ތަރައްގީއަށް ބޭނުންވާ މައުލޫމާތު އެންމެނަށް ލިބެން ޖެހޭނެ: މިނިސްޓަރ އަސްލަމް
ތަރައްގީއަށް ބޭނުންވާ މައުލޫމާތު އެންމެނަށް ފެންނަން ހުރުމަކީ މުހިންމުކަމެއް
ހައުސިންގ މިނިސްޓަރ މުޙައްމަދު އަސްލަމް
ހަލުވިކަމާއެކު ރާއްޖެ ތަރައްގީވަމުން އަންނައިރު އެބަދަލުތަކުގެ މައުލޫމާތަކީ ހުރިހާ ފަރާތަކަށް ލިބޭނެގޮތަށް ހާމައަށް ހުންނަންޖެހޭ މައުލޫމާތުތަކެއް ކަމަށް މިނިސްޓަރ އޮފް ނޭޝަނަލް ޕްލޭނިންގ ހައުސިންގ އެންޑް އިންފްރާސްޓްރަކްޗަރ މުޙައްމަދު އަސްލަމް ވިދާޅުވެއްޖެއެވެ.
ރާއްޖޭގެ ތަފާސްހިސާބުގެ ގައުމީ ނިޒާމުގެ ދުރުރާސްތާ ތަސައްވުރު އިފްތިތާހު ކުރުމަށް ބޭއްވި ރަސްމިއްޔާތުގައި ވާހަކަދައްކަވަމުން މިނިސްޓަރ ވިދާޅުވީ ރާއްޖެއަށް އަންނަމުންދާ ބަދަލުތަކަކީ ކުރިމަގުގައި ގައުމު ތަރައްގީ ކުރުމަށް ވަރަށް މުހިންމު މައުލޫމާތަކަށް ވާނެ ކަމަށެވެ. އެހެންކަމުން ވަކި ބައެއްގެ އަތުގައި މައުލޫމާތު ފޮރުވާފައި ބެހެއްޓުމުގެ ބަދަލުގައި ހުރިހާ ފަރާތަކަށް ލިބޭނެގޮތަށް ހާމައަށް ހުންނަން ޖެހޭނެ ކަމަށް މިނިސްޓަރ ވިދާޅުވިއެވެ.
މިނިސްޓަރ ވިދާޅުވީ މިހާރު ކަންކުރަމުން އަންނަ އުސޫލަށް ބަލާނަމަ ވަކިވަކި މައުލޫމާތުތައް ހުންނަނީ އެކި ފަރާތްތަކުގެ ބެލުމުގެ ދަށުގައި ރައްކާކުރެވިފައި ކަމަށެވެ. އަދި އެހެން ފަރާތަކުން އެމައުލޫމާތު ބޭނުންވެއްޖެ ނަމަ ބޮޑު އަގު ދީފައި އެމައުލޫމާތު ގަންނަންޖެހޭ ހާލަތްތައްވެސް މެދުވެރިވެފައިވާ ކަމަށެވެ. އޭގެ ބަދަލުގައި އެންމެނަށް ފެންނާނެ ގޮތަށް އެމައުލޫމާތު ހުންނަންޖެހޭނެ ކަމަށާއި، އޭގެ ސަބަބުން ގައުމު ތަރައްގީ ކުރުމަށް ވަރަށް ބޮޑުތަނުން ފަސޭހަ ވެގެންދާނެ ކަމަށް މިނިސްޓަރ ވިދާޅުވިއެވެ.
މީގެ އިތުރުން ރާއްޖެއަށް ތަރައްގީ ގެނައުމުގެ މަސައްކަތް ބައްޓަންކުރުމަށް ބޭނުންވާ ތަފާސްހިސާބު ރާއްޖޭގައި އެއްކުރެވިފައި ނެތް ކަމަށާއި، އެއީ ތަރައްގީއަށް އެޅިފައިވާ ބޮޑު ހުރަހެއް ކަމަށް މިނިސްޓަރ ފާހަގަކުރެއްވިއެވެ. މި މައުލޫމާތު އެކަށިގެންވާ ގޮތެއްގައި ލިބެން ހުރި ނަމަ މާޒީގައި ކަންހިނގާފައިވާ ގޮތަށް ބަލައި ކުރިމަގުގައި ރަނގަޅު ނިންމުންތައް ނިންމުމަށް ވެސް ވަރަށް ބޮޑަށް ފަސޭހަ ވެގެންދާނެ ކަމަށް މިނިސްޓަރ ވިދާޅުވިއެވެ.
ރާއްޖޭގެ ތަފާސްހިސާބުގެ ގައުމީ ނިޒާމުގެ ދުރުރާސްތާ ތަސައްވަރު އިފްތިތާހުކޮށްދެއްވީ މިނިސްޓަރ އޮފް އިކޮނޮމިކް ޑިވެލޮޕްމަންޓް ފައްޔާޒް އިސްމާއިލްއެވެ. މިއީ 2030 ވަނަ އަހަރުގެ ނިޔަލަށް ރާއްޖޭގައި ތަފާސްހިސާބު އެއްކުރުމަށް މަސައްކަތްކުރާނެ ގޮތުގެ ޕްލޭނެވެ. މި ޕްލޭންގެ ދަށުން ސަރުކާރުގެ 17 މުއައްސަސާއަކާއި ގުޅިގެން މައުލޫމާތު އެއްކުރުމަށް ހަމަޖެހިފައި ވާއިރު، މިމައުލޫމާތު ބޭނުންވާ ފަރާތްތަކަށް ލިބޭނެހެން އިންތިޒާމު ހަމަޖެއްސުމަށްވެސްވަނީ ރާވާފައެވެ. އެގޮތުން މިއަންނަ އަހަރުގެ ތެރޭގައި ޒަމާނީ ވަސީލަތްތައް ބޭނުންކޮށްގެން ރާއްޖޭގައި ބޯހިމެނުން ކުރިއަށް ގެންދިއުމަށް ވަނީ ނިންމާފައެވެ.
