ކޮވިޑް-19 އަށް ޕޮޒިޓިވްވުމާ ގުޅިގެން މެންޗެސްޓާ ސިޓީއަށް ކުރިއަށް އޮތް ދެ މެޗުގައި ބެލްޖިއަމުގެ މިޑްފީލްޑަރު ކެވިން ޑި ބްރޭނާއަށް ނުކުޅެވޭނެކަން ޔަގީންވެއްޖެއެވެ.
އުމުރުން 30 އަހަރުގެ ޑި ބްރޭނާއަށް ކޮވިޑް ޖެހުނުކަން ކަށަވަރުވީ ބެލްޖިއަމުގެ ގައުމީ ޓީމާއެކު ހޭދަކުރި ބައިނަލްއަގުވާމީ ބްރޭކަށްފަހު އެނބުރި އައިސް ޓީމާ ގުޅުމުގެ ކުރިން ހެދި ޓެސްޓުތަކުންނެވެ. އެ ޓެސްޓުން ޑި ބްރޭނާ ކޮވިޑަށް ޕޮޒިޓިވްވުމާއެކު، އޭނާ ވަނީ މަދުވެގެން 10 ދުވަހަށް އައިސޮލޭޝަނަށް ދާން ޖެހިފައެވެ. އެހެންކަމުން އިނގިރޭސި ލީގުގައި އާދީއްތަ ދުވަހުގެރޭ އެވަޓަންއާ ދެކޮޅަށް ކުޅޭ މެޗާއި، ޔުއެފާ ޗެމްޕިއަންސް ލީގުގައި ބުދަ ދުވަހުގެރޭ ޕީއެސްޖީއާ ބައްދަލުކުރާ މެޗުގައުވެސް ޑި ބްރޭނާއަށް ނުކުޅެވޭނެއެވެ.
އެވަޓަންއާ ދެކޮޅަށް ކުޅެން އޮތް މެޗުގެ ކުރިން ބޭއްވި ނޫސްވެރިންގެ ބައްދަލުވުމުގައި ސިޓީގެ ކޯޗު ޕެޕް ގާޑިއޯލާ ބުނީ ޑި ބްރޭނާއަށް ދެން އެންމެ އަވަހަށް ކުޅުމަށް އެނބުރި އާދެވޭނީ މި މަހުގެ 28 ވާ އާދިއްތަ ދުވަހުގެރޭ ވެސްޓް ހޭމް ޔުނައިޓެޑާ ދެކޮޅަށް ކުޅޭ މެޗަށް ކަމަށެވެ. އަދި ޑި ބްރޭނާ ނެތުމަކީ ޓީމަށް އޮތް ގެއްލުމެއް ކަމަށާއި، އެކަމަކު މި ދަނޑިވަޅުގައި ހުރިހާ ފޯކަސްއެއް ހުރީ އޭނާ ރަނގަޅު ސިއްހަތެއްގައި އެނބުރި އައުމަށް ކަމަށްވެސް ވަނީ ބުނެފައެވެ.
ކޮވިޑަށް ޕޮޒިޓިވްވުމާ ގުޅިގެން ޑި ބްރޭނާއަށް މުހިންމު މެޗުތަކެއް ގެއްލޭއިރު، މި ސީޒަނުގައި އަދި މިހާތަނަށް އޭނާއަށް އެންމެ އެދެވޭ ކުޅުމެއް ދެއްކިފައެވެ. އެގޮތުން ސިޓީން ކުޅުނު ބައެއް މެޗުތަކުގައި އޭނާ ކުޅެން އަރާފައިވަނީ ބަދަލު ކުޅުންތެރިއެއްގެ ގޮތުގައެވެ.
ކޮވިޑަށް ޕޮޒިޓިވްވުމާ ގުޅިގެން ޑި ބްރޭނާއަށް ސިޓީން ކުޅޭ ދެ މެޗެއް ގެއްލޭއިރު، ވޯލްޑް ކަޕް ކޮލިފައިންގެ މެޗުތަކުގައި ލިބުނު އަނިޔާއެއްގެ ސަބަބުން އިންގްލެންޑުގެ މިޑްފީލްޑަރު ޖެކް ގްރީލިޝްއަށް ވެސް އާދީއްތަ ދުވަހުގެރޭ އެވަޓަންއާ ދެކޮޅަށް ކުޅޭ މެޗުގައި ކުޅެވޭނެކަން ޔަގީނެއް ނޫނެވެ. އަދި މި ފަހަކަށް އައިސް ތަފާތު މޮޅު ކުޅުމެއް ދައްކަމުން އަންނަ ފިލް ފޯޑެންއަށްވެސް ވަނީ އަނިޔާގެ މައްސަލައެއް ކުރިމަތިވެފައެވެ. އެކަމަކު އެ ދެ ކުޅުންތެރިންގެ އަނިޔާ ސީރިއަސް ނޫން ކަމަށް ގާޑިއޯލާ ވަނީ ބުނެފައެވެ.
ޕްރިމިއާ ލީގުގައި އާދީއްތަ ދުވަހުގެރޭ އަމިއްލަ ދަނޑުގައި އެވަޓަންއާ ދެކޮޅަށް އެންމެ ފަހުގެ ޗެމްޕިއަން ސިޓީ ނުކުންނައިރު، އެ ޓީމު އޮތީ ތާވަލުގެ ދެވަނައިގައި ކުޅުނު 11 މެޗުން ލިބުނު 23 ޕޮއިންޓާއެކުއެވެ. އަދި ތިންވަނައިގައި އޮތް ވެސްޓް ހޭމަށްވެސް ވަނީ ސިޓީއާ އެއް އަދަދަކަށް ޕޮއިންޓް ލިބިފައެވެ.
