ޖަލުތަކުގައި ހަރުކަށި ފިކުރު ފަތުރާ މީހުންގެ ގޮތުގައި 40 އަށްވުރެ ގިނަ މީހުން ފާހަގަކުރެވިފައިވާ ކަމަށް ހޯމް މިނިސްޓަރ އިމްރާން އަބްދުﷲ ވިދާޅުވެއްޖެއެވެ.

އާދިއްތަ ދުވަހު ބޭއްވި ނޫސްވެރިންގެ ބައްދަލުވުމުގައި މިނިސްޓަރ އިމްރާން ވިދާޅުވީ މިދިޔަ 3 އަހަރު ދުވަހުގެ ތެރޭގައި ޓެރަރިޒަމްގެ ގާނޫނުގެ ދަށުން 48 މީހަކު ހައްޔަރުކުރެވިފައިވާކަމަށެވެ. މިގޮތަށް ހައްޔަރުކުރެވޭ މީހުން ޖަލުތެރޭގައި ހަރުކަށި ފިކުރު ފެތުރުމަށް މަސައްކަތްކުރަމުންދާކަން މިނިސްޓަރ އިމްރާން ވަނީ މީގެ ކުރިންވެސް ފާހަގަކުރައްވާފައެވެ. އެފަދަ މީހުން ދެނެގަތުމުގެ މަސައްކަތް މިހާރު ކުރަމުންދާއިރު އިމްރާން ވިދާޅުވީ ޖަލުތަކުގައި ހަރުކަށި ފިކުރު ފަތުރާ 40 އަށްވުރެ ގިނަ މީހުން މިހާތަނަށް ދެނެގަނެވިފައިވާކަމަށެވެ.

އެފަދަ މީހުންނަށް އަމާޒުކޮށް ރިހެބިލިޓޭޝަން ޕްރޮގްރާމްތަކެއް ހިންގުމަށް ރާވާފައިވާކަމަށާއި، އެމަސައްކަތް އަންނަ އަހަރުގެ ޖެނުއަރީ މަސް ތެރޭގައި ފަށައިގަނެވޭނެ ކަމަށް ވިދާޅުވިއެވެ.

ނޫސްވެރިންގެ ބައްދަލުވުމުގައި ވާހަކަދައްކަވަމުން ކޮމިޝަނަރ އޮފް ޕްރިޒަންސް އަހުމަދު މުހައްމަދުފުޅު ވިދާޅުވީ ޖަލުގައި ހަރުކަށި ފިކުރު ފަތުރާ މީހުން ދެނެގަތުމަށް ޚާއްސަ އެސެސްމަންޓެއް ހަދަމުންދާކަމަށެވެ. ކަން ކުރަނީ ޖަލުގައި ތިބި މީހުންނާ އިންޓަރވިއުކޮށްގެން އަދި ފުލުހުންގެ އިންޓެލިޖެންސް މެދުވެރިކޮށް ބަލަންޖެހޭ ކަންކަން ބެލުމަށްފަހުގައި ކަމަށް ސީޕީ ވިދާޅުވިއެވެ. މި އެސެސްމެންޓް ހެދުމުގެ މަސައްކަތް ކުރިއަށްގެންދަނީ ބައިނަލްއަގުވާމީ ފަރާތްތަކާ ގުޅިގެން ކަމަށް އޭނާ ވިދާޅުވިއެވެ.

ސީޕީ ވިދާޅުވީ ޖަލުގައި ހަރުކަށި ފިކުރު ފަތުރާ މީހުން ދެނެގަނެ އެހެން މީހުންނާ އެކަހެރި ކުރުމުގެ މަސައްކަތް ކުރަމުންދާކަމަށެވެ. މި މަސައްކަތަށް ޚާއްސަ 100 މީހުންގެ ޖާގައިގެ ޔުނިޓެއް ގާއިމްކުރެވިފައިވާކަމަށް ސީޕީ ވިދާޅުވިއެވެ.