ބަލިމަޑުކަމެއްގެ ތެރެއިން އިގްތިސާދު ކޮޅަށް ޖަހައި ނަމޫނާ ދައްކައިފި

ކޮވިޑް-19 އަކީ މުޅި ދުނިޔެ ހުއްޓުމަކަށް ގެނުވި ބަލިމަޑުކަމެކެވެ. މިއީ މީގެ ކުރިން ދުވަހަކުވެސް ދެކިފައިނުވާ، އަދި ތަޖުރިބާކޮށްފައިވެސް ނުވާހާ ނުރައްކާތެރި ބައްޔެކެވެ. ދުނިޔޭގެ އެންމެ ބާރުގަދަ ގައުމުތައްވެސް ހުއްޓުވާލިއެވެ. އިގްތިސާދުތައް ހުއްޓި، ދަތުރުފަތުރާއި، އިޖުތިމާއީ މިނޫންވެސް ކަންކަން ހުއްޓުވާލިއެވެ. ރާއްޖެއިންވެސް ހަމަ މިކަންކަން ތަޖުރިބާކުރަންޖެހުނެވެ. ރާއްޖޭގެ އިގްތިސާދު އޭގެ މައްޗަށް ބިނާވެފައިވާ ފަތުރުވެރިކަން ހުއްޓުމަކަށް އައެވެ. ރައްޔިތުން ގޭގައި ބަންދުވެފައި ތިބެން ޖެހުނެވެ.

މިއީ މީގެ ކުރިން އައި ސަރުކާރަކުން ތަހައްމަލްކުރަންޖެހުނު ވަބާއެއް ނޫނެވެ. އެހެންނަމަވެސް މިކަމުން އަރައިގަނެ ރާއްޖޭގެ އިގްތިސާދު ފަށައިގަންނާނެ ގޮތްތަކެއް ސަރުކާރުން ހޯދިއެވެ. އެގޮތުން ކޮވިޑް-19އަށް ވެކްސިނެއް ހޯދުމާއެކު އިގްތިސާދު ކޮޅަށް ޖެހުމުގެ މަސައްކަތް ފަށައިގަތެވެ. ރާއްޖެ އަނެއްކާވެސް ފަތުރުވެރިންނަށް ހުޅުވާލިއެވެ. ރިސޯޓުތަކާއި، ގެސްޓްހައުސްތައް ފަދަ ތަންތަން ހުޅުވާލައި، ރާއްޖެ "އެކްޓިވް" ވިއެވެ.

އެހެންނަމަވެސް ގިނަ ގޮންޖެހުންތަކަކާއެކުއެވެ. މިފަދަ އާލަމީ ވަބާއެއްގެ ތެރޭގައި އިގްތިސާދު ފަށައިގަތުމަކީ ފަސޭހަކަމަކަށް ނުވާނެއެވެ. ރާއްޖޭގައި ކޮވިޑް-19 މުޅިން ކޮންޓްރޯލްނުވާތީ ކޭސްތައް ދޭތެރެ ދޭތެރެއިން މައްޗަށް ދިޔަތަން އައެވެ. އެފަދަ ކޮންމެ ހާލަތެއްގައިވެސް އަޅަންޖެހެނީ ހަރުކަށި ފިޔަވަޅުތަކެވެ. އެހެންނަމަވެސް ވެކްސިން ތައާރަފުވެ ރާއްޖެއިން ފެންނަ ކޭސްތައް މިހާރު ވަނީ ވަރަށް ބޮޑަށް މަދުކުރެވިފައެވެ. މީގެ އިތުރުން އެހެން ގައުމުތަކުން ރާއްޖެ ބަލައިނުގަތުމަކީވެސް މިކަމުގެ ކުރީކޮޅުގައި ދިމާވި އެއް ކަމެވެ. އެހެންނަމަވެސް ރާއްޖެއިން ގެންގުޅުނު ހަރުދަނާ ސިޔާސަތުތަކުގެ ސަބަބުން ގައުމުތަކުގެ އިތުބާރުވެސް މިހާރު މިވަނީ ރާއްޖެއަށް ލިބިފައެވެ.

ކޮވިޑާއި ގުޅިގެން ބޯޑަރު ބަންދުކުރުމަށްފަހު ބޯޑަރު ހުޅުވާލީ 2020 ވަނަ އަހަރުގެ ޖުލައި 15 ގައެވެ. ބޯޑަރު ހުޅުވާލިތާ މިހާރު އަހަރަކާ 4 މަސް ފާއިތުވެފައިވާއިރު، މިހާރު ރާއްޖޭގެ ފަތުރުވެރިކަމަށް ބަލާލާއިރު، ފެންނަނީ ކޮވިޑްގެ ހާލަތުގެ ކުރިން ފަތުރުވެރިން ރާއްޖެ އައި މިންވަރާ ގާތްކުރާ ތަނެވެ. ވަކިން ޚާއްސަކޮށް މި އަހަރުގެ ޖުލައި މަހުން ފެށިގެން މިކަން ފާހަގަކުރެވެން ވަނީ ފަށާފައެވެ.

2019 ވަނަ އަހަރުގެ ޖުލައި މަހު 132،144 ފަތުރުވެރިން ރާއްޖެ އައިސްފައިވާއިރު، މިއަހަރުގެ ޖުލައި މަހު 101،818 ފަތުރުވެރިން ވަނީ ރާއްޖެ އައިސްފައެވެ. 2019 ވަނަ އަހަރުގެ އޮގަސްޓު މަހު 139،338 ފަތުރުވެރިން ރާއްޖެ އައިސްފައިވާއިރު، މިއަހަރުގެ އޮގަސްޓު މަހު 143،599 ފަތުރުވެރިން ރާއްޖެ އައިސްފައިވެއެވެ. 2019 ވަނަ އަހަރުގެ ސެޕްޓެމްބަރުމަހު 117،619 ފަތުރުވެރިން އައިސްފައިވާއިރު، މިއަހަރު 114،896 ފަތުރުވެރިން ވަނީ އައިސްފައެވެ. މީގެ އިތުރުން އޮކްޓޯބަރު މަހު 141،928 ފަތުރުވެރިން އައިސްފައިވާއިރު، މިއަހަރު 142،066 ފަތުރުވެރިން ވަނީ ރާއްޖެ އައިސްފައެވެ. މި މުއްދަތުގައި ރާއްޖެ އައި ފަތުރުވެރިންގެ އަދަދާ 2019 ވަނަ އަހަރު އައި ފަތުރުވެރިންގެ އަދަދުގައި އުޅެނީ ވަރަށްވެސް ކުޑަ ފަރަގެކެވެ.

މި ހިނގާ ނޮވެމްބަރު މަހަށް ބަލާލާއިރު، ނޮވެމްބަރު 1 އިން 17 އާ ދެމެދުގައި 2019 ވަނަ އަހަރު އައިސްފައިވަނީ 78،224 ފަތުރުވެރިންނެވެ. މިއަހަރުގެ މި މުއްދަތުގައި މި އަދަދު ވަނީ 79،177 އަށް އަރާފައެވެ. މިއާއެކު މިއަހަރުގެ މިހާތަނަށް ރާއްޖެ ޒިޔާރަތްކުރި ފަތުރުވެރިންގެ އަދަދު 1،092،105 އަށް ވަނީ އަރާފައެވެ. ރާއްޖޭގެ ފަތުރުވެރިކަން މި ދާ ރޭޓުން ދާނަމަ އަހަރު ނިމުމުގެ ކުރިން 1.3 މިލިއަން ފަތުރުވެރިން ގެނައުމަށް ސަރުކާރުން މިހާރު ވަނީ އަމާޒު ހިފާފައެވެ.

މި އަމާޒަށް ވާސިލްވުމަށް މަސައްކަތްކުރަމުންދާއިރު، ރާއްޖެއިން ގެންދަނީ އެކި އެކި ފޯރަމްތަކުގައާއި އެކި ޕްލެޓްފޯމުތަކުގައިވެސް ރާއްޖެ އިޝްތިހާރުކުރުމުގެ މަސައްކަތް ކުރަމުންނެވެ. މިގޮތުން ދުނިޔޭގެ އެންމެ ގިނަ ބަޔަކު ޒިޔާރަތްކުރާ ވޯލްޑް އެކްސްޕޯގެ ތެރެއިން ރާއްޖެ އިޝްތިހާރުކުރުމުގެ މަސައްކަތް ދަނީ ކުރަމުންނެވެ. އަދި ރާއްޖޭގެ އިގްތިސާދީ ހަރަކާތް ފުޅާކޮށް އިތުރު އިންވެސްޓްމެންޓުތައް ގެނައުމަށް ފަތުރުވެރިކަމުގެ ބޭނުމަށް ރާއްޖޭގެ ރަށްތައް ކުއްޔަށް ދޫކުރުމަށް އެ ރަށްތައް އިޝްތިހާރުކުރުމުގެ މަސައްކަތްވެސް މި އެކްސްޕޯގެ ތެރެއިން ދަނީ ކުރަމުންނެވެ.

މި ދާއިރާގެ މާހިރުން ބުނާގޮތުންނަމަ ރާއްޖޭގެ އިގްތިސާދު މިހާރު މިވަނީ ފަށއިގަނެވިފައެވެ. މިގޮތަށް އިގްތިސާދީ ހަރަކާތްތައް ކުރިއަށްދާނަމަ 2022 ނުވަތަ 2023 ވަނަ އަހަރު އިގްތިސާދު އެއްކޮށް ރަނގަޅުވެ ފައްކާވެގެންދާނެކަމަށް އިގްތިސާދީ މާހިރުން ގަބޫލުކުރެއެވެ.