މެސީގެ ލަނޑާއެކު ޕީއެސްޖީއަށް މޮޅެއް

ފްރެންޗް ލީގުގައި އާޖެންޓީނާގެ ތަރި ލިއޮނެލް މެސީ ކާމިޔާބުކުރި ފުރަތަމަ ލަނޑާއެކު ނޯންޓް އަތުން ޕީއެސްޖީ މޮޅުވެއްޖެއެވެ.

ހޮނިހިރު ދުވަހުގެރޭ އަމިއްލަ ދަނޑުގައި ކުޅުނު މެޗުން ޕީއެސްޖީ މޮޅުވީ 3-1 ގެ ނަތީޖާއަކުންނެވެ.

މި މެޗު ފަށައިގެން ޕީއެސްޖީން މޮޅު ކުޅުމެއް ދެއްކިއިރު، މެޗުގެ ވަރަށް ކުރީކޮޅު އެ ޓީމުން ވަނީ ލީޑު ނަގާފައެވެ. މެޗު ފަށައިގެން ދެވަނަ މިނެޓުގައި ލެއާންޑްރޯ ޕަރެޑޭސްގެ އެހީތެރިކަމާއެކު މި ލަނޑު އެ ޓީމަށް ކާމިޔާބުކޮށްދިނީ ޒުވާން ތަރި ކީލިއަން އެމްބާޕޭއެވެ.

އޭގެ ފަހުން ދެ ޓީމުގެ ފަރާތުން ހަމަހަމަ ކުޅުމެއް ފެނިގެންދިޔައިރު، ދެވަނަ ހާފުގައި ޕީއެސްޖީއަށް މައްސަކަލަތަކެއް ކުރިމަތިވީ އެ ޓީމުގެ ގޯލްކީޕަރު ކޭލޯ ނަވާސްއަށް ސީދާ ރަތް ކާޑެއް ދެއްކުމުންނެވެ. ރެފުރީ އޭނާއަށް ރަތް ކާޑެއް ދެއްކީ އޭރިއާ ބޭރުން ނޯންޓުގެ ލުޑޮވިޗް ބްލާސްއަށް ކުރި ނުރައްކާތެރި ފައުލަކާ ގުޅިގެންނެވެ.

އެއާއެކު ޕީއެސްޖީގެ ކުޅުންތެރިއަކު މަދުވުމުގެ ފައިދާ ނަގައި، މެޗުގެ 76 ވަނަ މިނެޓުގައި ނޯންޓުން ވަނީ ނަތީޖާ އެއްވަރުކޮށްފައެވެ. މި ލަނޑު އެ ޓީމަށް ކާމިޔާބުކޮށްދިނީ ރަންޑަލް ކޮލޯ މުއާނީއެވެ. އެކަމަކު އޭގެ ހަ މިނެޓު ފަހުން ޕީއެސްޖީން އަލުން ލީޑު ނެގިއިރު، މި ލަނޑަކީ ނޯންޓުގެ ޑެނިސް އަޕިއާ އަތުން ބައިކޮޅަށް ވަން ލަނޑެކެވެ.

އޭގެ ފަހުން މެޗު ނިމެން ތިން މިނެޓަށް ވެފައި ވަނިކޮށް އޭރިއާ ބޭރުން ފޮނުވާލި ހަމަލާއަކުން މެސީ ވަނީ ޕީއެސްޖީއަށް ލީޑު ފުޅާކޮށްދީފައެވެ. މިއީ ހިލޭ ޓްރާންސްފާއެއްގައި ބާސާ ދޫކޮށް ޕީއެސްޖީއަށް ބަދަލުވި ފަހުން، ފްރެންޗް ލީގުގައި މެސީ ކާމިޔާބުކުރި ފުރަތަމަ ލަނޑެވެ.

މި މޮޅާއެކު ތާވަލުގެ އެއްވަނައިގައި ޕީއެސްޖީ އޮތީ 12 ޕޮއިންޓުގެ ލީޑަކާއެކުއެވެ. އެގޮތުން ކުޅުނު 14 މެޗުން ޕީއެސްޖީއަށް 37 ޕޮއިންޓް ލިބިފައިވާއިރު، ދެވަނައިގައި އޮތް ރެންއަށް 14 މެޗުން ލިބިފައިވަނީ 25 ޕޮއިންޓެވެ. އަދި ޕީއެސްޖީ އަތުން ބަލިވި ނޯންޓް އޮތީ ތާވަލުގެ 11 ވަނައިގައި 14 މެޗުން 18 ޕޮއިންޓާއެކުއެވެ.