215 ކިލޯ ޑްރަގް ކޭސް: ޝަރީއަތް ނިމެންދެން ދެ މީހުން ބަންދު

މަސްތުވާތަކެތި ހޯދުމަށް ފުލުހުން ހިންގި އޮޕަރޭޝަނެއްގެ ތެރެއިން ހޯދާފައިވާ 215 ކިލޯގެ މަސްތުވާތަކެއްޗާ ގުޅުންހުރި ކަމަށް ތުހުމަތުކުރެވޭ ދެ މީހުންވެސް ޝަރީއަތް ނިމެންދެން ބަންދުގައި ބަހައްޓަން ކްރިމިނަލް ކޯޓުން އަމުރުކޮށްފިއެވެ.

މި އޮޕަރޭޝަން ހިންގާފައިވަނީ މިދިޔަ މަހުގެ 15 ވަނަ ދުވަހުގެ ރޭގައެވެ. މި މައްސަލައިގައި ފުލުހުން ހައްޔަރުކޮށްފައި ވަނީ ރ. މަޑުއްވަރީ ފިނިފަރު، އަލީ ޝާކިރު 42، އާއި ރ. މަޑުއްވަރީ ފެހިއަލި، ނިމާލް އަބްދުލްހާރިސް 33، އެވެ.

މަސްތުވާތަކެތި ހޯދާފައިވަނީ, ރ. އަތޮޅުގެ ފަޅު ރަށެއް ކަމަށްވާ ޅާނބުގަލީގައެވެ. ޝާކިރާއި ނިމާލް ހައްޔަރުކުރީ "ފެށުން 2" ކިޔާ ލޯންޗެއްގައި ރ. މަޑުއްވަރި ބަނދަރު ސަރަހައްދަށް ވަތް ވަގުތު އެ ލޯންޗު ހުއްޓުވައި ބަލައި ފާސްކުރުމަށް ފަހުގައެވެ. އެ ދެ މީހުން ތިބި ލޯންޗުން ސެޓެލައިޓް ފޯނަކާއި ގިނަ އަދަދެއްގެ ޕެޓްރޯލް ހަން ފެނިފައިވެއެވެ. އަދި އެމީހުންގެ ހަށިގަނޑުގައި ވެލި ހުރުމާއި އެ މީހުން ދަތުުރުކުރި ލޯންޗުގެ އަރިމަތިން އިތުރު ބޯޓަކާއި ކައިިރިކުރުމުން ލޯންޗުގައި ކޫރުން ހުރިކަމުގެ ނިޝާންތައް ހުރުމަކީ އެމީހުންގެ މައްޗަށް ފުލުހުން ހުށަހަޅާފައިވާ ހެކިތަކެވެ. މީގެއިތުރުން ފުލުހުން ހޯދި ސެޓެލައިޓް ފޯނުގެ އެކްސްޓްރެކްޝަން ރިޕޯޓުން އެ މީހުން ރާއްޖެ ސަރަހައްދުން ބޭރަށް ނިކުމެ އެހެން ބޯޓަކާ ބައްދަލުކުރިކަން އެނގޭ މެސެޖުތަކެެއް ފެނުނު ކަމަށްވެސް ފުލުހުން ބުނެފައިވެއެވެ.

ދެ މީހުންގެ ބަންދާ މެދު ގޮތެއް ނިންމުމަށް ކްރިމިނަލް ކޯޓަށް ހާޒިރުކުރީ, ހޮނިހިރު ދުވަހު އެވެ.

މި މައްސލައިގައި ފުރަތަމަ އޮތް ބަންދުގެ މަޖިލީހުގައި ފުލުހުން ޝާކިރަށް އަނިޔާ ކޮށްފައިވާ ކަމަށް އޭނާ ވަނީ ބުނެފައެވެ. އެހެންކަމުން އޭރުވަނީ ޝާކިރު ޑޮކްޓަރަށް ދެއްކައި ސިއްޙީ ފަރުވާ ދިނުމަށް އަމުރުކޮށްފައެވެ. އެހެންނަމަވެސް ހޮނިހިރު ދުވަހު އޮތް ބަންދުގެ މަޖިލީހާ ހަަމައަށް އައިއިރުވެސް އޭނާ ޑޮކްޓަރަށް ދެއްކުމަށް އެދިފައިނުވާކަމަށް ބުނެ ފުލުހުން އޭނާ ޑޮކްރަށް ނުދައްކައެވެ. އެއަށް ރައްދުދީ ޝާކިރު ބުނީ, އޭނާ ބަންދު ކޮށްފައި ހުންނަނީ ދޫނިދޫގައި ހުންނަ ކަސްޓޯޑިއަލް ޖަލުގައި ކަމަށާއި, އެތަނުގައި ހުންނަ ޑޮކްޓަރު ދެނީ އެންމެ ބޭސް ގުޅައެއް ކަމަށެވެ. އަދި ރަނގަޅު ސިއްޙީ ފަރުވާ ބޭނުންވާ ކަމަށެވެ. އެހެންކަމުން ގާޒީ ވަނީ ޝާކިރު ޑޮކްޓަރަށް ދެއްކުމަށްފަހު 7 ދުވަހުގެތެރޭގައި ލިޔުންނަށް ކޯޓަށް ހުށަހެޅުމަށް އަމުރުކޮށްފައެވެ.

ފުލުހުން ވަނީ މިދިޔަ މަހުގެ 13 ވަނަ ދުވަހު 100 ކިލޯގެ މަސްތުވާތަކެތިވެސް އަތުލައިގަނެފައެވެ. އެ މައްސަލައިގައި 10 މީހަކު ހައްޔަރުކުރި ނަމަވެސް މިހާރު ބަންދުގައި ތިބީ ފަސް މީހުންނެވެ.