ރާއްޖެ އައި ފަތުރުވެރިންގެ އަދަދު 700،000ށް އަރައިފި
މިހާތަނަށް އައި ފަތުރުވެރިންގެ އަދަދު ވަނީ މިދިޔަ އަހަރާ އަޅާ ބަލާއިރު 55 އިންސައްތަ އިތުރުވެފައި
ފަތުރުވެރިންތަކެއް ފްލައިޓުން ފައިބަނީ
މިއަހަރުގެ މިހާތަނަށް ރާއްޖެ އައި ފަތުރުވެރިންގެ އަދަދު 706،468ށް އަރައިފިއެވެ.
ޓޫރިޒަމް މިނިސްޓްރީން އާއްމުކޮށްފައިވާ ތަފާސްހިސާބުތައް ދައްކާގޮތުގައި މިދިޔަ ބުދަ ދުވަހުގެ ނިޔަލަށް ރާއްޖެ އައި ފަތުރުވެރިންގެ އަދަދު ވަނީ 2021 ވަނަ އަހަރުގެ މި މުއްދަތާ އަޅާބަލާއިރު 55 އިންސައްތަ އިތުރުވެފައެވެ. ނަމަވެސް 2019ވަނަ އަހަރާ އަޅާބަލާއިރު މިއީ 6.1 އިންސައްތައިގެ ދަށްވުމެކެވެ.
ކޮވިޑް-19އާ ގުޅިގެން ރާއްޖެއަށް އަންނަ ފަތުރުވެރިންގެ އަދަދު ވަރަށް ބޮޑަށް ދަށްވިއެވެ. ނަމަވެސް މިއަހަރުގެ ތަފާސްހިސާބުތައް ދައްކާ ގޮތުގައި އެ ދާއިރާ ދަނީ ކުރިއަރަމުންނެވެ. މިއަހަރު ރާއްޖޭގެ ފަތުރުވެރިކަމުގެ ދާއިރާ 2019ވަނަ އަހަރު އޮތް ވަރަށް ރިކަވަރކުރެވޭނެކަމަށް ވަނީ ލަފާ ކޮށްފައެވެ.
މިއަހަރު ރާއްޖެއަށް އަންނަ ފަތުރުވެރިންގެ އަދަދު ފާއިތުވި 2 އަހަރާ އަޅާބަލާއިރު އިތުރުވެފައިވާއިރު، މިއަހަރު ދުވާލަކު އެވްރެޖުކޮށް 4،648 ފަތުރުވެރިން ރާއްޖެއަށް ޒިޔާރަތް ކުރެއެވެ. އަދި ފަތުރުވެރިން ރާއްޖޭގައި ހޭދަކުރާ ދުވަހުގެ އަދަދު ވަނީ އެވްރެޖުކޮށް 8.2ށް އިތުރުވެފައެވެ.
ޓޫރިޒަމް މިނިސްޓްރީގެ ތަފާސްހިސާބުތައް ދައްކާ ގޮތުގައި މިއަހަރުގެ މިހާތަނަށް އެންމެ ގިނަ ފަތުރުވެރިން ޒިޔާރަތް ކުރީ އިންޑިއާއިންނެވެ. އެ ހައުމުން މިހާތަނަށް 99،614 ފަތުރުވެރިން ޒިޔާރަތްކޮށްފައިވާއިރު، ދެވަނައަށް އެންމެ ގިނައިން ފަތުރުވެރިން ޒިޔާރަތްކުރި އިނިިރޭސިވިލާތުން އައީ 88،043 ފަތުރުވެރިންނެވެ. މި ލިސްޓުގެ 3 ވަނައިގައި ރަޝިއާ އޮތްއިރު، އެ ގައުމުން ވަނީ މިހާތަނަށް 67،088 ފަތުރުވެރިން ޒިޔާރަތް ކޮށްފައެވެ.
ރަޝިއާއާ ޔޫކްރޭނާ ދެމެދު މިހާރު ކުރިއަށްދާ ހަމަނުޖެހުންތަކުގެ ސަބަބުން ފާއިތުވި މަސްތަކުގައި ރަޝިއާ ފަތުރުވެރިންގެ އަދަދު ވަނީ ދަށްވެފައެވެ. ނަމަވެސް އަލުން އެ ގައުމުން ދަތުރުތައް ފެށުމާއެކު މި އަދަދު ދަނީ އިތުރުވަމުންނެވެ.
މިއަހަރުގެ މެއި މަސް ނިމުނުއިރު ރާއްޖެއަށް ބައިނަލްއަގުވާމީ 24 އެއަރލައިނަކުން އަންނަނީ ދަތުރުކުރަމުންނެވެ. މީގެ ތެރޭގައި ގަތަރު އެއަރވޭސްއާއި އެމިރޭޓްސްއާއި އިއްތިހާދު އެއަރވޭސްއާއި ގޯ އެއާއާއި އިންޑިގޯއާއި ކޮންޑޯއާއި ބްރިޓިޝް އެއަރވޭސްއާއި އެއިރޯފްލޮޓް ފަދަ ބޮޑެތި އެއާލައިންތައް ހިމެނެއެވެ.
މިއަހަރު ފަތުރުވެރިން އަންނަ އަދަދަށް ބަލައި ޓޫރިޒަމް މިނިސްޓްރީން ލަފާ ކުރާ ގޮތުގައި، އަހަރު ނިމޭއިރު 1.6 މިލިއަން ފަތުރުވެރިން ރާއްޖެއަށް ޒިޔާރަތް ކުރާނެއެވެ. މިދިޔަ އަހަރުވެސް ރާއްޖެއަށް 1 މިލިއަނަށްވުރެ ގިނަ ފަތުރުވެރިން ޒިޔާރަތް ކުރިއެވެ.
ކޮވިޑް-19އާ ގުޅިގެން ރާއްޖެއިން އެޅި ރައްކާތެރިކަމުގެ ފިޔަވަޅުތަކާއެކު ފަތުރުވެރިކަމަށް ރާއްޖެ ހުޅުވާލުމުން އެކި ހައުމުތަކުން ވަނީ ރާއްޖެއަކީ ނަމޫނާ ގައުމެއް ކަމަށް ބުނެފައެވެ. އަދި 2020 ވަނަ އަހަރާއި 2021 ވަނަ އަހަރުގެ ދުނިޔޭގެ އެންމެ މަގުބޫލު މަންޒިލުގެ ލަގަބުވެސް ރާއްޖޭން ވަނީ ކާމިޔާބުކޮށްފައެވެ.
