މިއަހަރުގެ މިހާތަނަށް ރާއްޖެ އައި ފަތުރުވެރިންގެ އަދަދު ފާއިތުވި އަހަރުގެ މި މުއްދަތާ އަޅާ ބަލާއިރު 47.1 އިންސައްތަ އިތުރުވެފައިވާކަމަށް ޓޫރިޒަމް މިނިސްޓްރީން ހާމަކޮށްފިއެވެ.

ޓޫރިޒަމް މިނިސްޓްރީން އާންމުކޮށްފައިވާ ތަފާސްހިސާބުތައް ދައްކާގޮތުން އަހަރުގެ މިހާތަނަށް ރާއްޖެ އައިސްފައިވަނީ 560،996 ފަތުރުވެރިންނެވެ. މިދިޔަ އަހަރުގެ މި މުއްދަތުގައި އައިސްފައިވަނީ 381،426 ފަތުރުވެރިންނެވެ. މިއަހަރު ރާއްޖެ އައި ފަތުރުވެރިންގެ އަދަދު 47.1 އިންސައްތަ އިތުރުކަމަށް މިނިސްޓްރީން ބުނެއެވެ.

ފާއިތުވި އަހަރާ އަޅާ ބަލާއިރު މިއަހަރުގެ ހުރިހާ މަހެއްގައިވެސް ފަތުރުވެރިން އަންނަމުންދާ އަދަދު އިތުރެވެ. އަހަރުގެ ފުރަތަމަ މަހު 131،764 ފަތުރުވެރިން އައިސްފައިވާއިރު، 2021 ވަނަ އަހަރުގެ މި މުއްދަތުގައި އައިސްފައިވަނީ 92،103 ފަތުރުވެރިންނެވެ. މިއަހަރުގެ ފެބްރުއަރީ މަހު 149،008 ފަތުރުވެރިން އައިސްފައިވާއިރު، މިދިޔަ އަހަރުގެ ފެބްރުއަރީ މަހު އައިސްފައިވަނީ 96،882 ފަތުރުވެރިންނެވެ. މިއަހަރުގެ މާރޗް މަހު 150،739 ފަތުރުވެރިން ރާއްޖެ އައިސްފައިވާއިރު، މިދިޔަ އަހަރު އައިސްފައިވަނީ 109،585 ފަތުރުވެރިންނެވެ. ނިމިދިޔަ އޭޕްރިލް މަހަށް ބަލާލިޔަސް އަދަދުތައް ފެންނަމުންދަނީ މިފަދަ ގޮތަކަށެވެ. މިއަހަރުގެ އޭޕްރިލް މަސް ނިމުނުއިރު އެއް ލައްކައަށްވުރެ ގިނަ ފަތުރުވެރިން އައިސްފައިވާއިރު 2021 ވަނަ އަހަރުގެ އޭޕްރިލް މަސް ނިމުނީ 82،856 ފަތުރުވެރިންނާއެކުއެވެ.

2021 ވަނަ އަހަރާ އަޅާ ބަލާއިރު ފަތުރުވެރިން އައި މިންވަރު އިތުރުވެފައިވީނަމަވެސް 2019 ވަނަ އަހަރު ފަތުރުވެރިން އައި މިންވަރަށްވުރެ އަދިވެސް މި އަދަދުތައް މަދެވެ. އެހެންނަމަވެސް 2019 ވަނަ އަހަރުގެ އަދަދުތަކާ މި އަދަދުތައް މިހާރު އަންނަނީ ކައިރި ކުރަމުންނެވެ. މިއީ ފަތުރުވެރިކަމުގެ ރިކަވަރީއަށް ރަނގަޅު މަސައްކަތްތަކެއް ކުރެވިފައިވާކަން ހާމަކޮށްދޭ ކަމެއް ކަމުގައި ސަރުކާރުން ދެކެއެވެ.

މިއަދަދުތައް އިތުރަށް ރަނގަޅުކުރުމަށް ސަރުކާރުން މިހާރުވެސް ގެންދަނީ ގިނަ މަސައްކަތްތަކެއް ކުރަމުންނެވެ. މިގޮތުން އެކި މާކެޓުތަކުގައި ރާއްޖެ އިޝްތިހާރުކުރުން ހިމެނެއެވެ. ދުނިޔޭގެ ފެންވަރުގައި ރާއްޖެ އިޝްތިހާރުކުރުމުގެ ޒިންމާ އުފުލާ ކުންފުނީގެ ހައިސިއްޔަތުން އެމްއެމްޕީއާރްސީއިން ވޭތުވެދިޔަ އަހަރު ކޮށްފައިވާ މަސައްކަތްތަކަށް ބަލާއިރު، އިންޑަސްޓްރީގެ ޕާޓްނަރުންނާއެކު 22 މާކެޓެއްގައި 260 ހަރަކާތް ވަނީ ހިންގާފައެވެ. މީގެތެރޭގައި ފެއާރތަކާއި އެގްޒިބިޝަންތަކުގައި ބައިވެރިވުމުގެ އިތުރުން، އެކި ޤައުމުތަކުގައި ރޯޑްޝޯތައް ވެސް ވަނީ ބާއްވާފައެވެ. އަދި ވެބިނާތަކާއި، ފެމިލަރައިޒޭޝަން ދަތުރުތަކުގެ އިތުރުން މާކެޓިން ކެމްޕެއިންތައް ވަނީ ހިންގާފައެވެ.

ދުނިޔޭގެ ހުރިހާ ކަންކޮޅެއްގައިވެސް ރާއްޖެއަކީ ފަތުރުވެރިންގެ އިތުބާރު ލިބިފައިވާ މަންޒިލެއްކަމަށް ހެކިވާ އެންމެ އަލިގަދަ ނިޝާނަކަށް ވެގެންދިޔައީ، 'ވޯލްޑް ޓްރެވަލް އެވޯރޑްސް' (ޑަބްލިއުޓީއޭ) 2021ގައި 'ވޯލްޑްސް ލީޑިންގް ޑެސްޓިނޭޝަން' ގެ ލަގަބު ޖެހިޖެހިގެން ދެވަނަ އަހަރަށް ރާއްޖެއަށް ކާމިޔާބު ކުރެވުނުކަމެވެ. މީގެ އިތުރުންވެސް ދިވެހިރާއްޖެއިން ވަނީ ޑަބްލިއުޓީއޭ 2021ގައި އެތައް ޚާއްސަ އެވޯޑްތަކެއް ޙާސިލްކޮށްފައެވެ. މީގެ ދެ އަހަރު ކުރިން އިއުލާން ކުރި ސިއްޙީ ކުުއްލި ނުރައްކަލުގެ ހާލަތު ވަނީ މާރޗު 13 ގައި އުވާލާފައެވެ. ދަތުރުފަތުރުކުރުމަށް އެޅިފައިވާ ފިޔަވަޅުތަކާއި ކޮވިޑްގެ އިތުރު ފިޔަވަޅުތަކަށް ލުއިދިނުމާއި ގުޅިގެން ރާއްޖެއަށް ދަތުރުކުރުމަށް ފަތުރުވެރިންނަށް އިތުުރު ފަސޭހަތަކެއް ލިބިގެންދިޔައެވެ.

ކުރިޔަށް މިދާ އަހަރަކީ ދިވެހިރާއްޖޭގެ ފަތުރުވެރިކަމުގެ ތާރީޚުގައި ވަރަށް ޚާއްސަ އަހަރެކެވެ. ރާއްޖޭގެ ފަތުރުވެރިކަމަށް 50 އަހަރު ފުރުން ފާހަގަކުރުމުގެ ޚާއްސަ ހަރަކާތްތައް މިދިޔަ އަހަރު ފަށައިގަތީ ކުލަގަދަ ހަރަކާތްތަަކަކާ އެކުގައެވެ. އެމްއެމްޕީއާރްސީގެ ފަރާތުން ރާއްޖޭގެ ޓޫރިޒަމްގެ ރަން ޔޫބީލް ފާހަގަކުރުމަށް އެތައް ހަރަކާތްތަކެއް ތާވަލްކޮށްފައިވެސް ވެއެވެ.