ކުލަބު މޯލްޑިވްސް ކަޕުގެ ކުޅުން ފަށައިފި

ސަރުކާރު ކުންފުނިތަކަށް އަމާޒުކޮށްގެން ބާއްވަމުން އަންނަ ކުލަބު މޯލްޑިވްސް ކަޕުގެ ކުޅުން ފަށައިފިއެވެ.

އެއް އަހަރުގެ މެދުކެނޑުމަކަށްފަހު ކުލަބު މޯލްޑިވްސް ކަޕް މި އަހަރު ބާއްވާއިރު، މި ފަހަރުގެ މުބާރާތުގެ ފިރިހެން ބައިގައި މި ފަހަރުވެސް 32 ޓީމު ވާދަކުރެއެވެ. އެއާއެކު މި މުބާރާތުގެ ފިރިހެން ބައި ކުރިއަށްގެންދަނީ އަށް ގްރޫޕަކަށް ބަހާލައިގެންނެވެ. އަދި މި ފަހަރުގެ މުބާރާތުގެ އަންހެން ޑިވިޝަން "ވިމެންސް ފުޓްސަލް ފިއެސްޓާ" ގައި އަށް ޓީމެއް ވަނީ ބައިވެރިވެފައެވެ.

ހުޅުމާލޭ ރެހެންދި ފުޓްސެލް ދަނޑުގައި އާދީއްތަ ދުވަހުގެރޭ ފެށި މި މުބާރާތް ޝަރަފުވެރިކޮށްދެއްވީ ކުޅިވަރާ ބެހޭ ވަޒީރު އަޙްމަދު މަޚްލޫފެވެ. އަދި ފުޓްބޯލް އެސޯސިއޭޝަން އޮފް މޯލްޑިވްސް (އެފްއޭއެމް) ގެ ޖެނެރަލް ސެކްރެޓަރީ ހުސެއިން ޖަވާޒް (ޖަވާ) ގެ އިތުރުން ސަރުކާރު ކުންފުނިތަކުގެ އިސްވެރިންވެސް ވަނީ މުބާރާތް ހުޅުވުމުގެ ރަސްމިއްޔާތުގައި ބައިވެރިވެޑައިގެންފައެވެ.

މި މުބާރާތުގައި އާދީއްތަ ދުވަހުގެރޭ ކުޅުނު ފުރަތަމަ މެޗުން އެންމެ ފަހުގެ ޗެމްޕިއަން ޔުނައިޓެޑް ބީއެމްއެލް ވަނީ ހައުސިން ޑިވެލޮޕްމެންޓް ކޯޕަރޭޝަން (އެޗްޑީސީ) އަތުން ބަލިވެފައެވެ. މި މެޗު އެޗްޑީސީން ކާމިޔާބުކުރީ 3-0 ގެ ނަތީޖާއަކުންނެވެ. އަދި އާދީއްތަ ދުވަހުގެރޭ ކުޅުނު ފިރިހެން ބައިގެ ދެވަނަ މެޗުގައި ބައްދަލުކުރީ އިމިގްރޭޝަނާއި ދިރާގެވެ. މި މެޗު ނިމިގެންދިޔައީ ދެ ޓީމުން ކުރެ ޓީމަކަށް ލަނޑެއް ނުޖެހިއެވެ.

މީގެ އިތުރުން މި ފަހަރުގެ މުބާރާތުގެ އަންހެން ޑިވިޝަން "ވިމެންސް ފުޓްސަލް ފިއެސްޓާ" ގެ ފުރަތަމަ މެޗުގައި ބައްދަލުކުރީ އެންމެ ފަހުގެ ޗެމްޕިއަން އެމްޕީއެލް އާއި ފެނަކައެވެ. މި މެޗު ފަސޭހަކަމާއެކު 5-0 ގެ ނަތީޖާއަކުން ކާމިޔާބުކުރީ އެމްޕީއެލުންނެވެ. އަދި އަންހެން ޑިވިޝަނުގެ ދެވަނަ މެޗުގައި ދިވެހި ސިފައިންގެ ކުލަބާއި ޕޮލިސް ކްލަބު ބައްދަލުކުރިއިރު، އެ މެޗު ސިފައިންގެ ކުލަބުން ކާމިޔާބުކުރީ 3-1 ގެ ނަތީޖާއަކުންނެވެ.

މި އަހަރުގެ ކުލަބު މޯލްޑިވްސް ކަޕުގެ ކުޅުން އާދީއްތަ ދުވަހުގެރޭ ފެށިއިރު، މި އަހަރުގެ މުބާރާތް އެންމެ ފުރަތަމަ ތާވަލުކުރީ މެއި މަހަށެވެ. އެކަމަކު ކޮވިޑް-19 ގެ ހާލަތާ ގުޅިގެން އެ ފަހަރު މުބާރާތް ފަސްކުރަން ޖެހުނެވެ. އަދި މިދިޔަ އަހަރު ރާއްޖޭގެ ކޮވިޑުގެ ހާލަތު ގޯސްވެ، މި މުބާރާތް އެ އަހަރު ބާއްވާފައެއް ނުވެއެވެ.