ޗެލްސީއަށް ކުޅެމުން އަންނަ މޮރޮކޯގެ މިޑްފީލްޑަރު ހަކީމް ޒިޔެކް ހޯދަން ބާސެލޯނާއިން މަސައްކަތްކުރަމުން އަންނަ ކަމަށް ރިޕޯޓުތައް ބުނެފިއެވެ.

މީގެ ކުރިން އަޔަކްސްގައި ވިދާލި އުމުރުން 28 އަހަރުގެ ޒިޔެކްގެ ސޮއި ޗެލްސީން ހޯދީ މިދިޔަ އަހަރުގެ ފެބްރުއަރީ މަހުގެ ތެރޭގައެވެ. ޒިޔެކް ހޯދުމަށް ޗެލްސީން 44 މިލިޔަން ޔޫރޯ ޚަރަދުކުރި ކަމަށް ރިޕޯޓުތައް ބުނިއިރު، އޭނާ ވަނީ ޗެލްސީއާއެކު ފަސް އަހަރުގެ އެއްބަސްވުމެއް ހަދާފައެވެ. އެހެންކަމުން އެ އެއްބަސްވުމުގެ މުއްދަތު ހަމަވާނީ 2025 ވަނަ އަހަރުގެ ހޫނު މޫސުމުގައެވެ.

ރިޕޯޓުތައް ބުނާ ގޮތުން ޒިޔެކަކީ ބާސާގެ އައު ކޯޗު ޒަވީ ހެނާންޑޭޒް ފާރަލަމުން އަންނަ ކުޅުންތެރިއެކެވެ. އަދި އެ ޓީމުގެ ފޯވާޑް ލައިން އިތުރަށް ވަރުގަދަކުރުމަށް ޒިޔެކުގެ އިތުރުން މެންޗެސްޓާ ސިޓީއަށް ކުޅެމުން އަންނަ އިންގްލެންޑުގެ ފޯވާޑް ރަހީމް ސްޓާލިން ގެނައުމަށްވެސް ޒަވީ ބޭނުންވާ ކަމަށް ސްޕެއިނުގެ މީޑިއާތަކުން ވަނީ ރިޕޯޓުކޮށްފައެވެ.

އެއާއެކު ކުރިއަށް އޮތް ޖެނުއަރީ ޓްރާންސްފާގައި ޒިޔެކް ހޯދުމަށް ބާސާއިން މަސައްކަތްކުރާނެ ކަމަށް ބެލެވޭއިރު، އިނގިރޭސި މީޑިއާ ރިޕޯޓުތައް ބުނާ ގޮތުން ލޯނު އުސޫލުން ޒިޔެކް ދޫކޮށްލަން ޗެލްސީ އޮތީ ތައްޔާރަށެވެ.

ޒިޔެކް ހޯދަން ބާސާއިން މަސައްކަތްކުރަމުން އަންނައިރު، އޭނާއަކީ އަޔަކްސްއިން 2018-2019 ވަނަ ސީޒަނުގެ ޔުއެފާ ޗެމްޕިއަންސް ލީގުގެ ސެމީ ފައިނަލުން ފުރުސަތު ހޯދި ޓީމުގައި މޮޅު ކުޅުމެއް ދެއްކި ކުޅުންތެރިއެކެވެ. އަދި އޭނާ ވަނީ އެ ޓީމާއެކު ހަމަ އެ ސީޒަނުގެ ނެދަލެންޑްސް ލީގުވެސް ކާމިޔާބުކޮށްފައެވެ. އޭގެ ފަހުން ޗެލްސީއަށް ބަދަލުވެ އެ ޓީމަށް މިހާތަނަށް ކުޅެދިން 49 މެޗުން އަށް ލަނޑު ކާމިޔާބުކޮށްފައިވާ ޒިޔެކް ވަނީ އެ ޓީމާއެކު ޗެމްޕިއަންސް ލީގާއި ޔުއެފާ ސުޕަ ކަޕް ކާމިޔާބުކޮށްފައެވެ.