ޕީޖީއަށް ޙަމަލާދިން މައްސަލައިގައި ދެމީހަކު ހައްޔަރުކޮށްފި

ޕްރޮސެކިއުޓަރ ޖެނެރަލް ހުސައިން ޝަމީމަށް ހަމަލާދިން މައްސަލައިގައި ދެމީހަކު ހައްޔަރުކޮށްފައިވާކަމަށް ކޮމިޝަނަރ އޮފް ޕޮލިސް އަލީ ޝުޖާއު ވިދާޅުވެއްޖެއެވެ.

ބުރާސްފަތި ދުވަހު ބޭއްވި ނޫސްވެރިންގެ ބައްދަލުވުމެއްގައި ޝުޖާއު ވިދާޅުވީ، މިކަމުގައި ބައިވެރިވިކަމަށް ތުހުމަތު ކުރެވޭ ދެމީހަކު ހައްޔަރުކޮށްފައިވާ ކަމަށެވެ. އެމީހުން ހައްޔަރުކޮށްފައިވަނީ ބުރާސްފަތި ދުވަހުގެ މެންދުރުގެ ވަގުތެއްގައި ގްރޭޓަރ މާލެ ސަރަޙައްދުންނެވެ.

މި މައްސަލަ ރިޕޯޓު ކުރެވުމާއި ހަމައިން ފުލުހުންގެ ހުރިހާ ވަސީލަތެއް ބޭނުންކޮށްގެން މިކަމުގެ ފަހަތުގައި ތިބި ބަޔަކު ހޯދުމުގެ މަސައްކަތް ފުލުހުން ފެށިކަމަށް ސީޕީ ޝުޖާއު ވިދާޅުވިއެވެ.

ސީޕީ ވިދާޅުވީ، އެމީހުން ޙަމަލާ ދިނީ ކޮން ބައެއްކަން ނޭނގޭ ގޮތަށް މޫނު ފޮރުވައިގެންކަމަށެވެ. އަދި މިއީ ވަރަށް ބޮޑަށް ރޭވިގެން ދީފައިވާ ޙަަމަލާއެއްކަމަށް ވެސް ޝުޖާއު ވިދާޅުވިއެވެ.

މިކަމުގެ ފަހަތުގައިވެސް އިތުރު ބަޔަކު ތިބެދާނެކަމަށް ބަލައި ފުލުހުން ދަނީ މައްސަލަ ތަހުގީގު ކުރަމުންނެވެ.

ސީޕީ ޝުޖާއު ވިދާޅުވީ، މައްސަލައިގެ ތަހުގީގު ކުރިއަށްދާ ވަރަކަށް އިތުރު މައުލޫމާތު ހާމަކުރައްވަމުން ގެންދަވާނެކަމަށެވެ.

މި މައްސަލަ ސީރިއަސް މައްސަލައެއްގެ ގޮތުގައި ފުރިހަމައަށް ތަހުގީގުކޮށް އެކަށީގެންވާ މުއްދަތެއްގެ ތެރޭގައި ތަހުގީގު ނިންމާލަން ކަށަވަރު ކުރުމަށްޓަކައި މި މައްސަލަ ވަނީ ރައްޔިތުންގެ މަޖިލީހުގެ ސަލާމަތީ ހިދުމަތްތަކާ ބެހޭ ކޮމީޓީއަށް ވެސް ހުށަހަޅާފައެވެ.