މިއީ އެއް ދައުލަތެއް ކަމަށާއި، ދައުލަތުގެ އެކި އިދާރާތަކުން ދައްކާ ވާހަކަވެސް އެއްގޮތްވާން އެބަޖެހޭކަމަށް ކުރީގެ ކޮމިޝަނަރ ޖެނެރަލް އޮފް ޓެކްސޭޝަން ފަތުހުﷲ ޖަމީލް ވިދާޅުވެއްޖެއެވެ.
ފަތުހުﷲ އެހެން ވިދާޅުވީ ރާއްޖެޓީވީގެ ޓީވީޓޯކް ޕްރޮގްރާމްގައި ވާހަކަ ދައްކަވަމުންނެވެ.
އޭނާ ވިދާޅުވީ، ދައުލަތެއްގެ ގޮތުގައި ހިނގާއިރު، ދައުލަތުގެ އިދާރާތަކުން ދައްކާ ވާހަކަތައް ދިމާވާން ޖެހޭ ކަމަށެވެ. އެގޮތުން އެއްކޮޅުން ޤައުމު ބަނގުރޫޓުވެއޭ ކިޔާއިރު، ދައުލަތުގެ އަނެއް އިދާރާއިން އެއާ ޚިލާފަށް ވާހަކަ ދައްކާކަން އޭނާ ފާހަގަ ކުރެއްވިއެވެ.
ފަތުހުﷲ ވިދާޅުވީ، މިއަދުގެ ސަރުކާރު ބޮޑަށް ސިފަ ކުރެވެނީ "ޕޮޕިއުލަރިޓީ ކޮންޓެސްޓެއް" ގެ ގޮތުގައި ކަމަށެވެ. އެގޮތުން މަޤުބޫލުކަން ހޯދުމަށްޓަކައި މަޖިލިސް މެމްބަރުންގެ މުސާރަ ކުޑަވާން ޖެހޭ ވާހަކަ އެއްކޮޅުން ދައްކާއިރު، ބަހާ އަމަލާ ދިމާނުވާކަން އޭނާ ފާހަގަ ކުރެއްވިއެވެ.
ފުރަތަމަ ކަމަކީ ދައުލަތެއްގެ ގޮތުގައި ހިނގާއިރު މި ހުރިހާ ތަންތަނުންވެސް އެބަޖެހޭ ފުރަތަމަ ކަމަކަށް އެކައްޗެއް ކިޔަން، ބަނގުރޫޓުވާނޭވެސް އެބަ ކިޔާ، ބަނގުރޫޓު ނުވާނޭވެސް އެބަކިޔާ، ވަރަށް ހާލުގައޭ، ހާލުގައި ނުޖެހޭނޭ، އެ މެސެޖު ރައްޔިތުންނަށް ސާފުވާން އެބަޖެހޭކުރީގެ ކޮމިޝަނަރ ޖެނެރަލް އޮފް ޓެކްސޭޝަން ފަތުހުﷲ ޖަމީލް
އޭގެ އިތުރުން، ސަރުކާރުން މަސައްކަތް ކުރަނީ އާންމުން ބަަލައިގަންނާނެ ފަދަ ވާހަކަ ދައްކައިގެން މަޤްބޫލުކަން ހޯދުމަށްކަމަށްވެސް އޭނާ ވިދާޅުވިއެވެ.
ސަރުކާރުގެ ސިޔާސީ މަގާމުތަކުގެ އަދަދު އިންތިހާއަށް ގިނަވެ އެތައް ސަތޭކަ މިލިއަން ރުފިޔާއެއް މުވައްޒަފުންގެ މުސާރައަށް ހަރަދުކުރަންޖެހި، މާލީ އަދި އިގްތިސާދީ ހަރުދަނާ ފިޔަވަޅުތަކެއް އަޅާފައި ނުވާތީ ރާއްޖެއަށް އަންނަނީ އެކަމުގެ ނޭދެވޭ އަސަރުކުރަމުންނެވެ.
