'ވޯރލްޑް ކަލިނަރީ އެވޯރޑްސް'ގެ 'އިންޑިއަން އޯޝަން' ކެޓެގަރީގެ އެންމެ މޮޅު ކަލިނަރީ އިންސްޓިޓިއުޝަނަކަށް ދިވެހިރާއްޖޭގެ ގައުމީ ޔުނިވަރސިޓީގެ ފެކަލްޓީ އޮފް ހޮސްޕިޓާލިޓީ އެންޑް ޓޫރިޒަމް ސްޓަޑީޒް (އެފްއެޗްޓީއެސް) ހޮވިއްޖެއެވެ.
އެފްއެޗްޓީއެސްގެ އިތުރުން މި އެވޯޑަށް ނޮމިނޭޓްވެފައި ވަނީ ސީޝެލްސް އާއި މޮރިޝަސް އިން މިދާއިރާއަށް މީހުން ތަމްރީނުކުރާ ދެ އިންސްޓިޓިއުޝަނެކެވެ. މީގެ ތެރޭގައި ހިމެނޭ މޮރިޝަސްގެ އޮލިވަރ ކަލިނަރީ ސްކޫލަކީ 2020 ވަނަ އަހަރު މި އެވޯޑު ކާމިޔާބުކުރި އިންސްޓިޓިއުޝަނެވެ.
މި އެވޯޑަށް ނޮމިނޭޓްވެފައިވާ ފަރާތްތައް މިއަހަރުގެ މެއި މަހު އިއުލާނުކޮށްފައި ވާއިރު، މި އެވޯރޑަށް ހުށަހެޅުނު ފަރާތްތަކަށް ވޯޓު ދިނުން ހުޅުވާލާފައިވަނީ ސެޕްޓެމްބަރު 17 އާއި ހަމައަށެވެ. ވޯރލްޑް ކަލިނަރީ އެވޯރޑްސްގެ ވެބްސައިޓްގައި އެފްއެޗްޓީއެސްއަށް މި އެވޯޑު ލިބުނުކަން އިއުލާނުކޮށްފައި ވަނީ މިއަހަރުގެ ނޮވެމްބަރ 30 ވަނަ ދުވަހުއެވެ.
މި އެވޯޑަށް އިންސްޓިޓިއުޝަންތައް ނޮމިނޭޓު ކުރުމުގައި ކެއްކުމުގެ ދާއިރާއިން މީހުން ބިނާކުރުމުގައި ކުރާ މަސައްކަތާއި، އެދާއިރާއިން ހޯދާފައިވާ ކާމިޔާބީއާއި ކުރިއެރުންތަކުގެ އިތުރުން، ކެއްކުމުގެ ދާއިރާގެ ތަފާތު ކޯސްތައް ހިންގުމާއި، ދުނިޔޭގެ ފެންވަރުގަ އާއި ގައުމީ ފެންވަރުގައި ބޭއްވޭ ތަފާތު ކެއްކުމުގެ މުބާރާތްތަކުގައި ބައިވެރިވެފައިވާ މިންވަރު ވަޒަންކޮށްފައިވެއެވެ.
1994 ވަނަ އަހަރުން ފެށިގެން ދެމުން އަންނަ ވޯރލްޑް ޓްރެވަލް އެވޯރޑްސް ސިލްސިލާގެ ބައެއް ކަމުގައިވާ ވޯރލްޑް ކަލިނަރީ އެވޯރޑްސް ދޭން ފަށާފައިވަނީ 2020 އަހަރުން ފެށިގެންނެވެ. ވޯރލްޑް ކަލިނަރީ އެވޯރޑަކީ ކެއްކުމުގެ ދާއިރާގެ ކުރިއެރުންތަށް ދުނިޔޭގެ ފެންވަރުގައި ފާހަގަކުރުމުގެ ގޮތުން ދެވޭ އެވޯރޑެކެވެ. މިއެވޯރޑްގައި ހިމެނޭ ދާއިރާތަކުގެ ތެރޭގައި އެކިއެކި ޤައުމުތަކާއި ސަރަޙައްދުތަކުން ހޮވާލެވޭ "ބެސްޓް ރޫފްޓޮޕް ރެސްޓޯރަންޓް"، "ބެސްޓް ކަލިނަރީ ފެސްޓިވަލް" އަދި "ބެސްޓް ފައިން ޑައިނިންގ ހޮޓެލް ރެސްޓޯރަންޓް" ހިމެނެއެވެ.
ފަތުރުވެރިކަމުގެ ދާއިރާއިން މީހުން ބިނާކުރުމުގެ މަސައްކަތް 1987 ވަނަ އަހަރުން ފެށިގެން ކުރަމުން އަންނަ އެފްއެޗްޓީއެސްއަކީ ރާއްޖޭގައި މިދާއިރާއިން މީހުން ތަމްރީނުކުރާ އެންމެ ދުވަސްވީ މުއައްސަސާއެވެ. ގާތްގަނޑަކަށް 600 ދަރިވަރުން މިހާރުވެސް ކިޔަވަމުން އަންނަ އެފްއެޗްޓީއެސްއިން ކިޔަވައިދޭ ދާއިރާތަކުގެ ތެރޭގައި ހައުސްކީޕިންގ، ފްރަންޓް އޮފީސް، ޕެޓިސެރީ، ކަލިނަރީ އާރޓްސް، ޓުއަރ ގައިޑިންގ، އަދި ޓޫރިޒަމް އާއި ހޮސްޕިޓާލިޓީ މެނޭޖްމަންޓް ހިމެނެއެވެ. އަދި މިދާއިރާތަކުން ސެޓްފިކެޓް ލެވެލް 3 އަކުން ފެށިގެން، އެޑްވާންސް ސެޓްފިކެޓް، ބެޗެލަރ ޑިގްރީ، އަދި މާސްޓަރ ޑިގްރީއާއި ހަމައަށް ޕްރޮގްރާމްތައް ކުރިއަށް ގެންދެއެވެ.
