މައުލޫމާތު ހާމަނުކޮށްގެން ރައީސް އޮފީހުގެ މައްސަލަ ބަލައިދިނުމަށް އެދި އައިކޮމްއިން ޕީޖީ އޮފީހަށް މައްސަލައެއް ހުށަހަޅާފައި އޮއްވައި އިއްތިފާޤަކުން ސަރުކާރު މެމްބަރުން ޕީޖީ ބޭރު ކުރައްވާނެކަމުގެ އިންޒާރު މަޖިލީހުގައި ދެއްވައިފިއެވެ.
ރައީސް އޮފީހުގެ މައްސަލަ ބަލައިދިނުމަށް އެދި އައިކޮމްއިން ޕީޖީ އޮފީހަށް މައްސަލަ ހުށަހެޅި ވާހަކަ ހޯމަ ދުވަހު ނޫސްތަކުން ވަނީ ރިޕޯޓު ކޮށްފައެވެ. އެ މައްސަލަ ތަހުގީގު ކޮށްދިނުމަށް އެދި ޕީޖީ އޮފީހުން އަންގާރަ ދުވަހު ވަނީ ފުލުހަށް މައްސަލަހުށަހަޅާފައެވެ.
އަންގާރަ ދުވަހުގެ މަޖިލިސް ޖަލްސާގައި ސަރުކާރު ކޯލިޝަންގައި ހިމެނިވަޑައިގަންނަވާ އެމްޑީއޭގެ މެމްބަރު މުޙައްމަދު އައްބާސް ވަނީ ޕީޖީއަށް އިންޒާރު ދެއްވާފައެވެ. އެހެންނަމަވެސް އައްބާސް އެ އިންޒާރު ދެއްވީ ޖިނާއީ އިޖުރާއަތުގެ ގާނޫނަށް ބަދަލު ގެންނަން ސަރުކާރުގެ ފަރާތުން ހުށަހަޅާފައިވާ ބިލަކަށް ވާހަކަ ދައްކަވަމުންނެވެ.
އައްބާސް ވިދާޅުވީ، ޕީޖީގެ ޤާނޫނީ ޒިންމާ އަދާކުރަން އެބަޖެހޭ ކަމަށާއި، އެހެން ނޫންނަމަ އިސްތިއުފާ ދެއްވާފައި ގެއަށް ވަޑައިގަންނަވަން ޖެހޭ ކަމަށެވެ.
އެހެންނޫންނަމަ، ގަވަރުނަރު ބޭރު ކުރި ގޮތަށް، ޕީޖީވެސް ބޭރު ކުރައްވާނެކަމަށް ވިދާޅުވެ އައްބާސް ވަނީ އިންޒާރު ދެއްވާފައެވެ.
އައްބާސް ވިދާޅުވާ ގޮތުގައި ރައްޔިތުން އެދޭ ގޮތަށް ކަންތައް ނުކުރައްވާ އެއްވެސް ބޭފުޅަކު މަގާމުގައި ހުންނަވަން މަޖިލީހުން ފުރުސަތެއް ނުދެއްވާނެއެވެ.
އެހެންނޫނީ ގަވަރުނަރު ބޭރުކުރި ގޮތަށް އަޅުގަނޑުމެން ބޭރުކުރާނަން އިއްޒަތްތެރި ރައީސް.ސަރުކާރު ކޯލިޝަންގައި ހިމެނިވަޑައިގަންނަވާ އެމްޑީއޭގެ މެމްބަރު އައްބާސް
އައްބާސް މި އިންޒާރު ދެއްވާފައިވަނީ ރައީސް އޮފީހުގެ މައްސަލައާ ގުޅުވާފައި ނޫންކަމުގައި ވީނަމަވެސް، މި ދަނޑިވަޅަކީ ޕިޖީ އޮފީހުން އެ މައްސަލަ ފުލުހަށް ހުށަހެޅި ދަނޑިވަޅުކަންވެސް ފާހަގަ ކުރެވެއެވެ.
