މިހާތަނަށް 38 ގައުމަކުން އޮމިކްރޯން ވޭރިއަންޓް ފެނިފައިވޭ: ޑަބްލިޔުއެޗްއޯ
4 ޑިސެމްބަރު 2021 | ހޮނިހިރު 01:33އޮމިކްރޯން ވޭރިއަންޓާ މެދު މާބޮޑަށް ހާސްނުވުމަށް ވަނީ އެދިފައި
ކޮވިޑްގެ އައު ވޭރިއަންޓާ ގުޅިގެން ބަލަންޖެހޭ ކަންކަން އަންނަނީ ބަލަމުން
އޮމިކްރޯން ވޭރިއަންޓް މިހާތަނަށް އައިއިރު 38 ގައުމަކުން ފެނިފައިވާކަމަށާއި ނަމަވެސް މިވޭރިއަންޓް ޖެހިގެން އެއްވެސް މީހަކު މަރުވެގެން ރިޕޯޓްކޮށްފައިނުވާކަމަށް ދުނިޔޭގެ ސިއްހަތު ޖަމިއްޔާ (ޑަބްލިޔުއެޗްއޯ) އިން ބުނެފިއެވެ.
ޑަބްލިޔުއެޗްއޯގެ ސްޕޯކްސްޕާސަން ކްރިސްޓިއަން ލިންޑެމިއޭރް ވިދާޅުވީ އޮމިކްރޯން ވޭރިއަންޓުން ދިފާއުވުމަށް ބޭނުންވާ ބަދަލުތައް ވެކްސިން އުފައްދާ ކުންފުނިތަކުން ވެކްސިނަށް ގެންނަމުންދިޔުމަކީ ފާހަގަކޮށްލެވޭ ކަމެއްކަމަށެވެ. މީގެއިތުރުން ޑަބްލިޔުއެޗްއޯގެ އެންމެ އިސް ސައިންޓިސްޓް ސޯމިޔާ ސްވާމިންތަން ވަނީ އޮމިކްރޯން ވޭރިއަންޓާ މެދު މާބޮޑަށް ހާސްނުވުމަށް އެދިވަޑައިގެންފައެވެ.
އަދި ވެކްސިނަށް ބަދަލުތަކެއް ގެންނަންޖެހޭތޯ ނިންމަން އަދި މާއަވަސްކަމަށް ސޯމިޔާ ވިދާޅުވިއެވެ. ނޫސްވެރިންގެ ބައްދަލުވުމުގައި ވާހަކަ ދައްކަވަމުން ސޯމިޔާ ވިދާޅުވީ އައު ވޭރިއަންޓާއެކު ކުރެވޭނެ އެންމެ މުހިންމު ކަމަކީ އެކަމާއި ހާސްވެ ކަންބޮޑުނުވެ އެވޭރިއަންޓަށް ތައްޔާރުވުންކަމަށެވެ. ވޭރިއަންޓާ ދެކޮޅަށް އަޅަންޖެހޭ ރައްކާތެރިކަމުގެ ފިޔަވަޅުތަކަށް ސަމާލުކަން ދިނުން ކަމަށެވެ.
އަދި އައު ވޭރިއަންޓެއް މިއަދު ފެނިފައިވާއިރު ދުނިޔެ ވަނީ ވަރަށް ބޮޑަށް މިކަމަށް ތައްޔާރުވެފައިކަމަށްވެސް ސޯމިޔާ ވިދާޅުވިއެވެ. އެގޮތުން ގިނަ ބަޔަކަށް ވެކްސިން ދީފައިވާކަން ސޯމިޔާ ފާހަގަކުރެއްވިއެވެ.
