މާލެ ޖަލު ހުޅުމާލެއަށް ބަދަލުކުރަން ނިންމައިފި
21 ނޮވެމްބަރު 2021 | އާދީއްތަ 16:26ޖަލުތަކުގެ ހާލަތު ރަނގަޅުކުރުމަށް ގިނަ މަސައްކަތްތަކެއް ދަނީ ކުރަމުން
ހޯމް މިނިސްޓަރ އިމްރާން އަބްދުﷲ
މާލެ ޖަލު ހުޅުމާލެއަށް ބަދަލުކުރުމުގެ މަސައްކަތް ކުރަމުންދާކަމަށް ހޯމް މިނިސްޓަރ އިމްރާން އަބްދުﷲ ވިދާޅުވެއްޖެއެވެ.
ހޯމް މިނިސްޓަރ މިފަދައިން ވިދާޅުވީ ފުލުހުންނާއި، ޕްރިޒަންސް ގުޅިގެން އާދިއްތަ ދުވަހު ބޭއްވި ނޫސްވެރިންގެ ބައްދަލުވުމުގައި ބައިވެރިވެވަޑައިގެން ވާހަކަދައްކަވަމުންނެވެ. މިނިސްޓަރ ވިދާޅުވީ ޖަލުތަކުގެ ހާލަތު ރަނގަޅުކުރުމުގެ މަސައްކަތުގެ ތެރެއިން މާލެ ޖަލު ހުޅުމާލެއަށް ބަދަލުކުރުމަށްޓަކައި ވާންޖެހޭ ތައްޔާރީތަކުގެ އެންމެ ފަހު މަރުހަލާއާ ހަމައަށް އާދެވިފައިވާކަމަށެވެ.
އިމްރާން ވިދާޅުވީ 2022 ވަނަ އަހަރު މި ޕްރޮޖެކްޓު ފެށިގެންދާނެ ކަމަށް އުންމީދުކުރައްވާކަމަށެވެ. އަދި މި މަސައްކަތާއެކު ރިމާންޑު ޖާގައަށް 400 ވަރަކަށް ޖާގަ އިތުރުކުރެވިގެންދާނެ ކަމަށެވެ. މިއީ ރިމާންޑު ކުށްވެރިން ބެލެހެއްޓުމުގައި ދިމާވެފައިވާ ގޮންޖެހުންތަކަށް ލިބޭނެ ވަރަށް ބޮޑު ހައްލެއް ކަމަށް މިނިސްޓަރ ވިދާޅުވެފައިވެއެވެ.
ޖަލުތަކުގެ ހާލަތު ރަނގަޅުކޮށް، ޖާގައިގެ ދަތިކަމަށް ހައްލެއް ހޯދައިދިނުމަށް ފާއިތުވި ތިން އަހަރުތެރޭގައި 250 ޖާގައެއް އިތުރުކުރެވިފައިވާކަން އިމްރާން ފާހަގަކުރެއްވިއެވެ. މީގެ ތެރޭގައި މާލޭ ޖަލު ޒަމާނީ ފެންވަރަށް ބަދަލުކުރެވި، 50 މީހުން ބަންދުކުރެވޭގޮތަށް އެތަން ފަރުމާކޮށްފައިވެއެވެ. ގާނޫނާ ޚިލާފުވާ ބިދޭސީން ބަންދުކުރުމަށް ހުޅުމާލެ ޖަލަށް 100 ޖާގަ އިތުރުކޮށް، މާފުށީ ޖަލުގައި ސްޕެޝަލް މެނޭޖްމެންޓް ޔުނިޓެއްގެ ގޮތުގައި 100 މީހުންގެ ޖާގައިގެ ޔުނިޓެއް ގާއިމުކުރުން ހިމެނެއެވެ.
އަދި މިއަހަރު ނިމުމުގެ ކުރިން، ކުޑަކުދިން ބައިތިއްބާ މަރުކަޒެއްގެ ގޮތުގައި ކ. ހިންމަފުށީފައި ޚާއްސަ މަރުކަޒެއް ގާއިމުކުރުމަށް ވަނީ ނިންމާފައެވެ. އެތަނުގައި ޖުމްލަ 16 ކުދިން ބަންދުކުރެވޭގޮތަށް އެތަން ފަރުމާކުރުމަށް ވަނީ ނިންމާފައެވެ.
