ކޮމިޝަނަރ އޮފް ޕްރިޒަންސް މަޤާމުން އިސްތިއުފާ ދެއްވަނީ

ކޮމިޝަނަރ އޮފް ޕްރިޒަންސްގެ މަޤާމުން އަޙްމަދު މުޙައްމަދުފުޅު އިސްތިއުފާ ދެއްވަން ނިންމަވައިފިއެވެ.

އަޙްމަދު މުހައްމަދުފުޅު މީޑިއާތަކާ ހިއްސާކުރެއްވި މެސެޖެއްގައިވާ ގޮތުން އޭނާ ވަނީ އިސްތިއުފާގެ ސިޓީ ރައީސުލްޖުމްހޫރިއްޔާ އިބްރާހިމް މުޙައްމަދު ޞާލިޙަށް ހުށަހަޅުއްވާފައެވެ. މަގާމުން އިސްތިއުފާ ދެއްވަނީ މި މަހުގެ 19 ވަނަ ދުވަހުން ފެށިގެން ކަމަށް ވެސް އެ މެސެޖުގައިވެއެވެ.

އަޙްމަދު މުހައްމަދުފުޅު ވިދާޅުވީ ޖަލުތަކުގެ ހާލަތު ރަނގަޅު ކުރުމަށް އޭނާ ގިނަ މަސައްކަތްތަކެއް ކުރައްވާފައިވާނެ ކަމަށެވެ. އަދި ފާއިތުވި ތިން އަހަރާއި ދިހަ މަސްދުވަހުގެތެރޭގައި އޭނާއާއެކު މަސައްކަތް ކުރި އެންމެންނަށް ޝުކުރު އަދާކުރެއްވިއެވެ.

މަޤާމުން ވަކުވުމުގެ ކުރިން ބުރާސްފަތި ދުވަހު ހުރިހާ ޖަލުތަކަށް ޒިޔާރަތްކުރައްވާނެކަމަށްވެސް ކޮމިޝަނަރ އޮފް ޕްރިޒަންސް އަޙްމަދު މުޙައްމަދުފުޅު ވަނީ ވިދާޅުވެފައެވެ.

އަޙްމަދު މުހައްމަދު ފުޅު ކޮމިޝަނާ އޮފް ޕްރިޒަންގެ މަގާމަށް އައްޔަންކުރީ ޖެނުއަރީ 21، 2020 ގައި, އެމަގާމުގައި ހުންނެވި އަބްދުﷲ މުނާޒް އެ މަގާމުން ވަކިކުރުމުންނެވެ. އޭގެ ކުރިން އޭނާ ހުންނެވީ އިންސްޕެކްޓާ އޮފް ކަރެކްޝަނަލް ސަރވިސަސްގެ މަގާމުގައެވެ.