ދެކުނު އެފްރިކާއިން އައި މެލޭޝިޔާ މީހަކު އޮމިކްރޯނަށް ޕޮޒިޓިވް

ދެކުނު އެފްރިކާއިން އައިސް ކަރަންޓީނު ފުރިހަމަކޮށްފައިވާ މީހަކު މެލޭޝިޔާގައި އޮމިކްރޯން އަށް ޕޮޒިޓިވްވެއްޖެއެވެ.

މެލޭޝިޔާގެ ހެލްތު މިނިސްޓަރ ވިދާޅުވީ މިމީހާ މެލޭޝިޔާ އަށް އައިސްފައިވަނީ ދެ ހަފްތާ ކުރިންކަމަށެވެ. ހެލްތު މިނިސްޓަރ ޚައިރީ ޖަމާލުއްދީން ވިދާޅުވީ ނޮވެމްބަރ މަހުގެ 24 ވަނަ ދުވަހު ދުނިޔޭގެ ސިއްހަތު ޖަމިއްޔާ (ޑަބްލިޔުއެޗްއޯ)ން އޮމިކްރޯން ވޭރިއަންޓަކީ ވޭރިއަންޓް އޮފް ކޮންސަރންގެ ގޮތުގައި ކަނޑައެޅުމާއެކު އޭގެފަހުން ހުރިހާ ސާމްޕަލްތަކެއް އަލުން ޓެސްޓުކުރަމުންދާކަމަށެވެ.

ހެލްތު މިނިސްޓަރ ވިދާޅުވީ އުމުރުން 19 އަހަރުގެ މިމީހާއަކީ ވެކްސިން ފުރިހަމަކޮށްފައިވާ މީހެއްކަމަށެވެ. އަދި އެމީހާ ކޮވިޑަށް ޕޮޒިޓިވްވެފައިވާކަން އެނގުނީ މެލޭޝިޔާއަށް އައިފަހުން ކަމަށާއި އޭނާ މެލޭޝިޔާ އަށް އައީ ސިންގަޕޯރު މަގުންކަމަށް މިނިސްޓަރ ވިދާޅުވިއެވެ. އެއަށްފަހު 10 ދުވަހުގެ ކަރަންޓީނުގެ މުއްދަތު ފުރިހަމަކޮށްފައިވާއިރު ކަރަންޓީނުން އޭނާ ދޫކޮށްލީ ނޮވެމްބަރ މަހުގެ 29 ވަނަ ދުވަހު ކަމަށް ހެލްތު މިނިސްޓަރ ވިދާޅުވިއެވެ.

ކަރަންޓީނުވުމަށް އޭނާ އައި ވެހިކަލްގައި ފަސް މީހަކު އައިކަމަށާއި އެއެންމެންވެސް ކޮވިޑް-19ށް ނެގެޓިވްވެފައިވާކަމަށް މިނިސްޓަރ ވިދާޅުވިއެވެ.

އޭނާގެ އެންމެ ކްލޯޒް ކޮންޓެކްޓުންގެ ގޮތުގައި ތިބި 8 މީހުން އިތުރަށް ޓެސްޓްކޮށްފައިވާ ކަމަށް މިނިސްޓަރ ވިދާޅުވިއެވެ.

އޮމިކްރޯން ވޭރިއަންޓް ފެންނަ މިންވަރު އިތުރުވެފައިވާއިރު އެކަމަށް ސަމާލުވުމަށް ޑަބްލިޔުއެޗްއޯއިން ވަނީ އިލްތިމާސްކޮށްފައެވެ.

ބުރާސްފަތި ދުވަހު ސިންގަޕޯރުން ވަނީ އޮމިކްރޯން ވޭރިއަންޓްގެ ދެ ކޭސް ފެނިފައެވެ. މިދިޔަ ހަފްތާގައި މެލޭޝިޔާއިން ވަނީ އެފްރިކާގެ 8 ގައުމަކުން ދަތުރުކުރުން ވަގުތީ ގޮތުން މެދުކަނޑާލާފައެވެ.

މެލޭޝިޔާގެ ހެލްތު މިނިސްޓަރ ވިދާޅުވީ އޮމިކްރޯން ވޭރިއަންޓާއެކު މިހާރު ފިޔަވަޅުތައް އިތުރަށް ވަރުގަދަކޮށްފައިވާ ކަމަށެވެ. އެގޮތުން ސިންގަޕޯރުން އަންނަ ވެކްސިން ފުރިހަމަކޮށްފައިވާ މީހުން އިތުރު ޓެސްޓެއް ހަދަންޖެހޭގޮތަށް ހަމަޖައްސާފައިވާ ކަމަށް މިނިސްޓަރ ވިދާޅުވިއެވެ.