ކުދިކުދި ކުށްތަކުގައި އަދަބާ ބެހޭ ގޮތުން އެއްބަސްވެގެން ކޯޓަށް ހުށަހެޅުމަށް މަސައްކަތް ކުރަނީ
15 ނޮވެމްބަރު 2021 | ހޯމަ 05:01ކުދިކުދި މައްސަލަތަކުގައި ކުށަށް އިއުތިރާފްވާ މީހުންގެ ބައިގައި ކޯޓު މަރުހަލާ، އެއް ދުވަހުގެތެރޭގައި ނިންމިދާނެ
ޕީޖީ ހުސައިން ޝަމީމް ނޫސްވެރިންގެ ބައްދަލުވުމެއްގައި | ޕީޖީ އޮފީސް
ކުދިކުދި ކުށްތަކުގައި، އަދަބާ ގުޅޭ ގޮތުން އެއްބަސްވެގެން ކޯޓަށް ހުށަހެޅޭ ގޮތަށް އިޖުރާއަތަށް ބަދަލު ގެނައުމަށް ބަންޑާރަ ނައިބަށް ހުށަހަޅާފައިވާނެ ކަމަށް ޕްރޮސެކިއުޓަރ ޖެނެރަލް ހުސައިން ޝަމީމް ވިދާޅުވެއްޖެއެވެ.
އާދިއްތަ ދުވަހު ބޭއްވި ނޫސްވެރިންގެ ބައްދަލުވުމުގައި، ނޫސްވެރިން ކުރި ސުވާލުތަކަށް ޖަވާބު ދެއްވަމުން ޕީޖީ ވިދާޅުވީ، ޖިނާއީ ބޮޑެތި މައްސަލަތަކުގައި ކޯޓު މަރުހަލާތައް ލަސްކަމަށާއި، އެކަން އެހެން ދިމާވަނީ، ކުދި ކުދި މައްސަލަ ތަކުގައިވެސް ހެކިން ހާޒިރުކުރުމާއެކު ޝަރީއަތުގެ ހުރިހާ މަރުހަލާތަކެއް ކުރިއަށް ގެންދަން ޖެހުމުން ކަމަށެވެ. އޭގެ ބަދަލުގައި ކުދިކުދި މައްސަލަތަކުގައި ކުށަށް އިއުތިރާފްވާ މީހުންގެ ބައިގައި ކޯޓު މަރުހަލާ އެއް ދުވަހުގެތެރޭގައި ނިންމުމަށް ޖިނާއީ އިޖުރާއަތުގެ ގާނޫނަށް ބަދަލު ގެނެވިއްޖެ ނަމަ ބޮޑެތި ކުށްތަކުގައު ޝަރީއަތް ކުރުމަށް ފަސޭހަވެގެންދާނެ ކަމަށެވެ.
ރާއްޖޭގެ ގާނޫނުގައިވެސް އެކަން އެ ގޮތަށް ފަހި ކޮށްދީފައި އޮތް ނަމަވެސް އެކަން އޮންނަނީ ވަރަށް ހަނިކޮށްކަމަށް ޕީޖީ ވިދާޅުވިއެވެ. އެކަން ފުޅާކޮށް ކުރިއަށް އޮތް ތަނުގައި ކޯޓަށް ހުށަހަޅާ މައްސަލަތަކުގެ 40 ނުވަތަ 50 އިންސައްތައަކީ ވަކި ގޮތަކަށް އެއްބަސްވެވިގެންދާ މައްސަލަތައް ކަމުގައި ހެދުމަށް މަސައްކަތް ކުރައްވާނެ ކަަަމަށް ވިދާޅުވިއެވެ.
