އަނިޔާއިން ރަނގަޅުވެ ރާމޯސް ޕީއެސްޖީގެ ސްކޮޑަށް

ޔުއެފާ ޗެމްޕިއަންސް ލީގުގައި ބުދަ ދުވަހުގެރޭ މެންޗެސްޓާ ސިޓީއާ ދެކޮޅަށް ކުޅޭ މެޗަށް ޕީއެސްޖީން ނެގި ސްކޮޑުގައި ސްޕެއިނުގެ ތަޖުރިބާކާރު ޑިފެންޑަރު ސާޖިއޯ ރާމޯސް ހިމަނައިފިއެވެ.

ރެއާލް މެޑްރިޑުގައި 16 އަހަރު ހޭދަކުރުމަށްފަހު އުމުރުން 35 އަހަރުގެ ރާމޯސް ޕީއެސްޖީއަށް ބަދަލުވީ މި އަހަރުގެ ހޫނު މޫސުމުގެ ޓްރާންސްފާ ބާޒާރުގައި ހިލޭ ޓްރާންސްފާއެއްގެ ދަށުންނެވެ. އެކަމަކު އަދި މިހާތަނަށްވެސް ރާމޯސް ޕީއެސްޖީއަށް މެޗެއް ކުޅެދީފައެއް ނުވެއެވެ. އެގޮތުން ޕީއެސްޖީއާ ގުޅުނު ފަހުން ކުޑަކަޅުވާއަށް ލިބުނު ސީރިއަސް އަނިޔާއަކާ ގުޅިގެން ރާމޯސް މިހާތަނަށް ހުރީ ކުޅުމާ ދުރުގައެވެ.

އެކަމަކު އެ އަނިޔާއިން ރަނގަޅުވެ މިދިޔަ ހުކުރު ދުވަހު ރާމޯސް ޕީއެސްޖީގެ ފަރިތަކުރުންތަކަށް ނުކުތްއިރު، ޗެމްޕިއަންސް ލީގުގައި ބުދަ ދުވަހުގެރޭ ސިޓީއާ ދެކޮޅަށް ކުޅޭ މެޗަށް ޕީއެސްޖީން އެކުލަވާލި ސްކޮޑުގައި ރާމޯސް ވަނީ ހިމަނާފައެވެ. އަދި މި މެޗުގައި ރާމޯސް ފެނުމުގެ ފުރުސަތު ބޮޑު ކަމަށް ރިޕޯޓުތައް ބުނެއެވެ.

އަނިޔާއިން ރަނގަޅުވެ ރާމޯސް އެނބުރި އައިރު، މީގެ ކުރިން ރާމޯސްގެ ފިޓްނަސް އެކަށީގެންވާ ފެންވަރެއްގައި ނެތް ކަމަށް ބުނެ، އޭނާއާއެކު ހަދާފައިވާ އެއްބަސްވުން އުވާލަން ޕީއެސްޖީން މަޝްވަރާކުރި ކަމަށް ބައެއް މީޑިއާތަކުން ރިޕޯޓުކުރިއެވެ. އެއާއެކު ޕީއެސްޖީން ވަނީ އެ ވާހަކަތައް ދޮގުކޮށްފައެވެ.

މީގެ ކުރިން ރެއާލާއެކު ގިނަ ކާމިޔާބީތަކެއް ހޯދައިފައިވާ ރާމޯސް ޕީއެސްޖީއާ ގުޅުނީ ދެ އަހަރުގެ އެއްބަސްވުމެއްގެ ދަށުންނެވެ. ރާމޯސްއަކީ ރެއާލުގެ ތާރީޚުގައި އެންމެ ކާމިޔާބު ކެޕްޓަނެވެ. އެގޮތުން ރެއާލަށް ކުޅެދިން 671 މެޗުގައި ރާމޯސް ވަނީ އެ ޓީމަށް 101 ލަނޑު ކާމިޔާބުކޮށްދީފައެވެ. އަދި ވަނީ ރެއާލާއެކު ޔުއެފާ ޗެމްޕިއަންސް ލީގު ހަތަރު ފަހަރު، ސްޕެނިޝް ލީގު ފަސް ފަހަރު، ފީފާ ކުލަބު ވޯލްޑް ކަޕް ހަތަރު ފަހަރު، ސްޕެނިޝް ކަޕް ދެ ފަހަރު، ޔުއެފާ ސުޕަ ކަޕް ތިން ފަހަރު އަދި ސްޕެނިޝް ސުޕަ ކަޕް ހަތަރު ފަހަރު ކާމިޔާބުކޮށްފައެވެ.

ޗެމްޕިއަންސް ލީގުގައި ބުދަ ދުވަހުގެރޭ ރަށުން ބޭރުގައި ޕީއެސްޖީން ސިޓީއާ ދެކޮޅަށް ނުކުންނައިރު، ގްރޫޕް އޭގެ އެއްވަނައިގައި މި ވަގުތު ސިޓީ އޮތީ ކުޅުނު ހަތަރު މެޗުން ލިބުނު ނުވަ ޕޮއިންޓާއެކުއެވެ. އަދި ތާވަލުގެ ދެވަނައިގައި ޕީއެސްޖީ އޮތީ ހަތަރު މެޗުން އަށް ޕޮއިންޓާއެކުއެވެ. ތިންވަނައިގައި އޮތް ބްރޫޖަށް ހަތަރު މެޗުން ހަތަރު ޕޮއިންޓް ލިބިފައިވާއިރު، ފުލުގައި އޮތް ލައިޕްޒީގަށް ހަތަރު މެޗުން ލިބިފައިވަނީ އެންމެ ޕޮއިންޓެކެވެ.

ޗެމްޕިއަންސް ލީގުގައި ސިޓީ އާއި ޕީއެސްޖީ ބައްދަލުކުރާ މެޗު ފަށާނީ ބުދަ ދުވަހުގެރޭ ރާއްޖެ ގަޑިން ދަންވަރު 01:00 ގައެވެ.