ޖަލުގައި ހަދާ ކުޑަކުދިންގެ ޚާއްސަ ޔުނިޓް ނިމުމަކާ ގާތަށް
ކުށްކުރާ ކުޑަކުދިންނާ ޑީލް ކުރާ ހުރިހާ އެންމެންނަށް ޚާއްސަ ޓްރެއިނިން ތަކެއް ދެވޭނެ
ޖަލުގެ ހާލަތު ބެއްލެވުމަށް މިނިސްޓަރު އިމްރާން ކުރެއްވި ދަތުރުފުޅެއްގެ ތެރެއިން
ޖަލުގައި ހަދާ ކުޑަކުދިންގެ ޚާއްސަ ޔުނިޓްގެ މަސައްކަތް ނިމުމަކާ ގާތްވެފައިވާކަމަށް ހޯމް މިނިސްޓަރ އިމްރާން އަބްދުﷲ ވިދާޅުވެއްޖެއެވެ.
ރާއްޖެޓީވީއަށް ދެއްވި ޚާއްސަ އިންޓަރވިއުގައި އިމްރާން ވިދާޅުވީ، ކުޑަކުދިންގެ އަދުލުގެ ގާނޫނު އައުމާއެކު ޖަލުގައި ކުޑަކުދިންނަށް ޚާއްސަ ޔުނިޓެއް މާފުށީ ޖަލުގައި ގާއިމް ކުރުމުގެ މަސައްކަތް ފަށައިގެން އައިސް ގާތްގަނޑަކަށް އެ ޔުނިޓް ނިމުމަކާ ހަމައަށް މިހާރު އާދެވިފައިވާ ކަމަށާއި، އެތަނަކީ ގާނޫނުގައި ބުނާފަދަ ކަންކަން ހިމެނޭ ގޮތަށް، ކުޑަކުދިން ތިބުމަށް އެކަށީގެންވާ ތަނެއް ކަމަށެވެ. މިހާރު ފެންމަތިވެގެން އުޅެނީ، ކުރިންވެސް ޖަލުގައި ހުރި ޔުނިޓްގެ ވާހަކަ ކަމަށާއި، އެއީ މި ސަރުކާރުން ހަދާފައިވާ ޔުނިޓެއް ނޫން ކަމަށެވެ.
ބޮޑެތި ޖިނާއީ ކުށްތަކުގައި ހައްޔަރުކުރާ ކުޑަކުދިން ބައިތިއްބާނެ ޚާއްސަ ތަނެއް ނެތުމުން ގޭ ބަންދަށް ނުވަތަ ރަށު ބަންދަށް ބަދަލުކުރަން ޖެހޭ ކަމުގެ ކަންބޮޑުވުން ޕީޖީންވެސް ވަނީ ފައުޅުކޮށްފައެވެ.
އިމްރާން ވިދާޅުވީ، ކުށަށް ހުށަހެޅޭ ކުޑަކުދިން އަނބުރާ މުޖުތަމައަށް ނެރުމަށް މަަސައްކަތްތައް ފްރޭމް ކުރެވި، މިހާރު އެމަސައްކަތްތައް ފަށާފައިވާ ކަމަށެވެ. ކުޑަކުދިންގެ އަދުލުގެ ގާނޫނު 2019ވަނަ އަހަރު ވުޖޫދު ވެގެންދިޔުމާއެކު، އެގާނޫނުން ކުޑަކުދިންގެ ތެރެއިން ކުށަށް ހުށަހެޅޭ ކުދިންނަށް ބޮޑެތި އަދަބު ދިިނުމުގެ ބަދަލުގައި، ޚާއްސަ ޕްރޮގްރާމެއްގެ ތެރެއިން އެކުދިން މުޖުތަމައަށް ނެރުމަށް މަސައްކަތް ކުރެވޭ ކަމަށެވެ.
ކުރިން ޔުނިޓެއްގެ ގޮތުގައި ޖުވެނައިލް ޖަސްޓިސް ޔުނިޓް އޮތް ނަމަވެވެސް އެއީ މިހާރު ވަކި ޑިޕާރޓްމެންޓެއް ކަމަށެވެ. އެގޮތުން ޑިޕާރޓްމެންޓް އޮފް ޖުވެނައިލް ޖަސްޓިސް ޔުނިޓް އުފައްދައި، އެ ޑިޕާރޓްމެންޓްގެ ދަށުން ކުރަންޖެހޭ އެންމެ މުހިންމު އެއް މަސައްކަތް ކަމަށްވާ ރެސިޑެންޝަލް ޓްރީޓްމެންޓް ސެންޓަރ ގާއިމްކުރަން މިހާރު ފަށާފައިވާ ކަމަށެވެ. އެގޮތުން ދ.ކުޑަހުވަދޫގައި އެ ސެންޓަރު ގާއިމް ކުރެވި ފަރުވާގެ ނިޒާމް ފެށިގެން ކުރިއަށްދާ ކަމަށް އިމްރާން ވިދާޅުވިއެވެ. އެތަނުން ފަރުވާ ހޯދާ ކުދިން އަނބުރާ މުޖުތަމައަށް ނެރުމަށް ހާފް ވޭ ހައުސް ތަކެއް ގާއިމް ކުރެވިގެންދާނެ ކަމަށެވެ. ހާފްވޭ ހައުސްތައް ރާއްޖޭގެ އެކި ކަންކޮޅުތަކުގައި ގާއިމް ކުރުމަށް ހަމަޖެހިފައިވާއިރު، އަންނަ އަހަރު އޭގެތެރެއިން 2 ސެންޓަރު ގާއިމް ކުރެވިގެންދާނެ ކަމަށް ވިދާޅުވިއެވެ.
މުޖުތަމައުގެ ތެރޭގައި އުޅެމުންދާ ކުދިންގެ ތެރެއިން ކުށްތަކަށް ހުށަހެޅިދާނެ ކުދިން ދެނެގަނެ އެކުދިންނަށް ފަރުވާގެ ޕްރޮގްރާމް ކުރިއަށް ގެންދިޔުމަށްވެސް ގާނޫނު ލާޒިމްކުރެއެވެ.
ކުށްކުރާ ކުޑަކުދިންނާ ޑީލް ކުރާ ހުރިހާ އެންމެންނަށް ޚާއްސަ ޓްރެއިނިން ތަކެއް ދިނުމަށް ރާވާފައިވާއިރު، އެކަމަށް ޚާއްސަ ކޮމިޓީއެއް ކަނޑައަޅައި އެކަން ހޯމް މިނިސްޓްރީން މިހާރު އަންނަނީ ކުރަމުންނެވެ. ކޯޓުތަކުގައާއި އެހެން ތަންތަނުގައި އެކުދިން ރެޕްރެޒެންޓް ކުރާނީ އެ ކޮމިޓީގެ ބެލުމުގެ ދަށުންނެވެ.
