ކޮވިޑް-19ގެ އައު ސަރޖާއެކު އޮސްޓްރިއާ ލޮކްޑައުންކޮށްފިއެވެ.
ހަތަރު ވަނަ ފަހަރަށް އޮސްޓްރިއާ ލޮކްޑައުންކުރިއިރު ސަރުކާރުން ބުނެފައިވަނީ އެންމެ ފުރަތަމަ ލޮކްޑައުންކުރަނީ 10 ދުވަހަށް ކަމަށެވެ. ނަމަވެސް 20 ދުވަސްވެސް ނަގާފާނެކަމަށް ސަރުކާރުން ވަނީ ބުނެފައެވެ. އޮސްޓްރިއާ ލޮކްޑައުންކޮށްފައިވާއިރު, މިއީ ހުޅަނގު ޔޫރަޕްގެ ގައުމުތަކުގެ ތެރެއިން މިފަހަރު ލޮކްޑައުންކުރި ފުރަތަމަ ގައުމެވެ.
މިލޮކްޑައުންއާއެކު، މީހުން ގިނައިން އެއްވެ އުޅޭ ރެސްޓޯރެންޓްތަކާއި ބާރތައް ފަދަ ތަންތަން ބަންދުވާނެއެވެ. ކްރިސްމަސް މާރކެޓްތައްވެސް ވަނީ ބަންދުކޮށްފައެވެ. އެތަންތަން ހުޅުވާލާފައިވަނީ ކުޑަދުވަސްކޮޅެއްކުރިންނެވެ. ނަމަވެސް ފަހުވަގުތު ވަނީ ވެކްސިން ޖަހާފައިވާ މީހުންނަށް އެމާރކެޓްތައް ހުޅުވާލާފައެވެ. ނަމަވެސް ހޮޓާތައް ވަނީ ލޮކްޑައުން ފެށުމާއެކު ޓޫރިސްޓުންނަށްވެސް ބަންދުކޮށްފައެވެ.
ލޮކްޑައުންއާއެކު އެތައް ބަޔެއްގެ ނުރުހުން ވަނީ ސަރުކާރަށް އަމާޒުވެފައެވެ. އެގޮތުން ކަނާތު ފިޔައިގެ ފްރީޑަމް ޕާޓީން ވަނީ ކޮވިޑް-19 ކޮންޓްރޯލްކުރުމަށް އަޅާފައިވާ ފިޔަވަޅުތަކާ ދެކޮޅަށް މުޒާހަރާކޮށްފައެވެ.
ވެކްސިން ޖެހުމުން އާންމު ހާލަތަށް ރުޖޫއަވެވޭނެކަމަށް ސަރުކާރުން ކުރިން ބުނިނަމަވެސް ވެކްސިން ޖަހާފައިވާ މީހުންނަށްވެސް ލުއި ލިބިފައިނުވާތީ އާންމުން ވަނީ އެކަމާއި ވަރަށް ބޮޑަށް ނުރުހުންވެފައެވެ.
އޮސްޓްރިއާގައި ވެކްސިން ޖަހަންޖެހޭ އާބާދީގެ ތެރެއިން ދެ ޑޯޒް ޖަހާފައިވަނީ 66 އިންސައްތަ މީހުންނެވެ. އޮސްޓްރިއާއަކީ ހުޅަނގު ޔޫރަޕްގެ ގައުމުތަކުގެ ތެރެއިން އެންމެ މަދުން ވެކްސިން ޖެހި ގައުމުތަކުގެ ތެރެއިން ގައުމެކެވެ. އޮސްޓްރިއާގައި ވެކްސިން ޖަހާފައިވާ މީހުން މަދުވެފައިވަނީ މީހުންގެ މެދުގައި ވެކްސިން ޖެހުމާމެދު އުފެދިފައިވާ ޚިޔާލު ތަފާތުވުންތަކުގެ ސަބަބުންނެވެ. ވަކިން ޚާއްސަކޮށް ފްރީޑަމް ޕާޓީން ދިޔައީ ވެކްސިން ނުޖެހުމަށް ބާރުއަޅަމުންނެވެ.
އޮސްޓްރިއާ ސަރުކާރުން އެންމެ ފުރަތަމަ ލޮކްޑައުންގެ ފިޔަވަޅުތައް އެޅީ ވެކްސިން ނުޖަހާ މީހުންނަށެވެ. ނަމަވެސް މިދިޔަ އަހަރު ޕީކުގައި ހުރިއިރަށްވުރެ މައްޗަށް ކޭސްތައް ގޮސް، އައިސީޔޫ އެނދުތައް ފުރެން ފެށުމުން ސަރުކާރުން ވަނީ ލޮކްޑައުންއަކަށް ދާނެކަން ހުކުރު ދުވަހު އިއުލާންކޮށްފައެވެ.
ހުކުރު ދުވަހު އޮސްޓްރިއާ ސަރުކާރުން ބުނެފައިވަނީ އަލުން އޮސްޓްރިއާ ލޮކްޑައުން އަކަށްދާއިރު، ފެބްރުއަރީ މަހުގެ 1ގެ ކުރިން ވެކްސިން ޖެހުން އެންމެންގެ މައްޗަށް މަޖުބޫރުކަމަށެވެ.
ލޮކްޑައުންއާއެކު މީހުންނަށް ބޭރަށް ނިކުމެ އުޅެވޭނީ މަސައްކަތް ކުރުމަށާއި ކޮންމެހެން ގަންނަންޖެހޭ ތަކެތި ގަތުމަށެވެ. މީގެއިތުރުން ކަސްރަތު ކުރުމުގެ ބޭނުމަށް ހިނގާލަން ކޮންމެ ގަޑިއެއްގައިވެސް ކޮންމެ ހިސާބަކަށްވެސް ދިޔުމުގެ ފުރުސަތު ވަނީ ހުޅުވާލާފައެވެ.
