމްރާން ވަޑައިގެން މިވިދާޅުވަނީ ވަރަށް ރަނގަޅަށް ކައިގެން މިއަދުވެސް ކާންދިނީ ކުކުޅު ބިރިޔާނީއޭ. ކާކުތޯ ކުކުޅު ބިރިޔާނީ ކާން މިއުޅެނީ. މީތޯ ޖަލު ބަންދުގައި ތިބޭ މީހުން ބޭނުންވަ އެއްޗަކީ. އަޅުގަނޑު މިއުޅެނީ ކުކުޅު ބިރިޔާނީ ކާން ނުލިބިގެންނެއް ނޫނޭ. ފަހަރެއްގައި އިމްރާނަށް ވެދާނެ އެއީވަރަށް މީރު ކެއުމަކަށް. މިހުންނަނީ ދިވެހި ދައުލަތުގެ ދާޚިލީ ވަޒީރު ވަޑައިގެން އަޅުގަނޑާ ބެހޭގޮތުން ދައްކަވާ ވާހަކަ. ވަރަށް ހަމަ ޖެހިގެންނޭ ވަރަށް ރަނގަޅަށް ކައިގެންނޭ ހުންނަނީ. އަޅުގަނޑަށް ކާން ނުލިބިގެންނޫނޭ ޖަލަށް ދިޔައީކީ. އަނެއްކާ އަޅުގަނޑަށް އިންޑިޔާ ފަރާތުން ރިޒްގު ނުލިބިދާނެތީއެއް ނޫނޭ އަޅުގަނޑު ޖަލަށް ލައިގެން މިއުޅެނީ. ހިތަށް އަރަނީ ދެން މާތްﷲ މިފުރުސަތު ދެއްވައިފިކަމަށް ވަންޏާ ގައިދީންނަށް ރިސަރޗް ކުރުމުގެ ހައްގު އެބަ ލިބެންޖެހެއޭ.ރައީސް އަބްދުﷲ ޔާމީން / ޕްރޮގްރެސިވް ކޯލިޝަންގެ ލީޑަރ
ޔާމީން ވިދާޅުވީ ގައިދީންނަށް ރިސަރޗް ކުރުމުގެ ފުރުސަތު ދީ އެމީހަކަށް ލިބޭ އިލްމަކުން އެމީހެއްގެ މައްޗަށް އުފުލިފައިވާ ދައުވާއަށް ވަކާލާތުކުރުމުގެ ފުރުސަތު ލިބެންވާނެކަމަށެވެ. ޔާމީން ވިދާޅުވީ ވެރިކަންކޮށްފައި ހުރި މީހަކަށް ކޮށްފައިވާ ތުހުމަތުތަކަށް ޖަވާބުދާރީ ވާނީ ހަމައެކަނި ލޯޔަރުން ނޫންކަމަށެވެ. އެމީހަކަށް އެއީ ކުށްވެރިއެއް ނޫންކަމަށް ބުނެވޭވަރުގެ ކެރުންތެރިކަން ހުންނަންވާނެކަމަށް ޔާމީން ވިދާޅުވިއެވެ.
ޖުމްހޫރީ ޕާޓީގެ ލީޑަރ ގާސިމް އިބްރާހީމަށް އިޝާރާތްކުރައްވާ ޔާމީން ވިދާޅުވީ ލީޑަރުންގެ ސިފައަކީ ހުކުމެއް ކުރާއިރަށް އަނބުރައިގަނެގެން ވެއްޓުން ނޫންކަމަށެވެ.
އޭނާއަށް ކެރެންވާނެ ތެދުވެ ބުނަން ތިމަންނައަކީ ކުށްވެރިއެއްނޫނޭ. ތިމަންނަ ކުށްވެރި ވަނީ މިވެނި ސަބަބުތަކަކާ ހެދިއެއް ނޫނޭ. ހުކުމެއް ކުރާއިރު އަނބުރާ ގަނެގެން ވެއްޓުމެއް ނޫން ލީޑަރުންގެ ސިފައަކަށް ވާނީ. ރައްޔިތުން އެތިބީ ބަލަން ނޫންތޯ ޝަރީޢަތް ހިނގަމުންދާ ގޮތް.ރައީސް އަބްދުﷲ ޔާމީން / ޕްރޮގްރެސިވް ކޯލިޝަންގެ ލީޑަރ
މިސަރުކާރުގައި ހިމެނޭ އެމްއާރުއެމްގެ ލީޑަރ އަދި ޔާމީންގެ ބޭބޭފުޅަށް އަމާޒުކުރައްވާ ވިދާޅުވީ ރައީސް މައުމޫންގެ ވެރިކަމުގައި ކުރިމަތިވި ނޮވެމްބަރ 3 މިހާރު އެއީ ހަނދާންކުރަން ޖެހޭ ކަމަކަށްނުވާކަމަށެވެ. ރައީސް މައުމޫނަށް އެއީ ކަމަކަށްނުވާކަމަށް ޔާމީން ވިދާޅުވިއެވެ.
މިތާ އުތުރުގައި ތިބެގެން އިންޑިޔާ ބޯޓު ފަހަރު މަސްބާނަނީ. އަރަބި ބަހުން ކިޔަންޏާ ވަރަށް ދިމިގްރާތީ. އަދި ވަރަށް އިޚުލާސްތެރި މުއާތިނުންތަކެއް ތިބި ގައުމެއް މިއީ. ކީއްތޯ އަޅުގަނޑުމެންނަށް ވެގެން މިއުޅެނީ. ދެން ކޮންމެ ކަމެއްގައި ވިދާޅުވާނީ މިކަމުގައި އޮތީ ސިއްކަ ޖެހިފައޭ. ޝައްކެތް ނެތް ވެރިކަމުގައި އޮތީ ސިއްކަ ޖެހިފައި. ފެށުނީ ސިއްކަ ޖެހިގެން. މިހާރު 88 އާ ހަމައިން ނޮވެމްބަރ 3 އެއީ ހަނދާން ކުރާ ދުވަހެއް ނޫން. އެދުވަހު ރައީސްކަމުގައި ހުރީ އަޅުގަނޑުގެ ބޭބެ. ރައީސް މައުމޫނަށް އެއީ ކަމެއް ނޫން. އެއީކީ މައްސަލައެއް ނޫން. އެހެންވީމާ ކީއްކުރަން އަޅުގަނޑުމެން ނިކުމެ އެދުވަސް ފާހަގަކުރަންވީ. އެކަމަކު މަރުވި ދިވެހިން ރައްޔިތުން ހަނދާން ހުންނާނެ.ރައީސް އަބްދުﷲ ޔާމީން / ޕްރޮގްރެސިވް ކޯލިޝަންގެ ލީޑަރ
ރައީސުލްޖުމްހޫރިއްޔާ އިބްރާހީމް މުހައްމަދު ޞާލިހަށް ނިސްބަތްކުރައްވާ ޔާމީން ވަނީ ރައީސަކަށް ހުންނަ މީހެއްގެ މައްޗަށް ބޮޑު ޚިޔާނާތުގެ ތުހުމަތެއް ކުރެވިއްޖެނަމަ އެކަމެއް ރައްޔިތުންނަށް ސާފުކޮށްދޭންޖެހޭކަމަށް ވިދާޅުވެފައެވެ. ޔާމީން ވިދާޅުވީ ޅިޔަނު ކޮމިޝަނަރ އޮފް ޕޮލިސްގެ މަގާމުގައި ހުރެގެން ރަނގަޅު ތަހުގީގެއް ނުހިނގާނެކަމަށެވެ.
އިބްރާހީމް މުހައްމަދު ޞާލިހު ރައްޔިތުން ކުރި މަތީގައި ވިދާޅުވޭ ތިމަންނައެއް ރެހެންދި ފްލެޓަކުން 37 މިލިއަން ރުފިޔާ ހިފައިގެން ނުނިކުންނަމޭ ވިދާޅުވެ ބައްލަވާ. އެތައް ބަޔަކު އެވާހަކަ ދައްކަނީ. އަޅުގަނޑު މިކޯޓް ކުރަނީ އެކަންކަން އެނގިވަޑައިގަންނަވާކަމަށް އޭނާ ގެ ފުރަތަމަ ޓޫރިޒަމް މިނިސްޓަރ ދެއްވި އިންޓަރވިއު މިކޯޓު ކުރަނީ. ހަމަގައިމުވެސް ރައީސްގެ މަގާމުގައި އަޅުގަނޑު ހުރެގެން އަޅުގަނޑުގެ މައްޗަށް މިކަހަލަ އިލްޒާމެއް އުފުލިއްޖެ ކަމަށް ވަނީނަމަ އަޅުގަނޑު ބުނާނަން ތަހުގީގުކުރަން. ކުރެވެން ޖެހޭނެ އެތަހުގީގު.ރައީސް އަބްދުﷲ ޔާމީން / ޕްރޮގްރެސިވް ކޯލިޝަންގެ ލީޑަރ
ޔާމީން ސަރުކާރުން ފަށާފައިވާ މަޝްރޫއުތަކުގެ ރިބަން މިސަރުކާރުން ކަނޑަނީކަމަށް ވިދާޅުވެ ޔާމީން ވަނީ މިސަރުކާރުގެ ނާއިބު ރައީސް ފައިސަލް ނަސީމް ކުރައްވަނީ ކޮންކަމެއްތޯ ސުވާލުކުރައްވާފައެވެ. ވަރަށް ބުރަކޮށް ނާއިބު ރައީސް ކުރައްވާކަމަކީ އިމާރާތަކަށް ވަޑައިގެން ލިފްޓެއް ހުޅުއްވައިދެއްވުންކަމަށް ޔާމީން ވިދާޅުވިއެވެ.
ވަރަށް ބުރަކޮށް އުޅުއްވަނީ. އިމާރާތަކަށް ގޮސް ލިފްޓެއް ހުޅުއްވައިދެއްވަނީ. އަދި ކުދިންނަށް ދައުލަތުގެ ތައުލީމީ ސިޔާސަތު ވިސްނައިދެއްވުމަށް ޕްރައިމަރީ ސްކޫލަށް ވަޑައިގެން ކުދިން ގޮވައިގެން ތިއްބަވަނީ. މިއީ ރާއްޖޭގެ ތައުލީމީ ސިޔާސަތު އުނގަންނަވައިދެއްވާ ގޮތް. ހާދަ އަވަދިނެތި އުޅުއްވާ ރައީސަކާއި ނާއިބު ރައީސެކޭ މިވަގުތު މިތިއްބެވީ.ރައީސް އަބްދުﷲ ޔާމީން / ޕްރޮގްރެސިވް ކޯލިޝަންގެ ލީޑަރ
ޔާމީން ވަނީ އިންތިޚާބުތަކުގައި ކޯލިޝަންތައް އުފެދި އެކި ނަންނަމުގައި ފެންނަމުންދާތީ އެކަމަށް ފާޑުވިދާޅުވެފައެވެ.
