ޔާމީން ރަޝީދާއި ނަދީމުގެ މަރުގެ މައްސަލައިގެ ސިއްރު ހެކިން ލީކުވި މައްސަލައެއް!
14 ނޮވެމްބަރު 2021 | އާދީއްތަ 09:11ނަދީމް މަރާލި މައްސަލަ މިހާރު އޮތީ ޚުލާސާ ބަޔާން އިއްވުމުގެ މަރުޙަލާގައި
ޕްރޮސެކިއުޓަރ ޖެނެރަލް ހުސައިން ޝަމީމް
ޔާމީން ރަޝީދުގެ މަރުގެ މައްސަލައާއި ނަދީމުގެ މަރުގެ މައްސަލައިގެ ސިއްރު ހެކިން ލީކުވި މައްސަލަ ބަލަން ފުލުހުންނަށް ދަންނަވާފައިވާނެ ކަމަށް ޕްރޮސެކިއުޓަރ ޖެނެރަލް ހުސައިން ޝަމީމް ވިދާޅުވެއްޖެއެވެ.
އާދިއްތަ ދުވަހު އޮތް ނޫސްވެރިންގެ ބައްދަލުވުމުގައި ނޫސްވެރިއަކު ކުރި ސުވާލަކަށް ޖަވާބު ދެއްވަމުން ޕީޖީ ވިދާޅުވީ އެ މައްސަލަތަކުގައި ހިމެނޭ ސިއްރު ހެކިންގެ މައުލޫމާތު ލީކުވި މައްސަލައެއް ޕީޖީ އޮފީހުގެ ސަމާލުކަމަށް އައިސްފައިވާ ކަމަށެވެ. އަދި އެ މައްސަލަ ތަހުގީގު ކުރުމަށް ފުލުހުންނަށް ހުށައަޅާފައިވާނެ ކަމަށްވެސް ޕީޖީ ވިދާޅުވިއެވެ.
ޕީޖީ ވިދާޅުވީ، ބައެއް އެހެން މައްސަލަތަކުގައިވެސް ސިއްރު ހެކިންގެ މައުލޫމާތު ލީކުވާކަމަށް މައުލޫމާތު ލިބޭ ކަމަށެވެ. މިފަހުންވެސް އެފަދަ ދެތިން މައްސަލައެއް ފާހަގަވެ، އެކަން ހިނގާފައިވާ ގޮތްވެސް ސާފުކޮށްފައިވާ ކަމަށެވެ.
ޔާމީން ރަޝީދު މަރާލި މައްސަލައިގައި، ތޫނު އެއްޗެއް ބޭނުންކޮށްގެން ގަސްދުގައި މީހަކު މެރުމުގެ ކުށުގެ ދަޢުވާ އުފުލާފައި ވަނީ މ. އަންނާރުމާގޭ އިސްމާއީލް ހައިޝަމް ރަޝީދާއި، މ. ކޮޅުފުށީ އީސްޓް ހުސައިން ޒިޔާދާއި، މ. ތާއިފް އިސްމާއީލް ރަޝީދާއި، މ. ކުދެހިގެ ހަސަން ޝިފާޒާއި، ގދ. ގައްދޫ ސިންދުބާދުގޭ މުހައްމަދު ދިފްރާނުގެ އިތުރުން މ. އިރާސްމިކުގޭ އަހުމަދު ޒިހާން އިސްމާއީލްގެ މައްޗަށެވެ. މި މައްސަލައިގައި ހިމެނޭ ސިއްރު ހެއްކެއް ކަމަށް ބުނާ މީހެއްގެ މައުލޫމާތު ސޯޝަލް މީޑިއާގައި ދައުރުވެފައިވެއެވެ.
ހއ. ތަކަންދޫ އިބްރާހީމީ ހިޔާ، ނަދީމު އަބްދުއްރަހީމް (ނަޑޭ, 23އ)އަށް ތޫނު އެއްޗަކުން ހަމަލާދީ މަރާލި މައްސަލަ މިހާރު އޮތީ ޚުލާސާ ބަޔާން އިއްވުމުގެ މަރުޙަލާގައެވެ.
ނަދީމް މަރާލި މައްސަލައިގައި، ގ. ޝާރާޒް، މުހައްމަދު މަފާޒު ހުސައިން ސަލީމްގެ މައްޗަށް ވަނީ ތޫނު އެއްޗަކުން ހަމަލާދީ މީހަކު މެރުމުގެ ކުށުގެ ދައުވާ އުފުލާފައެވެ. އަދި ތޫނު އެއްޗެއް ބޭނުންކޮށްގެން، ގަސްތުގައި މީހަކު މަރާލުމުގައި ބައިވެރިވި ކަމުގެ ކުށުގެ ދައުވާ, ރ. އިންނަމާދޫ ސަމަންތާ, ހުސައިން ޝާމިންއާއި ގއ. ގެމަނަފުށި ހަވާސް, މުހައްމަދު ކަރަމް ސުހައިލް, އަދި ލ. ގަން ވިދާތަރި, އަލީ ނިފާޒުގެ މައްޗަށް އުފުލާފައިވެއެވެ. މި ހަތަރު މީހުން ވެސް ވަނީ ދައުވާއަށް އިންކާރުކޮށްފައެވެ.
