މި ސަރަހައްދުން މި އަހަރު އެންމެ ބޮޑަށް އިގްތިސާދީގޮތުން ކުރިއަރާނެ ގައުމެއްކަަމަށް ބެލެވެނީ ރާއްޖެ
11 ޖެނުއަރީ 2023 | ބުދަ 13:53މިއީ އެ ބޭންކުން މީގެކުރިން ލަފާކޮށްފައިވާ އަދަދަށްވުރެ %2 ދަށް އަދަދެއް
ފަތުރުވެރިން
މި ސަރައްދުގެ ގައުމުތަކުގެ ތެރެއިން މިއަހަރު އެންމެ ބާރު ސްޕީޑްގައި ކުރިއަރާނެކަމަށް ބެލެވެނީ ރާއްޖޭގެ އިގްތިސާދުކަމަށް، ވޯލްޑް ބޭންކުން ބުނެފިއެވެ.
ދުނިޔޭގެ އިގްތިސާދު މަސްރަހު ދިރާސާކުރުމަށްފަހު ވޯލްޑް ބޭންކުން އާއްމުކުރި ގްލޯބަލް އިކޮނޮމިކް ޕްރޮސްޕެކްޓްސް ރިޕޯޓްގައި ބުނެފައިވަނީ، ދެކުނު އޭޝިއާ ސަރަހައްދުގެ ގައުމުތަކުގެ ތެރެއިން ރާއްޖޭގެ އިގްތިސާދު %8.2ށް ކުރިއަރާނެ ކަމަށެވެ. މި ސަރަހައްދުން އެންމެ ބޮޑަށް ކުރިއަރާނީ ރާއްޖެ ކަމަށް ބުނިނަމަވެސް މިއީ އެބޭންކުން މީގެކުރިން ލަފާކޮށްފައިވާ އަދަދަށްވުރެ %2 ދަށް އަދަދެއްކަން ފާހަގަކޮށްލެވެއެވެ.
ރާއްޖޭގެ އިގްތިސާދު %12.4ށް ކުރިއަރާނެކަމަށް މީގެ ކުރިން ވޯލްޑް ބޭންކުން ވަނީ ބުނެފައެވެ. އެ އަދަދު ދަށްވެފައިވަނީ ކޮވިޑަށްފަހު އިގްތިސާދީ ކުރިއެރުން ލިބެމުން އައި ސްޕީޑް މި އަހަރު މަޑުޖެހި، އާންމު ހާލަތަށް ގައުމު ދާނެ ކަމަށް ބެލެވޭތީއެވެ. އެ ރިޕޯޓްގައި ވާގޮތުން އެންމެ ބޮޑު ކުރިއެރުމެއް ލިބޭނީ ފަތުރުވެރިކަމުގެ ސިނާއަތަށެވެ. އަދި ރާއްޖެއަށް ޒިޔާރަތްކުރާ ފަތުރުވެރިންގެ އަދަދު އިތުރުވާނެ ކަމަށް ވަނީ ބުނެފައެވެ.
ކޮވިޑަށްފަހު އިގްތިސާދު ކުރިއެރުވުމަށް މަސައްކަތް ކުރަމުންދާއިރު، ކޮވިޑް-19ގެ ފިޔަވަޅުތަކާއެކު ގައުމުތަކަށް ފަތުރުވެރިން ޒިޔާރަތްކުރާ އަދަދު ވަނީ ދަށްވެފައެވެ. އެކަމުގެ ސަބަބުން އެ ގައުމުތަކަށް ބޭރު ފައިސާގެގޮތުގައި ލިބޭ އާމްދަނީ ވަރަށް ބޮޑުތަން މަދުވެފައިވާކަމަށް ވޯލްޑް ބޭންކުން ވަނީ ބުނެފައެވެ.
ރާއްޖޭގެ އިގްތިސާދު ކުރިއެރިނަމަވެސް، ގިނަ ގޮންޖެހުންތަކެއް ދިމާވާނެ ކަމަށް ވޯލްޑް ބޭންކުން ވަނީ ބުނެފައެވެ. ވޯލްޑް ބޭންކުން ބުނީ، ޔޫރަޕާއި އެމެރިކާގެ އިގްތިސާދަށް ދިމާވާ ހީނަރުކަމުގެ ހާލަތު ރާއްޖެއަށް ކުރާނެކަމަށެވެ. މީގެއިތުރުން، ކުދި ގައުމުތަކަށް ބަލާއިރު ރާއްޖެއަކީ ދަރަނީގެ ރިސްކްބޮޑު ގައުމެއްކަމަށް އެ ރިޕޯޓްގައިވެއެވެ. އެ ރިޕޯޓްގައި ބުނެފައިވަނީ ދުނިޔޭގެ މާލީ ބާޒާރުގައި އިންޓަރެސްޓް ރޭޓްތައް ބޮޑުވެގެން ދިއުމާއެކު ދަރަނި ދެއްކުމުގައި ދަތިތަކާ ކުރިމަތިލާން ޖެހޭނެ ކަމަށެވެ.
